“არც ელექტროენერგიის, არც ბუნებრივი გაზის და არც წყალმომარაგების სექტორში ტარიფების ზრდა მოსალოდნელი არაა“ - დავით ნარმანია

სემეკის თავმჯდომარემ დავით ნარმანია განაცხადა, რომ არც ბუნებრივი გაზის, არც ელექტროენერგიისა და არც წყალმომარაგების სექტორში ტარიფების ზრდა მოსალოდნელი არაა. მისი თქმით, სემეკი ტარიფების დადგენის სრულიად ახალ მიდგომაზე გადავიდა, რომლის მიხედვითაც კომისია არა ყოველწლიურად ადგენს ტარიფებს, არამედ ამუშავებს საშუალოვადიან და გრძელვადიან სატარიფო პოლიტიკას. „მინდა მომხმარებელი დავამშვიდო, რადგან არც ელექტროენერგიის, არც ბუნებრივი გაზისა და არც წყალმომარაგების ნაწილში ჩვენი ტარიფების გადახედვა-გაზრდა არ გვიწევს.  ჩვენ გადავედით ტარიფების დადგენის საშუალო და გრძელვადიან მიდგომაზე, რომლის მიხედვითაც სემეკი ყოველწლიურად არ ადგენს ტარიფებს. შესაბამისად გასულ წელს გადავხედეთ ელექტროენერგიის ტარიფს და შევამცირეთ 3 თეთრით როგორც მოსახლეობისთვის ისე კომერციული სექტორისთვის.  შესაბამისად, ამ 3 თეთრით შემცირებულ ტარიფს ჩვენ მინიმუმ მომავალი წლის ბოლომდე შევინარჩუნებთ. რაც შეეხება ბუნებრივ აირს, აქ ორი წლის წინ დავადგინეთ ტარიფი, რომელიც 5 წლის განმავლობაში შენარჩუნდება. შესაბამისად, ამ ნაწილშიც მომდევნო 3 წელი ტარიფების ცვლილება მოსალოდნელი არაა. წყალმომარაგების სექტორში კი გასულ წელს 3 წლიანი ტარიფი დავადგინეთ, რაც იმას ნიშნავს, რომ მომდევნო ორი წელი ტარიფი უცვლელად შენარჩუნდება“. - აცხადებს დავით ნარმანია.სემეკის თავმჯდომარე ასევე აცხადებს, რომ არსებულ რეალობაში ერთ-ერთი ყველაზე დაბალი ტარიფები სწორედ საქართველოშია, რასაც, თავის მხრივ, იწვევს სემეკის პოლიტიკა, რომელიც მიმართულია ხარჯების მაქსიმალურ შემცირებაზე.„ჩვენ გვაქვს ისეთი სატარიფო პოლიტიკა, რომლის პირობებშიც მაქსიმალურად ვწურავთ კომუნალური კომპანიების ტარიფებს, როცა მათ ვადგენთ. მხოლოდ აზერბაიჯანს აქვს ელექტროენერგიასა და ბუნებრივ აირზე ჩვენზე დაბალი ტარიფი, ეს ბუნებრივია, რადგან მათ აქვს უფრო მეტი ბუნებრივი რესურსი. სხვა ნაწილში ჩვენ გვაქვს ტარიფების დადგენის კუთხით ისეთი პოლიტიკა, როდესაც ხარჯებს მაქსიმალურად ვწურავთ და ვითვალისწინებთ მინიმალურად აუცილებელ ინვესტიციებს ქსელის განვითარებისთვის. სწორედ ეს ყველაფერი გვაძლევს საშუალებას, რომ ტარიფები გვქონდეს ერთ-ერთი ყველაზე დაბალი“.- აღნიშნა დავით ნარმანიამ.

