ნეტო-აღრიცხვის ახალ მოდელთან დაკავშირებით ჩვენს მონახაზს ოქტომბერში წარვადგენთ - ამის შესახებ „ენერგონიუსთან“ „ჰელიოს ენერჯის“ დამფუძნებელი თორნიკე დარჯანია საუბრობს.მისი თქმით, ბუნებრივია, რომ ნეტო-აღრიცხვის ის მოდელი, რომელიც დღეს პრაქტიკაშია დანერგილი, ამ სახით მუდმივად ვეღარ იარსებებს. ამიტომ, ახალი მოდელის შემუშავების საკითხზე კერძო სექტორი სემეკთან ერთად მუშაობს.როგორც თორნიკე დარჯანია განმარტავს, დაცული უნდა იყოს იმ ფიზიკური თუ იურიდიული პირების ინტერესები, რომლებიც ნეტო-აღრიცხვის სისტემაში და ქსელში ახორციელებს ინვესტიციას.„ჩვენ არ გვაქვს იმის მოლოდინი, რომ რეგულაცია შეიცვლება ისე, რომ ჩვენ ეს არ ვიცოდეთ, ან რამე გაუარესდება და ინვესტორებს ცუდ ვითარებაში ჩავაყენებთ. ნებისმიერი ადამიანი, რომელიც მზის ელექტროსადგურში აკეთებს ინვესტიციას, არის ჩვეულებრივი ინვესტორი. ამიტომ, მათი ინტერესები დაცული უნდა იყოს. უნდა არსებობდეს რეგულაციის და კანონმდებლობის მიმართ ნდობა და დარწმუნებულები ვართ, ასეც იქნება, რადგან ამაზე მხარდაჭერა გვაქვს როგორც სემეკ-იდან, ასევე სამინისტროდან და მთავრობიდან.რაც შეეხება იმას, თუ რა მოდელი გვექნება მომავალში, ამაზე აქტიურად ვმუშაობთ სემეკთან. ოქტომბერში ჩვენ გვექნება მონახაზი და დავიწყებთ ერთობლივ მსჯელობას, იმიტომ რომ სემეკი ამ მომენტისთვის მუშაობს მეოთხე ენერგეტიკული პაკეტის დანერგვაზე. რაც თავისთავად, ნეტო-აღრიცხვის რეგულაციას, ისეთი სახით, როგორიც დღეს გვაქვს - არ ცნობს. მაგრამ ეს იმას არ ნიშნავს, რომ რამე გაუარესდება“ - ამბობს თორნიკე დარჯანია.მოქალაქეებისა და საწარმოების მიერ საკუთარი სახლის სახურავებზე დამონტაჟებული მიკრო-სიმძლავრეების რაოდენობა 800 აღწევს. მათი ჯამური დადგმული სიმძლავრე 50 მგვტ-ზე მეტია.ნეტო-აღრიცხვის მოდელი დღეს შემდეგნაირია: თუ პირი ფლობს მზის, ქარის, ჰიდრო ან სხვა განახლებადი ენერგიის წყაროზე მომუშავე მიკროსიმძლავრის ელექტროსადგურს, რომლის სიმძლავრე არ აღემატება 500 კილოვატს, მას შეუძლია პარალელურ რეჟიმში ჩაერთოს ელექტროენერგიის გამანაწილებელ ქსელში და ჭარბად გამომუშავებული ელექტროენერგია მიაწოდოს გამანაწილებელ კომპანიას. ეს პირს საშუალებას მისცემს, დაიკმაყოფილოს საკუთარი მოხმარება, დაზოგოს კომუნალური ხარჯები და მიიღოს სარგებელი გამანაწილებელი კომპანიისაგან.
