„აუცილებელია, ვიფიქროთ არა მხოლოდ ახალი გენერაციის განვითარებაზე, არამედ ელექტროენერგიის შიდა მოხმარების ზრდაზეც. მაგალითად, მაისსა და ივნისში, როდესაც ჭარბი ელექტროენერგია გვაქვს, ეს ბუნებრივად ნიშნავს, რომ ტარიფიც შეიძლება უფრო დაბალი იყოს. სწორედ ამ პერიოდში უნდა შევქმნათ დამატებითი მოთხოვნა.” - ამის შესახებ მცირე და საშუალო ჰესების ასოციაციის ხელმძღვანელმა გიორგი მარგებაძემ “ბიზნესპარტნიორის” ღამის ეთერში განაცხადა.მისი თქმით, შესაძლებელია ეს გამოყენებული იყოს სოფლის მეურნეობის განვითარების მიმართულებით და ერთ-ერთი გამოსავალი შეიძლება იყოს სარწყავი სისტემების უფრო აქტიური გამოყენება.“საბჭოთა პერიოდში დაახლოებით 400 მეგავატის სიმძლავრის სატუმბი სადგურები მუშაობდა, დღეს კი მხოლოდ 80 მეგავატია დატვირთული. როდესაც სარწყავი ინფრასტრუქტურა გაფართოვდება და სოფლის მეურნეობა განვითარდება, ელექტროენერგიის მოხმარებაც მნიშვნელოვნად გაიზრდება.იგივე მიდგომა შეიძლება გავრცელდეს ენერგოინტენსიურ საწარმოებზე, მაგალითად, ფეროშენადნობებისა და მეტალურგიის სექტორზე. თუ მათ წინასწარ ეცოდინებათ, რომ მაის-ივნისში ელექტროენერგია უფრო იაფი იქნება, შეძლებენ წარმოების დაგეგმვას სწორედ ამ პერიოდზე. შედეგად, დამატებით დაახლოებით 100 მეგავატის, ან შესაძლოა უფრო დიდი მოცულობის მოხმარების შექმნაც გახდეს შესაძლებელი.”- ამბობს მარგებაძე.მისივე თქმით, სექტორმა უნდა იფიქროს ახალი მიმართულებების განვითარებაზე, მაგალითად, მონაცემთა ცენტრების ან ხელოვნური ინტელექტის ინფრასტრუქტურის მოზიდვაზე, სადაც დაბალი ტარიფი კონკურენტულ უპირატესობას შექმნის.“სამუშაო ბევრია, მხოლოდ ექსპორტზე, შავი ზღვის კაბელზე და ელექტროენერგიის გატანაზე არ უნდა ვიყოთ ორიენტირებული. პარალელურად აუცილებელია შიდა მოხმარების ზრდა და ისეთი ეკონომიკური სექტორების განვითარება, რომლებიც ქვეყანაში წარმოებულ ელექტროენერგიას მაქსიმალურად გამოიყენებენ.“ - აღნიშნა გიორგი მარგებაძემ.bp.ge 

სემეკის ელექტროენერგეტიკის დეპარტამენტის დირექტორის, თორნიკე აფრიაშვილის ინფორმაციით, ენერგეტიკულ პროექტებში, სადაც სკოლის მოსწავლეები მონაწილეობენ საკმაოდ მაღალი აქტივობა ფიქსირდება.როგორც თორნიკე აფრიაშვილი "ბიზნესპარტნიორთან" განმარტავს, ჩატარებული გამოკითხვის მიხედვით, პროექტის ფარგლებში მოსწავლეების დაახლოებით 40%-ს ენერგეტიკის ფაკულტეტზე ჩაბარება მყარად აქვს გადაწყვეტილი."მოსწავლეების მხრიდან პროექტის მიმართ საკმაოდ მაღალი აქტივობა დაფიქსირდა. ამჟამად, სენაკის მუნიციპალიტეტში სხვადასხვა სკოლის მოსწავლეებმა კონკურსში მიიღეს მონაწილეობა. საკონკურსო პირობების მიხედვით, მათ უნდა მოემზადებინათ ელექტროენერგეტიკის თემატიკაზე შექმნილი ნახატი, ან მაკეტი. შევარჩიეთ 16 საუკეთესო მონაწილე, რომლებიც ერთი კვირით ბანაკში წავიყვანეთ. ამ პერიოდში მათ ტრენინგები ჩაუტარდათ. ენერგეტიკის სფეროს პოპულარიზაციას აქტიურად ვეწევით და მოსწავლეებთან მუდმივ კომუნიკაციას ვინარჩუნებთ. მათი მხრიდან ინტერესი და მომართვიანობა ყოველთვის მაღალია.პროექტის ფარგლებში, ამ დროისთვის დაახლოებით ხუთმა მონაწილემ გადაწყვიტა ენერგეტიკის მიმართულებით სწავლა გაეგრძელებინა და შესაბამის ფაკულტეტზე ჩააბარა. გარდა ამისა, ბოლო სამი წლის განმავლობაში პროექტში ჩართული ისეთი ასაკობრივი სეგმენტი გვყავდა, რომელიც უნივერსიტეტებში ჩაბარებას მომავალი წლიდან იწყებს", - აღნიშნავს თორნიკე აფრიაშვილი.ცნობისთვის, სემეკის მიერ დაფუძნებული ენერგეტიკის სასწავლო ცენტრის ინიციატივითა და ორგანიზებით, სკოლის მოსწავლეებისათვის სხვადასხვა პროექტი ხორციელდება. მათ შორის განსაკუთრებით პოპულარულია პროექტი სახელწოდებით "ელექტროენერგიის გზა დაბადებიდან ჩვენამდე". პროექტის მიზანია ელექტროენერგიის წარმოებიდან მოხმარებამდე სრული ციკლის შესახებ მოსწავლეებმა ინფორმაცია მიიღონ.bp.ge