სემეკისა და სხვა მარეგულირებლების ორგანიზებით საერთაშორისო კონფერენცია „კონკურენცია და მომხმარებლის უფლებების დაცვა“ გაიმართება

თბილისში, 20-22 ნოემბერს, III საერთაშორისო კონფერენცია „კონკურენცია და მომხმარებლის უფლებების დაცვა“ გაიმართება. ღონისძიების ფარგლებში მონაწილეობას მიიღებენ შემდეგი მარეგულირებელი ორგანოები:▪️ GCCA • საქართველოს კონკურენციისა და მომხმარებლის დაცვის სააგენტო ▪️ საქართველოს ეროვნული ბანკი • National Bank of Georgia ▪️ სემეკი -  ენერგეტიკისა და წყალმომარაგების მარეგულირებელი კომისია ▪️ დაზღვევის სახელმწიფო ზედამხედველობის სამსახური▪️ კომუნიკაციების კომისია სამ დღიანი ღონისძიების ფარგლებში, საქართველოს სხვადასხვა ქვეყნის 20-მდე დელეგაცია ესტუმრება. კონფერენციაში მონაწილეობას მიიღებენ სხვადასხვა ქვეყნის კონკურენციის და მომხმარებელთა  დაცვის უწყებების ხელმძღვანელი პირები, საერთაშორისო ორგანიზაციების - გაეროს ვაჭრობისა და განვითარების კონფერენციის(UNCTAD), ეკონომიკური თანამშრომლობისა და განვითარების ორგანიზაციის(OECD), ევროკომისიის კონკურენციის გენერალური დირექტორატის(DG-COMP), ევროკომისიის იუსტიციისა და მომხმარებელთა გენერალური დირექტორატის(DG-JUSTICE), კონკურენციის კვლევის პოლიტიკის ქსელის(CEPR) და გერმანიის მომხმარებელთა ორგანიზაციების ფედერაციის მაღალი რანგის წარმომადგენლები.  ასევე, ადგილობრივი და საერთაშორისო ექსპერტები, საჯარო უწყებების, მარეგულირებელი ორგანოების, აკადემიური წრის და ბიზნეს სექტორის წარმომადგენლები. ხუთი მარეგულირებელი უწყების ხელმძღვანელი პირების მონაწილეობით,  სპეციალური პანელი ჩატარდება, სადაც სექტორულ ჭრილში, საქართველოში - კონკურენციისა და მომხმარებლის უფლებების დაცვის მიმართულებით მიღებული შედეგები, მიღწევები და გამოწვევები იქნება წარმოდგენილი.III საერთაშორისო კონფერენციაზე, მთავარი მომხსენებლის რანგში, მონაწილეების წინაშე წარდგებიან - ანდრეას მუნდტი, გერმანიის კონკურენციის უწყების პრეზიდენტი, საერთაშორისო კონკურენციის ქსელის მმართველი ჯგუფის თავმჯდომარე; ტერესა მორეირა, UNCTAD-ის კონკურენციისა და მომხმარებელთა პოლიტიკის მიმართულების ხელმძღვანელი; კრისტინა კაფარა, კონკურენციის კვლევის პოლიტიკის ქსელის დირექტორის მოადგილე და იზაბელ პერინიონი, ევროკომისიის იუსტიციისა და მომხმარებელთა გენერალური დირექტორატის მომხმარებელთა დირექტორი და სხვები.  ვრცლად: https://gcca.gov.ge/index.php?m=370&news_id=1594

"მსხვილი ენერგოპროექტების განხორციელებას დიდი მნიშვნელობა აქვს ენერგორესურსების დაგროვებისა და ქსელის სტაბილურობის შენარჩუნებისთვის"