ეკონომიკის სამინისტროს ინიცირებით, საქართველოს მთავრობამ ელექტროენერგიის წარმოების სიმძლავრის პირველ აუქციონში (CFD) გამარჯვებულ რამდენიმე კომპანიასთან გასაფორმებელი ტექნიკურ-ეკონომიკური კვლევის ხელშეკრულებები მოიწონა.15 სექტემბრის მთავრობის სხდომაზე წარდგენილი პროექტებიდან 1 მზის, 2 ქარის და 7 ჰიდროელექტროსადგურია, რომელთა ჯამური დადგმული სიმძლავრე 165 მგვტ-ზე მეტია, ხოლო ჯამური ინვესტიცია 225 მლნ. აშშ დოლარს აღწევს.სიმძლავრის აუქციონში გამარჯვებული სხვა კომპანიების ენერგეტიკული პროექტები და მათთან დასადები ხელშეკრულებები საქართველოს მთავრობას ეტაპობრივად წარედგინება.შეგახსენებთ, რომ განახლებადი წყაროებიდან ენერგიის წარმოებისა და გამოყენების მხარდაჭერის ახალი სქემის ფარგლებში პირველი აუქციონი 300 მგვტ სიმძლავრის ასათვისებლად ჩატარდა და მასში კერძო სექტორის მხრიდან ძალიან მაღალი ინტერესი დაფიქსირდა - წარმოდგენილი იყო 78 განაცხადი 943 მგვტ დადგმულ სიმძლავრეზე. სულ 27 გამარჯვებული კომპანია გამოვლინდა, რომლებიც 15 ჰიდროელექტროსადგურის, 2 ქარის ელექტროსადგურისა და 10 მზის ელექტროსადგურის მშენებლობის პროექტს განახორციელებენ."აუქციონის შედეგები ადასტურებს, რომ განახლებადი წყაროებიდან ენერგიის წარმოებისა და გამოყენების მხარდაჭერის სქემა ძალიან წარმატებით ხორციელდება, რაც, საბოლოოდ, ენერგოსექტორში 2 მილიარდ დოლარზე მეტი ინვესტიციის განხორციელების შესაძლებლობებს შექმნის" - აცხადებენ ეკონომიკის სამინისტროში.
კომპანია "აჭარისწყალი ჯორჯია" შუახევი ჰესის კაშხლის უსაფრთხოებასთან დაკავშირებით განცხადებას ავრცელებს, რომელსაც უცვლელად გთავაზობთ."ბოლო დღეების განმავლობაში მედიაში, დიდაჭარის კაშხალთან დაკავშირებით გასული ინფორმაციის გათვალისწინებით, გვინდა სრული პასუხისმგებლობით განვაცხადოთ, რომ დიდაჭარის კაშხალი სტრუქტურულად მდგრადია, უსაფრთხოა ექსპლუატაციის მიმართულებით და სრულ შესაბამისობაშია ქართულ და საერთაშორისო სტანდარტებთან.2017 წლის დასაწყისში აგებული დიდაჭარის კაშხალი პასუხობს ყველა საერთაშორისო ტექნიკურ მოთხოვნას, ხოლო ყველა კონსტრუქციას, წინასწარ გაწერილი განრიგისა და პროცედურების შესაბამისად უტარდება რუტინული მომსახურების სამუშაოები.ბეტონის დიდი კონსტრუქციები აშენებულია კონკრეტული თანმიმდევრობით, ცალკე მდგარი სექციების სახით, სადაც უზრუნველყოფილია სივრცე გაფართოებისა და შეკუმშვის პროცესებისთვის, რომლებიც გამოწვეულია ტემპერატურის ცვალებადობით. დასაშვები ოდენობით, წყლის მცირე ფილტრაცია ჩვეულ მოვლენას წარმოადგენს და მისი აღმოფხვრა ხდება რუტინული მომსახურების დროს.სხვადასხვა კონსტრუქციისთვის, აუცილებელი რუტინული მომსახურება ხორციელდება გეგმის შესაბამისად. დიდაჭარის კაშხალს უტარდება უწყვეტი მონიტორინგი, რისთვისაც გამოიყენება კაშხალზე დაყენებული საუკეთესო ინსტრუმენტები და ვიზუალური ინსპექცია.