დავიწყეთ ძალიან მნიშვნელოვანი პროცესი, რაც უკავშირდება მესტიის მუნიციპალიტეტის გამრიცხველიანებას, წინასწარი ღონისძიებების გატარებამ უკვე მოგვცა ხელშესახები შედეგი -  ივნისის გასული პერიოდის მონაცემებით, უკვე შემცირებულია წინა წლის შესაბამის პერიოდთან შედარებით ელექტროენერგიის მოხმარება დაახლოებით 35 %-ით, - ამის შესახებ საქართველოს პრემიერ-მინისტრმა ირაკლი კობახიძემ პარლამენტში ყოველწლიური მოხსენებით გამოსვლისას განაცხადა.მთავრობის მეთაურის თქმით, გამრიცხველიანების პროცესის დასრულების შედეგად, მთლიანად მოწესრიგდება სისტემა, რაც მნიშვნელოვანი იქნება კეთილსინდისიერი გადამხდელებისა და მომხმარებლებისთვის.„დავიწყეთ ძალიან მნიშვნელოვანი პროცესი, რაც უკავშირდება მესტიის მუნიციპალიტეტის გამრიცხველიანებას. ჩვენ ამასთან დაკავშირებით საზოგადოებას ფართოდ გავაცანით ინფორმაცია. მოხმარება წლის განმავლობაში შეადგენდა 125 მილიონ კილოვატ საათს, როდესაც მსგავსი ზომის მუნიციპალიტეტში მოხმარება შეადგენს ერთნიშნა მაჩვენებელს, ანუ დაახლოებით ათმაგი და თორმეტმაგი იყო მოხმარება მუნიციპალიტეტში, იყო მაინინგის კონკრეტული პრობლემა.უკვე გატარდა წინასწარი ღონისძიებები, რამაც მოგვცა ხელშესახები შედეგი. ივნისის გასული პერიოდის მონაცემებით, უკვე შემცირებულია წინა წლის შესაბამის პერიოდთან შედარებით ელექტროენერგიის მოხმარება დაახლოებით 35 პროცენტით, წინასწარი ზომების გატარების შედეგად. როდესაც დასრულდება გამრიცხველიანების პროცესი, რა თქმა უნდა, მთლიანად მოწესრიგდება სისტემა, რაც მნიშვნელოვანი იქნება კეთილსინდისიერი გადამხდელებისა და მომხმარებლებისთვის,“- აღნიშნა პრემიერმა.