მთავრობის სხდომის დასრულების შემდეგ გამართულ ბრიფინგზე პირველმა ვიცე-პრემიერმა ენერგეტიკის სექტორში სამომავლო გეგმებზე ისაუბრა, მათ შორის, შეეხო მსხვილი ჰესების პროექტებს, რომლებზეც მედიის წარმომადგენლებმა შეკითხვები დაუსვეს.„იცით, რომ „ხუდონჰესი“ სახელმწიფომ  დაიბრუნა, გამოისყიდა - ეს პროცესი უწყვეტად მიმდინარეობდა, შესაბამისი იურიდიული პროცედურები საკმაოდ დიდ დროს მოითხოვს იმისთვის, რომ პროექტებმა ახალი სიცოცხლე შეიძინონ, განხორციელდნენ მაქსიმალურად მდგრადად და ჩვენი საზოგადოების, ჩვენი ქვეყნის ინტერესების გათვალისწინებით. ჩავატარეთ შესაბამისი კვლევები, რომელშიც მონაწილეობდა შვეიცარიული ცნობილი საინჟინრო  კომპანია, კვლევის წინასწარი შედეგები საზოგადოებასაც გავაცანით, რაც გულისხმობს ჰესის რელოკაციას, რადგან ეს იყო ძირითადი შემზღუდავი ფაქტორი სოციალური კუთხით და მოსახლეობის წინააღმდეგობაც გვახსოვს, ამიტომ, ისევ მოსახლეობის აქტიური ჩართულობით და მათი მხარდაჭერით, პროექტი განხორციელდება, თუმცა უკვე შეცვლილ ლოკაციაზე“ - აღნიშნა ლევან დავითაშვილმა.მინისტრის ინფორმაციით, პროექტი უკვე განხორციელების ეტაპზეა და დაიწყება  დეტალური პროექტირება. მისივე განცხადებით, პარალელურად, უკვე გვყავს დაინტერესებული ინვესტორები, რომლებიც სახელმწიფოსთან ერთად იქნებიან პარტნიორები ამ მსხვილ პროექტში.„ასევე ჩვენ გვყავს  პარტნიორი, ინვესტორი „ნენსკრას“ პროექტში,  რომელთანაც  განვაახლეთ, ხელახლა დავდეთ ხელშეკრულება - მათ ჰქონდათ ბევრი პრობლემა, რის გამოც ვერ განახორციელეს პროექტი, თუმცა, რადგანაც ეს არის სამხრეთ კორეული სახელმწიფო კომპანია, ჩვენთვის ძალიან მნიშვნელოვანია, მაქსიმალურად შევინარჩუნოთ პარტნიორული ურთიერთობები და თუ მათ გააჩნიათ  პროექტის განხორციელების პოტენციალი, გამოვიყენოთ ბოლომდე, ამიტომ აქაც,  მიუხედავად იმისა, რომ უფრო სწრაფად გვინდა შედეგი, მოთმინებით ვართ დიალოგში პარტნიორთან, რომ ეს პროექტი მივიყვანოთ ლოგიკურ დასასრულამდე“ - განაცხადა პირველმა ვიცე-პრემიერმალევან დავითაშვილმა „ნამახვანი ჰესის“ პროექტზეც ისაუბრა, მისი შეფასებით, სამწუხარო ფაქტია, რომ ეს პროექტი ვერ განხორციელდა თავის დროზე, თუმცა, მის  განხორციელებას აქვს ძალიან დიდი მნიშვნელობა.„იცით რომ მიწები იყო გადაცემული ინვესტორზე, ამიტომ იურიდიული პროცედურები, რომლებიც, ერთი მხრივ, გულისხმობს საარბიტრაჟო პროცედურებს, მეორე მხრივ, მიწის სახელმწიფოზე გადმოცემას და პროექტის გაცოცხლებას, პარალელურად მიმდინარეობს“ – აღნიშნა ეკონომიკის მინისტრმა.ლევან დავითაშვილმა კიდევ ერთხელ ხაზგასმით აღნიშნა, რომ ასეთ  მსხვილ პროექტებს დიდი მნიშვნელობა აქვთ ენერგეტიკული თვალსაზრისით, მათ შორის იმისთვის, რომ ქსელის სტაბილურობა შევინარჩუნოთ და  გვქონდეს დაგროვებული ენერგორესურსები.

წყალმომარაგების სისტემის გაუმართაობის გამო სემეკმა „ჯორჯიან უოთერ ენდ ფაუერი“ დააჯარიმა

