მომსახურების კომერციული ხარისხის ელექტრონული მონიტორინგის სისტემის ამოქმედების შემდეგ, კომუნალური კომპანიების მიერ მომხმარებლებისთვის გადახდილმა კომპენსაციამ 28.75 მილიონ ლარს გადააჭარბა. ამის შესახებ სემეკის მომსახურების კომერციული ხარისხის კონტროლის დეპარტამენტის დირექტორმა ანა ზარიძემ გადაცემა "ბიზნესპარტნიორში" განაცხადა.მისივე ინფორმაციით, ეს არ ნიშნავს, რომ მომსახურების ხარისხი დაბალია, რადგან გარანტირებული სტანდარტების 97% ვადაში სრულდება."მომსახურების ხარისხის კონტროლი მნიშვნელოვანია როგორც მომხმარებლებისთვის, ისე სემეკისთვის. მისი ეფექტიანი მონიტორინგისთვის სემეკმა შეიმუშავა ელექტრონული პლატფორმა, რომელიც რეალურ დროში აკონტროლებს მომხმარებლებზე გაწეული მომსახურების ხარისხს. როგორც კი მომხმარებელი დაწერს განაცხადს ინფორმაცია ავტომატურად ისახება ელექტრონულ ჟურნალში და მარეგულირებელს აქვს მყისიერი წვდომა მასზე. გარდა მომხმარებელთა მიმართვებისა, პროგრამაში იტვირთება წყვეტების შესახებ ინფორმაცია როგორც გეგმურ, ისე ავარიულ შეზღუდვებზე. ადრე თუ მომსახურების ხარისხის შეფასებას ვაკეთებდით საერთო სტატისტიკურ ინფორმაციაზე დაყრდნობით, დღეს უკვე თითოეულ მომსახურებას და წყვეტას რეალურ დროში ვაკონტროლებთ. ამან შესაძლებლობა მოგვცა, რომ მონიტორინგი უფრო ეფექტური და ზუსტი გახდეს. 2 ტიპის სტანდარტია დადგენილებით - ეს არის საერთო და გარანტირებული. საერთო სტანდარტი უყურებს კომპანიის მიერ გაწეული მომსახურების ხარისხს მთლიანობაში, ხოლო გარანტირებული სტანდარტები უკვე  ინდივიდუალურ მომხმარებლებზეა გათვლილი და აკვირდება ინდივიდუალური მომხმარებლისთვის გაწეულ კონკრეტულ მომსახურებას. რაც შეეხება სტანდარტების დარღვევას - აქაც, მნიშვნელოვანია რა სტანდარტი ირღვევა. პირობითად, თუ ვადაში არ შესრულდა გარანტირებული სტანდარტი კომპანიას აქვს ვალდებულება  მომხმარებელს გადაუხადოს წესებით განსაზღვრული კომპენსაცია. ამის ასახვა ხდება ავტომატურად და მომხმარებელს აღარ უწევს ქოლცენტრში დარეკვა. გასული წლის მაჩვენებლებზე დაყრდნობით დაახლოებით, 3 მლნ ლარზე მეტი კომპენსაციის გადახდა მოხდა, თუმცა ელექტრონული პლატფორმის ამოქმედების შემდეგ ეს რიცხვი საკმაოდ მსუყეა და ცდება 28 750 000 ლარს.მიუხედავად იმისა, რომ ძალიან დიდი მოცულობის კომპენსაციის გადახდა მოხდა - არ ნიშნავს, რომ  საქართველოში მომსახურების ხარისხი არის დაბალი. გარანტირებული სტანდარტების 97%-ს კომპანიები ვადაში ასრულებენ და სწორედ იმ 3%-ს ეკუთვნის ეს გადახდილი კომპენსაცია. გადახდილი კომპენსაციების 51% წყალმომარაგებაზე, 39% ელექტროენერგეტიკის და 10% ბუნებრივი გაზის. აქვე ხაზი მინდა გავუსვა იმას, რომ კომპენსაციების უმეტესი ნაწილი არის ქსელი მომსახურებების დარღვევების გამო და წყლის სექტორში იმდენად რთული სამუშაოების შესრულებაა საჭირო, რომ სამწუხაროდ, გარკვეულ შემთხვევებში ვერ ხერხდება ვადების დაცვა", - აცხადებს ანა ზარიძე.ცნობისთვის, სემეკი უკვე მე-8-ე წელია მომსახურების კომერციული ხარისხის ელექტრონული მონიტორინგის სისტემას იყენებს.