საბალანსო ელექტროენერგიის საშუალო ფასი მაისში წლიურად 3.5%-ით გაიზარდა და კვტ.სთ-ზე 5.1 აშშ ცენტი შეადგინა. ამის შესახებ Galt & Taggart-ის საქართველოს ელექტროენერგიის ბაზარის კვლევაშია ნათქვამი. მათივე ცნობით, საბალანსო მოცულობა უმნიშვნელოდ წლიური 0.7%-ით გაიზარდა და 0.3 ტვტ.სთ შეადგინა, რაც ჯამური მიწოდების 23%-ს წარმოადგენს."ამასთან, 2026 წლის 12 ივნისს ქსელის წესებში შევიდა ცვლილება, რომლის მიხედვით: გადაცემის სისტემის ოპერატორი ვალდებულია ქსელთან მიერთების შეთანხმებები იმ ელექტროსადგურის პროექტებს გააუქმოს, რომლებსაც ეკონომიკის სამინისტროს დასტური ტექნიკურ ეკონომიკური კვლევის, ან მშენებლობის ეტაპზე ყოფნის შესახებ არ აქვთ. აღნიშნულ ინფორმაციას ელექტროსისტემა სამინისტროსგან პირველი აგვისტოს ჩათვლით გამოითხოვს. ელექტროსისტემის მიღებული გადაწყვეტილების გასაჩივრების უფლება პროექტის დეველოპერებს 10 სამუშაო დღის განმავლობაში აქვთ. გაუქმებულ პროექტებს გადახდილი ქსელთან დაერთების საფასური დაუბრუნდებათ. ენერგო-პროს და თელასის ქსელზე ახალი გენერაციის ობიექტის დაერთების განაცხადისთვის სავალდებულო გახდა მთავრობასთან გაფორმებული ხელშეკრულება პროექტის განვითარებაზე, ან სამინისტროს წერილობითი დასტური.აღნიშნული ცვლილება მიზნად ისახავს ელექტროსადგურების მშენებლობის პროცესის ერთიან ჩარჩოში მოქცევას და ქსელზე მიერთების წერტილებში დარეზერვებული სიმძლავრეების გათავისუფლებას", - ვკითხულობთ კვლევაში.bp.ge 

Galt & Taggart-ის საქართველოს ელექტროენერგიის ბაზარის კვლევის მიხედვით,  2026 წლის 5 თვის მონაცემებით, ქვეყანაში ელექტროენერგიის ადგილობრივი მოხმარება წლიურად 6.1%-ით გაიზარდა და 6.2 ტვტ.სთ შეადგინა.მათივე ცნობით, იმპორტისა და თბოგენერაციის წილი ჯამურ მიწოდებაში 36.3%-ი გახდა (vs 31.1% 2025 წლის 5 თვეში)."2026 წლის მონაცემებით, აუცილებელია ისეთი გენერაციის ობიექტების განვითარება, რომლებიც საქართველოს სეზონურ გამოწვევებს უპასუხებენ. მაგალითად საჭიროა რეზერვუარიანი ჰიდროსადგურები, ასევე ქარის სადგურები. ამასთან, მონაცემები ხაზს უსვამს ენერგიის დამაგროვებლებისა და საექსპორტო ინფრასტრუქტურის განვითარების მნიშვნელობას", - ვკითხულობთ ინფორმაციაში.მათივე ცნობით, ადგილობრივი მოხმარება წლიურად 3.8%-ით გაიზარდა და 1.1 ტვტ.სთ შეადგინა."წლიური ზრდა დაფიქსირდა ყველა სეგმენტში: აფხაზეთის რეგიონი: +6.6%-ი, პირდაპირი მომხმარებლები: +5.8%-ი, საცალო მომხმარებლები: +2.1%-ი. ამასთან, მოხმარების ზრდა უკავშირდება, როგორც კლიმატურ ფაქტორებს, ასევე ენერგოინტენსიური საწარმოების გააქტიურებას", - ვკითხულობთ კვლევაში.bp.ge 

საქართველოს ენერგეტიკისა და წყალმომარაგების მარეგულირებელი ეროვნული კომისიის (სემეკ) თავმჯდომარემ, პროფესორმა დავით ნარმანიამ მონაწილეობა მიიღო პლატფორმა „ბიზნესი განათლებისთვის“ ფარგლებში გამართულ გახსნით ღონისძიებასა და  პანელურ დისკუსიაში, რომელიც შეეხებოდა  განათლების სექტორში მოკლევადიანი პროგრამების მნიშვნელობას, შრომის ბაზრის მოთხოვნებსა და კერძო სექტორის ჩართულობის მიზნობრიობას გადამზადების პროგრამების შემუშავებაში.პლატფორმა „ბიზნესი განათლებისთვის" აერთიანებს განახლებადი ენერგიების სექტორის ბიზნეს-წარმომადგენლებს, ენერგეტიკის მარეგულირებელ ორგანოს, საგანმანათლებლო დაწესებულებებს, დარგის ექსპერტებსა და სხვა დაინტერესებულ მხარეებს პროფესიული განათლებისა და შრომის ბაზრის მოთხოვნების დაახლოებისა და სექტორის მდგრადი განვითარების ხელშეწყობისთვის.პლატფორმა „ბიზნესი განათლებისთვის“ ორგანიზებულია უსაფრთხოების აკადემიის პროფესიული კოლეჯის მიერ.