საქართველოს ენერგეტიკისა და წყალმომარაგების მარეგულირებელმა ეროვნულმა კომისიამ (სემეკ) შპს „ჯორჯიან უოთერ ენდ ფაუერი“ სალიცენზიო პირობების დარღვევის გამო დააჯარიმა. დაჯარიმების მიზეზს წარმოადგენს ქ. თბილისში,წყნეთის გზატკეცილი N5-ში სასმელი წყლის მიწოდების საქართველოში მოქმედ სტანდარტებსა და ტექნიკურ რეგლამენტებთან შეუსაბამობა და სემეკის მიერ დადგენილი წესებით გათვალისწინებული მოთხოვნების დარღვევა. კომპანიას დაევალა ჯარიმის სახით დაკისრებული 10 000 ლარის, სახელმწიფო ბიუჯეტში გადახდა.მოქალაქის მომართვის საფუძველზე, სემეკის წყალმომარაგების დეპარტამენტის მიერ წყნეთის გზატკეცილი N5-ში წყალმომარაგების საკითხებთან დაკავშირებით განხორციელებული მოკვლევის შედეგად დადგინდა, რომ შპს „ჯორჯიან უოთერ ენდ ფაუერის“ წყალმომარაგების ქსელი არ იყო მოწყობილი ტექნიკური რეგლამენტის შესაბამისად, სასმელი წყლის მიწოდება არ შეესაბამებოდატექნიკურ ნორმებსა და სტანდარტებს.  კომპანიას დაევალა ხარვეზების გამოსწორება და მოქალაქისთვის სასმელი წყლის მიწოდება საქართველოში მოქმედი სტანდარტებისა და ტექნიკური რეგლამენტის შესაბამისად. განსაზღვრულ ვადაში დავალების შეუსრულებლობის შემთხვევაში,საქართველოს კანონმდებლობის შესაბამისად სემეკი იმსჯელებს შპს „ჯორჯიან უოთერ ენდ ფაუერისთვის“ სანქციის დაკისრებაზე.

სემეკის საქმიანობის განვითარებაში შეტანილი წვლილისთვის დავით ნარმანიამ სემეკის თანამშრომლები დააჯილდოვა

საქართველოს ენერგეტიკისა და წყალმომარაგების მარეგულირებელი ეროვნული კომისიის (სემეკ) დაარსების დღესთან დაკავშირებით, სემეკის თავმჯდომარემ დავით ნარმანიამ კომისიის აპარატის თანამშრომლები დააჯილდოვა. სემეკის საქმიანობაში შეტანილი წვლილისთვის ჯილდო გადაეცათ ნინო ლაშხიას, შორენა გარიშვილს, ნატო კოვზირიძეს, გიორგი წერეთელს, ქეთევან ტურაშვილს, ლაშა ფინცაკიას, გიორგი დიდებაშვილს,  სოფიო ჩოქურს, ვანო მეჭურჭლიშვილს და ქეთევან ბერიკაშვილს.სემეკი, როგორც დამოუკიდებელი მარეგულირებელი ორგანო, „ელექტროენერგეტიკის შესახებ“ საქართველოს კანონის საფუძველზე, 1997 წელს ჩამოყალიბდა. 1997 წლის 23 ოქტომბერს ხელი მოეწერა ელექტროენერგეტიკის მარეგულირებელი ეროვნული კომისიის პირველი აპარატის ჩამოყალიბებას. ამჟამად, მარეგულირებელი კომისია არეგულირებს ელექტროენერგეტიკის, ბუნებრივი გაზის, წყალმომარაგებისა და მელიორაციის სექტორებს. სემეკს, როგორც წარმატებულ ორგანიზაციას, არსებობის მანძილზე არაერთი საერთაშორისო ჯილდო აქვს მიღებული. ამასთანავე, აღსანიშნავია, რომ კომისიას, საერთაშორისო ენერგეტიკული ორგანიზაციების მიერ მიენიჭა მანდატი 2026 წელს უმასპინძლოს ენერგეტიკის სექტორისთვის უმნიშვნელოვანეს ღონისძიებას - ენერგეტიკის რეგულირების მსოფლიო ფორუმს. ნერგეტიკისრეგულირების მსოფლიო ფორუმის ფარგლებში ქ. თბილისს 1000-ზე მეტი მაღალი რანგის დელეგატი ეწვევა. კერძოდ, რიგით მეცხრე მსოფლიო ენერგეტიკულ ფორუმში მონაწილეობას მიიღებენ ევროპისა და სხვადასხვა ქვეყნის წარმომადგენლები, ენერგეტიკული გაერთიანების, ასოციაციების წევრი ქვეყნები, სამთავრობო უწყებების, ენერგეტიკული და დონორი ორგანიზაციების პირველი პირები.