საქართველოს ენერგეტიკისა და წყალმომარაგების მარეგულირებელმა ეროვნულმა კომისიამ (სემეკ) მიმდინარე წელს  ელექტროენერგიის, ბუნებრივი გაზისა და სასმელი წყლის მომხმარებლებს კომუნალური კომპანიების მიერ უსაფუძვლოდ დარიცხული 213 049 ლარი ჩამოაწერა,  მათ შორის, ელექტროენერგეტიკის სექტორში - 83 456 ლარი, ბუნებრივი გაზის სექტორში -  29 310 ლარი, ხოლო  წყალმომარაგების სექტორში - 100 281 ლარი. მომხმარებლებს თანხები ჩამოეწერათ სემეკის დავებისა და სერვისების მართვის დეპარტამენტში შესული წერილობითი მიმართვების შესწავლის შედეგად, რომლებიც შეეხებოდა უსაფუძვლოდ დარიცხულ თანხებსა და ხანდაზმულ დავალიანებებს.სემეკი შეახსენებს ელექტროენერგიის, ბუნებრივი გაზის, წყალმომარაგებისა და საირიგაციო წყლის მომხმარებლებს, თუ ადგილი აქვს მათი უფლებების დარღვევას, მიმართონ სემეკის დავებისა და სერვისების მართვის დეპარტამენტს.კონსულტაციების მიღება შესაძლებელია როგორც  სემეკის ქოლცენტრში ნომერზე 16 216, ასევე სემეკის Facebook გვერდზე. სემეკისთვის განცხადებებით მიმართვა შესაძლებელია ელექტრონული ფორმით, ასევე, იუსტიციის სახლის მეშვეობით.

საქართველოს ტექნიკური უნივერსიტეტის ვიცე-რექტორის, თამარ წერეთლის ინფორმაციით, ენერგეტიკა ქვეყნის ეკონომიკის განვითარების ერთ-ერთი მნიშვნელოვანი მიმართულებაა.როგორც თამარ წერეთელი გადაცემა "ბიზნესპარტნიორში" განმარტავს, საქართველოს ტექნიკური უნივერსიტეტი სტუდენტებს სთავაზობს, როგორც ტრადიციული ენერგეტიკის მიმართულებით სასწავლო კურსებს, ასევე ენერგოეფექტურობისა და განახლებადი ენერგიის პროგრამებს. მისივე ცნობით, სტუდენტების მხრიდან ენერგეტიკის მიმართულებით მაღალი ინტერესი ფიქსირდება."საქართველოს ტექნიკური უნივერსიტეტის საინჟინრო სკოლის განვითარება მუდმივად ეფუძნება პრაქტიკაზე ორიენტირებულ სწავლებას. ჩვენი მიზანია ისეთი სპეციალისტები მოვამზადოთ, რომლებიც კონკურენტუნარიანები იქნებიან არა მხოლოდ საქართველოში, არამედ საერთაშორისო შრომის ბაზარზე. შესაბამისად, ძირითადი სტრატეგია, მათ შორის ენერგეტიკის ფაკულტეტის მიმართულებით ისეთი სასწავლო პროგრამების შეთავაზებაა, რომლებიც საერთაშორისო სტანდარტებს შეესაბამება და რაც ყველაზე მნიშვნელოვანია, პრაქტიკულ სწავლებაზეა დაფუძნებული. ასევე, დღეს მწვანე ენერგეტიკა განსაკუთრებულ მნიშვნელობას იძენს. საქართველოს ტექნიკური უნივერსიტეტის სასწავლო ლაბორატორიები აღჭურვილია თანამედროვე ტექნოლოგიებით, რათა სტუდენტებმა მიიღონ არა მხოლოდ თეორიული ცოდნა, არამედ პრაქტიკული გამოცდილებაც", - აცხადებს ტექნიკური უნივერსიტეტის ვიცე-რექტორი.