“ნეტო აღრიცხვის სისტემაში ჩართვისთვის დადგენილი  20%-იანი ლიმიტი  "თელასის" ქსელშიც შეივსო.” – ამის შესახებ „ბიზნესპარტნიორს“ სემეკის თავმჯდომარემ განუცხადა.დავით ნარმანიას ინფორმაციით,  3 ივნისიდან „თელასში“ შესული განახლებადი ენერგიის სადგურების განაცხადები ნეტო აღრიცხვაში ჩართვასთან დაკავშირებით,  ავტომატურად ხარვეზდება.მზის ელექტროსადგურების მფლობელებს რეგიონების მსგავსად, დედაქალაქშიც უკვე მხოლოდ ნეტო დარიცხვის მოდელით სარგებლობის შესაძლებლობა ეძლევათ.„დადგენილი 20 პროცენტიანი კვოტა 2 ივნისს „თელასის“ ქსელშიც შეივსო. სამი ივნისიდან მიღებული განაცხადები ავტომატურად იქნება დახარვეზებული. თუმცა მომხმარებლებს, რომლებსაც უნდათ მწვანე ენერგიის შესაბამისი ობიექტი შექმნან,  აქვთ საშუალება გააკეთონ განაცხადები 100 კილოვატამდე სიმძლავრის, ერთ საკადასტრო ერთეულზე - ერთი აბონენტისთვის,“- აღნიშნა დავით ნარმანიამ.მისივე თქმით, სექტორის წარმომადგენლები ითხოვდნენ,  რომ ნეტო აღრიცხვა გაგრძელებულიყო.„გამომდინარე იქიდან,  რომ ეს იწვევს ქსელის არასტაბილურობას, ასევე სამომხმარებლო ტარიფზე ზეწოლას, ქსელური გატარების შეღავათების გამო, მარეგულირებელმა კომისიამ არ მიიჩნია მიზანშეწონილად რომ გადაეხედა დადგენილი ზღვრისთვის,“ - აღნიშნა დავით ნარმანიამ.bp.ge 

შინაგან საქმეთა სამინისტრომ ჯამში 330 ე.წ. მაინერი ამოიღო, ჩვენი მიზანია, მაქსიმალურად ამოღებული იქნას ყველა მაინერი, შესაბამისად, შემცირებული იქნას ელექტროენერგიის მოხმარება, -  ამის შესახებ საქართველოს მთავრობის ადმინისტრაციის უფროსმა ლევან ჟორჟოლიანმა განაცხადა.მისი თქმით, მთავრობა მოუწოდებს მოსახლეობას, ეთანამშრომლონ შინაგან საქმეთა სამინისტროს, რათა გამოვლენილი იქნას ელექტროენერგიით სარგებლობის უკანონო ფაქტები.„ჩვენი მიზანია, მაქსიმალურად ამოღებული იქნას ყველა მაინერი, შესაბამისად, შემცირებული იქნას ელექტროენერგიის მოხმარება, რომელიც 133 მლნ კილოვატ/საათს აჭარბებდა, რაც მესტიის ზომის მუნიციპალიტეტისთვის არარეალურია. ეს უნდა იყოს მაქსიმუმ 7-10 მლნ კილოვატ/საათი. ჩვენ მოვუწოდებთ მოსახლეობას, მაქსიმალურად ეთანამშრომლონ შინაგან საქმეთა სამინისტროს, რათა გამოვლენილი იქნას ელექტროენერგიით სარგებლობის უკანონო ფაქტები“, -  განაცხადა ლევან ჟორჟოლიანმა.