დამატებითი ზომის სახით ,,აჭარისწყალი ჯორჯიამ’’ დაიქირავა საერთაშორისო კაშხლის სპეციალისტები რომელთა მოვალეობებში შედის კაშხლის უსაფრთხოების და მდგრადობის შემოწმება და კაშხლის კონსტრუქციაზე დამატებითი სამუშაოების ჩატარების აუცილებლობის შემთხვევაში, შესაბამისი რეკომენდაციების მომზადება.2023 წლის იანვარი-მარტის პერიოდში, კაშხლის სპეციალისტებმა დიდაჭარის კაშხალზე განახორციელეს დეტალური შეფასება, გადაამოწმეს შესაბამისი მონაცემები და მოამზადეს დასკვნა, რომლის თანახმადაც კაშხლის კონსტრუქცია უსაფრთხოა, ხოლო წყლის გამონადენი კაშხალზე დიზაინით გათვალისწინებულ საზღვრებშია.,,აჭარისწყალი ჯორჯია’’ კიდევ ერთხელ აცხადებს, რომ დიდაჭარის კაშხალი და მასთან დაკავშირებული ყველა ნაგებობა სათანადო საექსპლუატაციო მდგომარეობაშია, ასევე ხორციელდება გეგმიური მონიტორინგი. შესაბამისად, კაშხლის უსაფრთხოებასთან დაკავშირებით შესაძლო შეშფოთებას არავითარი საფუძველი არ გააჩნია" - ნათქვამია განცხადებაში.

ოზურგეთის და ჩოხატაურის მუნიციპალიტეტებს, რეგიონის ყველა რაიონულ ცენტრს ელექტროენერგია სტაბილურად მიეწოდება. ამის შესახებ ინფორმაციას “ენერგო-პრო ჯორჯია” ავრცელებს.“გურიაში ჩამოწოლილმა მეწყერმა და ადიდებულმა მდინარეებმა დააზიანეს “ენერგო-პროჯორჯიას“ კუთვნილი ელექტროქსელის ნაწილი.ოზურგეთის და ჩოხატაურის მუნიციპალიტეტები სტაბილურად მარაგდებიან ელექტროენერგიით. ელექტროენერგია შეფერხებით მიეწოდება ლანჩხუთის მუნიციპალიტეტის სოფლების ნაწილს.კომპანიის ტექნიკური ბრიგადები ამ წუთებში აქტიურად მუშაობენ სტიქიის გამო დაზიანებული ქსელის აღდგენით სამუშაოებზე.აბონენტების ნაწილს უკვე მიეწოდა ელექტროენერგია. აღდგენით სამუშაოებს აფერხებს ჩამოწოლილი მეწყერის და ადიდებული მდინარეების გამო გამოწვეული დაზიანებებამდე მისასვლელი გზების ჩახერგვა. თუმცა, “ენერგო-პრო ჯორჯიას“ ტექნიკური სამსახური ყველაფერს აკეთებს, რომ შეძლებისდაგვარად დროულად მოხერხდეს აბონენტებისთვის ელექტროენეგრიის მიწოდება.კომპანიის ტექნიკური სამსახურის ცნობით, დღის ბოლომდე აბონენტების უმრავლესობას აღუდგება ენერგომომარაგება” - აცხადებს “ენერგო-პრო ჯორჯია”.
კასპიის ბიზნეს ფორუმზე ენერგეტიკული რესურსების ტრანზიტის საკითხები განიხილეს
„ჰელიოს ენერჯი“: ნეტო-აღრიცხვის ახალ მოდელთან დაკავშირებით მონახაზს ოქტომბერში წარვადგენთ
„შავი ზღვის წყალქვეშა კაბელის პროექტით არაერთმა ახლმა ქვეყანამ გამოთქვა დაინტერესება“
"აწარმოე საქართველოში" ელექტროენერგიის წარმოების პროგრამაში ერთი პროექტი უკვე ინიცირდა
IEA: რთული ეკონომიკური ფონი დაბალემისურ წყალბადში ინვესტიციებს აფერხებს