ამასთან, თამარ წერეთელი სასწავლო დაწესებულებაში მიმდინარე პროცესებზეც საუბრობს და აღნიშნავს, რომ ამ ეტაპზე საინჟინრო მიმართულებით სასწავლო პროგრამების განახლებისა და აკრედიტაციის პროცესი მიმდინარეობს."განახლებული პროგრამების ფარგლებში სავალდებულო სტაჟირების კომპონენტის დამატება იგეგმება. სტუდენტები სტაჟირებას პარტნიორ კომპანიებში გაივლიან, რაც შესაძლებლობას მისცემთ, თეორიული ცოდნა პრაქტიკაში გამოიყენონ. ვფიქრობთ, ეს მნიშვნელოვანი სარგებლის მომტანი იქნება როგორც სტუდენტებისთვის, ასევე დამსაქმებლებისთვის.რაც შეეხება მიღებას, სტუდენტების მხრიდან ენერგეტიკის მიმართულებით მაღალი ინტერესი გვაქვს. ტექნიკურ უნივერსიტეტში ერთ-ერთი მნიშვნელოვანი სიახლეა, რომ "ელექტრული და ელექტრონული ინჟინერიის" პროგრამა საერთაშორისო აკრედიტაციის პროცესს გადის. დეკემბერში ამერიკელი ექსპერტების ვიზიტს ველოდებით - იმედია, პროგრამა ABET-ის აკრედიტაციას მიიღებს. რაც იმას ნიშნავს, რომ საქართველოს ტექნიკურ უნივერსიტეტს ექვსი პროგრამა ექნება, რომელიც ამერიკული საინჟინრო აკრედიტაციის სტანდარტებითაა აღიარებული", - ამბობს თამარ წერეთელი.აღნიშნულ საკითხზე გადაცემა "ბიზნესპარტნიორში"  საქართველოს ტექნიკური უნივერსიტეტის ენერგეტიკის ფაკულტეტის დეკანმა, ქეთევან ქუთათელაძემაც ისაუბრა.  მისი თქმით, ტექნიკურ უნივერსიტეტში ლაბორატორიების განვითარებისა და განახლებისთვის ბიზნესთან თანამშრომლობა კიდევ უფრო უნდა გაღრმავდეს."განსაკუთრებით მნიშვნელოვანია საინჟინრო და სამეცნიერო მიმართულებების განვითარება. ჩვენ შევისწავლეთ მსოფლიოს წამყვანი უნივერსიტეტების გამოცდილება, მათ შორის ლაბორატორიების განვითარებისა და განახლების მიმართულებით. ანალიზმა აჩვენა, რომ პროცესში ინდუსტრია აქტიურადაა ჩართული და დაფინანსების მნიშვნელოვანი ნაწილი დაახლოებით 20–25% სწორედ ბიზნესისა და სახელმწიფოს მხარდაჭერაზე მოდის. მსგავსი თანამშრომლობის გარეშე თანამედროვე ლაბორატორიების განვითარება და უახლესი სასწავლო პროგრამების დანერგვა რთულია. სწორედ ამიტომ გვინდა, ბიზნესთან თანამშრომლობა კიდევ უფრო გაღრმავდეს", - აცხადებს ქეთევან ქუთათელაძე.bp.ge 