ეკონომიკისა და მდგრადი განვითარების მინისტრის, მარიამ ქვრივიშვილის შეფასებით, სვანეთში ძალიან მნიშვნელოვანი პროცესი დაიწყო  ელექტროენერგიის მოხმარების თვალსაზრისით არსებული  მდგომარეობის მოსაწესრიგებლად.  მინისტრის განცხადებით, ოპერატორ კომპანიასთან თანამშრომლობით მიმდინარეობს მუშაობა სვანეთის სწრაფი გამრიცხველიანებისთვის, რაც უმნიშვნელოვანესი, წინ გადადგმული ნაბიჯი იქნება როგორც  უშუალოდ რეგიონის, ასევე მთელი ქვეყნისთვის.„ორი მიმართულებით მიმდინარეობს პროცესი: ერთი მხრივ, ადგილზე მუშაობს შინაგან საქმეთა სამინისტრო, რომელიც, ფაქტობრივად, ყოველდღიურ რეჟიმში აქვეყნებს პროგრესს  არალეგალური მაინინგის გამოვლენის ფაქტების შესახებ, ხოლო,  მეორე მხრივ, უშუალოდ ენერგეტიკული თვალსაზრისით  ჩვენ ძალიან მჭიდროდ ვთანამშრომლობთ ოპერატორთან, რომელთან ერთადაც ვსაზღვრავთ  მომავალი პერიოდის გეგმა-გრაფიკს იმისთვის, რომ დაუყონებლივ და ძალიან სწრაფად მოხდეს სვანეთის გამრიცხველიანება, რაც იქნება უმნიშვნელოვანესი, წინ გადადგმული ნაბიჯი, უპირველესად,  სვანეთისთვის და ზოგადად, მთელი საქართველოსთვის“ - აღნიშნა მინისტრმა.მარიამ ქვრივიშვილის განმარტებით, მნიშვნელოვანია სამართლიანობის აღდგენა, რადგან არსებული მდგომარეობა  გავლენას ახდენს სამომხმარებლო ტარიფზე.„საქართველოს მთავრობამ საკმაოდ დაბალანსებული გადაწყვეტილება მიიღო, როდესაც, ერთი მხრივ თქვა, რომ შენარჩუნდება არსებული სატარიფო პოლიტიკა, მაგრამ, მეორე მხრივ, უზრუნველვყოფთ  ელექტროენერგიის მოხმარების ზედა ზღვრის არსებობის მოწესრიგებას იმისთვის, რომ გავმიჯნოთ საჭიროება, რომელიც უშუალოდ ამ ტერიტორიაზე მცხოვრებ მოსახლეობას აქვს, ასევე სასტუმროებს, განთავსების ობიექტებსა და სხვა ბიზნეს მეწარმეებს,  მაგრამ,  ამავდროულად, რა თქმა უნდა, ცალსახად გასამიჯნია  ელექტროენერგიის ის არალეგალური და უკანონო მოხმარება, რომელიც, თავის მხრივ, მაინინგს გულისხმობს“ - განაცხადა ეკონომიკის მინისტრმა.

"საქართველოს სახელმწიფო ელექტროსისტემამ“ შიდა ქართლში სამი ელექტროგადამცემი ხაზის მშენებლობისა და რეკონსტრუქციის პროექტზე ტენდერი გამოაცხადა. პროექტის სავარაუდო ღირებულება 65 963 611 ლარს შეადგენს.პროექტი ითვალისწინებს 220 კვ ელექტროგადამცემი ხაზების „ლიახვისა“ და „ურბნისის“ გაორჯაჭვიანებას, ასევე 220 კვ ელექტროგადამცემი ხაზის „ლომისის“ რეკონსტრუქციას. სატენდერო პირობების მიხედვით, გამარჯვებულმა კომპანიამ სამივე პროექტის სამშენებლო სამუშაოები ხელშეკრულების გაფორმებიდან 18 თვის ვადაში უნდა დაასრულოს.პროექტების განხორციელების შედეგად, შესაძლებელი გახდება შიდა ქართლში მშენებარე განახლებადი ენერგიის ობიექტების ელექტროგადამცემ ქსელში ინტეგრაცია და ქსელის გამტარუნარიანობის ზრდა.2027 წლისთვის დაგეგმილია განახლებადი ენერგიის წყაროების მიერ გამომუშავებული 260 მეგავატზე მეტი სიმძლავრის ქსელში ინტეგრაცია, ხოლო 2028 წლისთვის - დამატებით 110 მეგავატის მიერთება. საერთო ჯამში, 2030 წლისთვის დაგეგმილია 800 მგვტ სიმძლავრის ქსელთან დაკავშირება.განახლებადი ენერგიის წყაროების ქსელში ინტეგრაცია „საქართველოს სახელმწიფო ელექტროსისტემის“ ერთ-ერთი მთავარი პრიორიტეტია. პროექტების განხორციელება ხელს შეუწყობს ქვეყნის ენერგოსისტემის საიმედოობისა და მდგრადობის ზრდას და საქართველოს ენერგეტიკული უსაფრთხოების გაძლიერებას.