სემეკის თავმჯდომარემ, დავით ნარმანიამ მონაწილეობა მიიღო საქართველოს ეკონომიკური ფორუმის 31-ე პანელურ დისკუსიაში - „წყლის რესურსები და სატარიფო პოლიტიკა, ურბანული განვითარება, ეკონომიკური ზრდა და მდგრადი განვითარების მიზნები”. ღონისძიება საქართველოს მთავრობის ადმინისტრაციის უფროსმა ლევან ჟორჟოლიანმა გახსნა.დავით ნარმანიამ ყურადღება გაამახვილა წყალმომარაგების სექტორების განვითარებისთვის სატარიფო რეგულირების მნიშვნელობაზე.“წყალმომარაგება კაპიტალტევადი დარგია, სექტორში მეტი ინვესტიცია ნიშნავს შემცირებულ ავარიულ გათიშვებსა და მოწესრიგებულ წყალმომარაგების ინფრასტრუქტურას.  Fitch-ისა და S&P Global-ის ანგარიშებში აღინიშნა, რომ წყალმომარაგების სექტორის განვითარებისთვის მნიშვნელოვანია სატარიფო გარემო იყოს ყოველთვის პროგნოზირებადი და ხარჯების ამსახველი რეალურ დროში. ყოველდღიური მონიტორინგის საფუძველზე, მარეგულირებელი კომისია სისტემატურად მუშაობს რეგულირების დახვეწასა და გაუმჯობესებაზე. ჩვენი მიზანია, რომ  წყალმომარაგების სექტორი გახდეს უფრო მეტად ეფექტიანი”, - აღნიშნა დავით ნარმანიამ.სემეკის თავმჯდომარესთან ერთად, ეკონომიკურ ფორუმში მონაწილეობდნენ საქართველოს გაერთიანებული წყალმომარაგების კომპანიის დირექტორი ბესიკ ჯიქურაული, Aqualia-ს რეგიონული დირექტორი ხოსე ენრიკე ბოფილი, თბილისის ვიცე-მერი გიორგი ტყემალაძე, თბილისის საკრებულოს თავმჯდომარე ზურაბ აბაშიძე, რუსთავის მერი ნინო ლაცაბიძე, “ჯივიპის” გენერალური დირექტორი ხოსე მიგელ სანტოსi.ღონისძიებას მოდერატორობას უწევდა „ბიზნეს ინსაიდერი საქართველოს“ და "საქართველოს ეკონომიკური ფორუმის" დამფუძნებელი და ხელმძღვანელი გიორგი აბაშიშვილი.დისკუსიის ფარგლებში მონაწილეებმა იმსჯელეს წყლის რესურსების ეფექტიანი მართვასა და ურბანული განვითარების თანამედროვე გამოწვევებსა და შესაძლებლობებზე, ეკონომიკური ზრდის მდგრადი მოდელის ჩამოყალიბებაზე, ინფრასტრუქტურული პროექტების როლზე ქვეყნის კონკურენტუნარიანობის გაძლიერებაში, გარემოსდაცვითი და სოციალური პასუხისმგებლობის ინტეგრაციაზე ეკონომიკურ პოლიტიკაში, სატარიფო პოლიტიკაზე, ასევე მდგრადი განვითარების მიზნების განხორციელების მიმართულებით საქართველოს პროგრესსა და სამომავლო პრიორიტეტებზე.ფორუმს ესწრებოდნენ საკანონმდებლო და აღმასრულებელი ხელისუფლების წარმომადგენლები, ბიზნეს სექტორი, ცალკეული კომპანიების ხელმძღვანელები, მფლობელები და პარტნიორები, აკადემიური და ანალიტიკური სექტორის წარმომადგენლები.

"დღეს ენერგეტიკულ პროექტებში საინვესტიციო ხარჯები მნიშვნელოვნად არის გაზრდილი. მაგალითად, თუ ადრე ჰესების შემთხვევაში ინვესტიციის ანაზღაურების მაჩვენებელი დაახლოებით 5%-ის ფარგლებში იყო, ახლა პროექტების ღირებულება საშუალოდ 25%-ით არის გაზრდილი" -  ამის შესახებ "ბიზნესპარტნიორის" ღამის ეთერში  მზის ენერგიის ასოციაციის თანადამფუძნებლმა თორნიკე დარჯანიამ განაცხადა.მისი თქმით, ერთ-ერთი მთავარი მიზეზი გლობალური ინფლაციაა."მნიშვნელოვნად გაძვირდა ფერადი ლითონები: სპილენძი, ალუმინი და სხვა მასალები, რომლებიც ენერგეტიკული ინფრასტრუქტურისთვის აუცილებელია. მხოლოდ სპილენძის ფასი ბოლო პერიოდში 20-30%-ით გაიზარდა და ზრდის ტენდენცია კვლავ ნარჩუნდება.გარდა ამისა, შეიცვალა საერთაშორისო სავაჭრო პოლიტიკაც. მაგალითად, ჩინეთმა მზის პანელების ექსპორტზე დამატებითი შეზღუდვები და გადასახადები დააწესა. ამას ემატება რეგიონში არსებული გეოპოლიტიკური ვითარება, მათ შორის ირანის მიმართულებით შექმნილი რისკები, რის გამოც ტრანსპორტირების ხარჯებიც დაახლოებით 20%-ით გაიზარდა. გაძვირებულია საწვავიც და, ფაქტობრივად, ყველა ძირითადი კომპონენტი, ბუნებრივია, ინვესტორი ამ ყველაფერს ითვალისწინებს", - ამბობს დარჯანია.მისივე თქმით, თუ სახელმწიფოს სურს, რომ ასეთი პროექტები განხორციელდეს, უნდა შექმნას შესაბამისი პირობები, რადგან ეს პროექტები ნიშნავს სამუშაო ადგილებს, ეკონომიკურ აქტივობას და ქვეყნის განვითარებას.BP.GE 

განახლებადი ენერგიის ასოციაციის აღმასრულებელი დირექტორის, მაია მელიქიძის შეფასებით, "მწვანე ენერგია" საქართველოს ეკონომიკისთვის დოვლათის მომტანი იქნება.როგორც მაია მელიქიძე გადაცემა "ბიზნესპარტნიორში" განმარტავს, ქვეყნისთვის მნიშვნელოვანია სატრანზიტო მიმართულების გაძლიერება, განსაკუთრებით იმ ფონზე, როდესაც მეზობელი სახელმწიფოები განახლებადი ენერგიის წყაროებიდან ელექტროენერგიის გენერაციას აქტიურად ავითარებენ."ენერგეტიკა იყო, არის და იქნება ჩვენი ქვეყნის ეკონომიკისთვის ერთ-ერთი ყველაზე მნიშვნელოვანი და სტრატეგიული საყრდენი. საქართველო არის ქვეყანა, რომელსაც ენერგეტიკული ჰაბის ფუნქცია აქვს, რადგან განახლებადი ენერგიის რესურსებით მდიდარია და ჰიდროენერგეტიკის განვითარების 100 წელზე მეტი ისტორია აქვს. აღნიშნულს ემატება მზისა და ქარის ენერგიის მიმართულებები, ასევე ბიოენერგეტიკის განვითარება. განსაკუთრებით საინტერესო იქნება სუფთა ენერგიის ექსპორტის შესაძლებლობა ევროპულ ბაზარზე.  საქართველომ ორი მნიშვნელოვანი ფუნქცია უნდა შეასრულოს - ერთი მხრივ, გახდეს ენერგიის მწარმოებელი და ექსპორტიორი ქვეყანა, ხოლო მეორე მხრივ, სატრანზიტო დერეფნის როლი ჰქონდეს", - აცხადებს ასოციაციის წარმომადგენელი.მაია მელიქიძე შავი ზღვის წყალქვეშა კაბელის საკითხსაც მიმოიხილავს და განმარტავს, რომ აღნიშნული პროექტი საქართველოს შესაძლებლობას მისცემს ე.წ. მწვანე ენერგია აწარმოოს და ევროპულ ბაზარზე გაიტანოს."ენერგეტიკული ბაზრების დივერსიფიკაცია აუცილებლად უნდა დავიწყოთ. ასევე მეორე მნიშვნელოვანი პროექტია "მწვანე ენერგიის დერეფანი" რომელიც ელექტროენერგიის ექსპორტს კიდევ უფრო გაზრდის. ამასთანავე, ელექტროენერგიის შემნახველი სისტემების განვითარებას ხელი მაქსიმალურად უნდა შევუწყოთ. ამ ეტაპზე საჭიროა შესაბამისი რეგულაციების შემუშავება, რომლებიც ჭარბად წარმოებული ელექტროენერგიის შენახვას ხელს შეუწყობს - საუბარია ენერგიის დამაგროვებლებზე, ბატარეებზე. კონკრეტულად ვსაუბრობ 200-მეგავატიან ქსნის ენერგოდამაგროვებელ პროექტზე, რომელსაც საქართველოს სახელმწიფო ელექტროსისტემა ახორციელებს, ხოლო პროექტის დამფინანსებელი აზიის განვითარების ბანკია", - აღნიშნავს განახლებადი ენერგიის ასოციაციის აღმასრულებელი დირექტორი.bp.ge 

“ჩვენი მთავრობა კვლავაც პრიორიტეტად მიიჩნევს ჰიდროენერგეტიკის გაფართოებას, ამასთანავე აჩქარებს ინვესტიციებს ქარისა და მზის ენერგიაში გამჭვირვალე და ინვესტორებისთვის მიმზიდველი მარეგულირებელი ჩარჩოს მეშვეობით“, - ამის შესახებ ეკონომიკისა და მდგრადი განვითარების მინისტრმა, მარიამ ქვრივიშვილმა „მწვანე ენერგიის განვითარებისა და გადაცემის სფეროში სტრატეგიული პარტნიორობის შესახებ“ შეთანხმების ფარგლებში მიმდინარე რიგით მე-12 მინისტერიალზე სიტყვით გამოსვლისას განაცხადა.მინისტრის განმარტებით, ქვეყნის ხელისუფლების მიზანია მნიშვნელოვნად გაზარდოს შიდა განახლებადი ელექტროენერგიის წარმოება, გააძლიეროს ენერგეტიკული უსაფრთხოება და შექმნას დამატებითი შესაძლებლობები რეგიონულ ენერგეტიკულ ბაზრებზე სუფთა ელექტროენერგიის მიწოდებისთვის. „მტკიცედ გვწამს, რომ „მწვანე ენერგიის დერეფანი“ მყარ საფუძველს ქმნის უფრო ღრმა რეგიონული თანამშრომლობისთვის, ურთიერთდაკავშირებადობისა და ჩვენი ენერგოსისტემების მეტი მედეგობისთვის. ის ასევე ასახავს ჩვენს საერთო ერთგულებას უფრო მდგრადი და უსაფრთხო ენერგეტიკული მომავლის მშენებლობის მიმართ. საქართველო მზად არის გააგრძელოს მჭიდრო თანამშრომლობა ყველა პარტნიორ ქვეყანასთან და დაინტერესებულ მხარესთან ამ მნიშვნელოვანი ინიციატივის წინ წასაწევად და ჩვენი ოთხმხრივი შეთანხმებით ნაკისრი ვალდებულებების სრულად შესასრულებლად“, - აღნიშნა მინისტრმა.

საქართველოს ენერგეტიკისა და წყალმომარაგების მარეგულირებელი ეროვნული კომისია (სემეკ) ეხმიანება გაზგამანაწილებელი კომპანიის შპს “მამედის” მიერ მარნეულის მუნიციპალიტეტის სოფელ ყიზილ-აჯლოს მოსახლეობისათვის გაგზავნილ სმს შეტყობინებას ბუნებრივი გაზის ტარიფთან დაკავშირებით.სემეკი აცხადებს, რომ შპს “მამედის” მიერ მოსახლეობისათვის გაგზავნილი სმს შეტყობინება, თითქოს მიმდინარე წლის 6 ივლისიდან ბუნებრივი გაზის გადასახადს მოსახლეობა მიიღებს კომერციული ტარიფით (1.29 ლარი/კუბ.მ) არის სრული სიცრუე და წარმოადგენს მოსახლეობის შეცდომაში შეყვანის მიზანმიმართულ მცდელობას.სოფელ ყიზილ-აჯლოს მოსახლეობა ბუნებრივი გაზის გადასახადს გადაიხდის სემეკის მიერ დადგენილი ტარიფით, 47 თეთრი.მ.კუბ (დღგ-ს ჩათვლით).სემეკი შეახსენებს დაინტერესებულ საზოგადოებას, შპს “მამედის” მიერ სალიცენზიო პირობების დარღვევის გამო, კომისიაში მიმდინარეობს საჯარო ადმინისტრაციული წარმოება შპს “მამედის” ბუნებრივი გაზის განაწილების ლიცენზიის გაუქმების თაობაზე. აქვე, სემეკი განმარტავს, რომ შპს “მამედის” ბუნებრივი გაზის განაწილების ლიცენზიის გაუქმება არ გამოიწვევს მოსახლეობისთვის ბუნებრივი გაზის მიწოდების შეფერხებას. მომხმარებლები ბუნებრივ გაზს მიიღებენ უწყვეტად, სემეკის მიერ მოსახლეობისათვის დადგენილი ტარიფით (47 თეთრი/კუბ.მ).გაზგამანაწილებელი კომპანიის “მამედის” ბუნებრივი გაზის განაწილების ლიცენზიის გაუქმების საფუძველია სალიცენზიო პირობების შეუსრულებლობა. კერძოდ,  შპს “მამედი” არ იხდიდა  შესყიდული გაზის დაგროვილ დავალიანებას. ამასთანავე, მიუხედავად სემეკის მიერ დადგენილი ტარიფისა,  შპს „მამედი“ მომხმარებლებს თვითნებურად არიცხავდა სემეკის მიერ დადგენილზე მაღალ ტარიფს (57 თეთრი/კუბ.მ  დღგ-ის ჩათვლით), რასთან დაკავშირებითაც მიმდინარეობს მოკვლევა შესაბამისი საგამოძიებო ორგანოების მიერ.

სემეკის მიერ დაფუძნებული ენერგეტიკის სასწავლო ცენტრის პროექტის -  „ელექტროენერგიის გზა დაბადებიდან ჩვენამდე“ ფარგლებში ქ. სენაკისა და ქ. ხობის საჯარო სკოლების მოსწავლეების მიერ ენერგეტიკის თემატიკაზე შექმნილი ნამუშევრების გამოფენა გაიმართა, სადაც გამარჯვებულები გამოვლინდნენ. გამარჯვებული ნამუშევრების ავტორებს პორტატული  და პლანშეტური კომპიუტერები გადაეცათ.დაჯილდოების ღონისძიება ქ. სენაკში, ტექნოპარკში გაიმართა, სადაც სემეკის თავმჯდომარემ დავით ნარმანიამ, სამეგრელო-ზემო სვანეთის სახელმწიფო რწმუნებულმა დავით ვერავამ, სენაკის მერმა ვახტანგ გადელიამ, სენაკის საკრებულოს თავმჯდომარემ ჯუმბერ ტყებუჩავამ დამსწრე საზოგადოებას სიტყვით მიმართეს და გამარჯვებულ მოსწავლეებს სერტიფიკატები და საჩუქრები გადასცეს. ღონისძიებაზე, საჯარო სკოლის მოსწავლეების ენერგეტიკის საკითხებზე ცნობიერების დონის ამაღლების აუცილებლობის შესახებ ისაუბრეს სემეკის აღმასრულებელმა დირექტორმა ელენე ლაგვილავამ, საქართველოს ტექნიკური უნივერსიტეტის ენერგეტიკის ფაკულტეტის დეკანმა ქეთევან ქუთათელაძემ, ენერგეტიკის სასწავლო ცენტრის დირექტორის მოადგილემ ნუგზარ ბერიძემ, სენაკისა და ხობის საგანმანათლებლო რესურსცენტრების ხელმძღვანელმა პირებმა.ენერგეტიკის სასწავლო ცენტრის მიერ სკოლის მოსწავლეებისათვის პროექტი  -  „ელექტროენერგიის გზა დაბადებიდან ჩვენამდე“ უკვე მესამედ განხორციელდა. პროექტის მიზანია ელექტროენერგიის წარმოებიდან მოხმარებამდე სრული ციკლის შესახებ სკოლის მოსწავლეების ინფორმირება, განახლებადი ენერგიების, საქართველოს მწვანე ენერგეტიკული პოტენციალის შესახებ მათი ცნობიერების დონის ამაღლება. პროექტის ფარგლებში მონაწილეებს ჩაუტარდათ ტრენინგები, მოეწყო მოსწავლეების მიერ შექმნილი თემატური ნამუშევრების გამოფენა და გამარჯვებული მოსწავლეებისთვის ერთკვირიანი საზაფხულო სკოლა გაიმართა.

ჩვენთვის ერთ-ერთი უმთავრესი პრიორიტეტია ეკონომიკური ზრდის მაღალი ტემპის შენარჩუნება, - ამის შესახებ საქართველოს პრემიერ-მინისტრმა ირაკლი კობახიძემ პარლამენტში ყოველწლიური მოხსენებით გამოსვლისას განაცხადა.მთავრობის მეთაურის თქმით, ამისთვის ძალიან მნიშვნელოვანი ეკონომიკური რეფორმები გატარდა.„განსაკუთრებული აქცენტი მინდა გავაკეთო სახელმწიფო საწარმოებში განხორციელებულ რეფორმებზე. დავიწყებ ენერგეტიკის სექტორით, სადაც განხორციელდა სექტორის გამოწვევების სრული ანალიზი და მომზადდა განვითარების 10-წლიანი გეგმა. ასევე დაინიცირდა ქსელის წესებში ცვლილება და მოწესრიგდა პროექტების გამჭვირვალედ მართვის პროცესი.  მთელი რიგი მანკიერი პრაქტიკები იყო ჩამოყალიბებული ენერგეტიკის სექტორში. აღმოიფხვრა მთლიანად გასული წლის განმავლობაში დაჯავშნილი დაერთების ნებართვების გაცემის ვადების გახანგრძლივების და ნებართვების გადაყიდვის ასეთი მანკიერი პრაქტიკები, რაც თვისობრივად დააჩქარებს ენერგეტიკის სექტორის განვითარებას.ასევე ძალიან მნიშვნელოვანი გადაწყვეტილება მიიღო მთავრობამ, როდესაც 157 კომპანიას პირობით ეპატია 1 მილიარდი ლარის ჯარიმები. ესეც დააჩქარებს ენერგეტიკის სექტორის განვითარებას. ენერგეტიკის სახელმწიფო საწარმოებში, ასეთი არსებითად 6 საწარმოა, განხორციელდა შტატების ოპტიმიზაცია, შედეგად ჩვენ ყოველწლიურად წლიურ ჭრილში გვეზოგება 24,7 მილიონი ლარი. მთლიანობაში ენერგეტიკის სახელმწიფო საწარმოებში გაუქმდა 979 საშტატო ერთეული. დანაზოგმა შეადგინა თითქმის 25 მილიონი ლარი.ასევე განხორციელდა შესყიდვების ოპტიმიზაცია და საკონტრაქტო ღირებულებების შემცირება და ამ ყველაფრის ხარჯზე ერთჯერადად დაიზოგა 348 მილიონი ლარი“, -  განაცხადა პრემიერ-მინისტრმა.