ენერგეტიკის სექტორში ევროპული კანონმდებლობის გადმოტანა საქართველოს ენერგეტიკული უსაფრთხოების ამაღლების, ენერგეტიკული სიღარიბის შემცირების და მომხმარებელთა უფლებების დაცვის გზა და საშუალებაა.  სწორედ ამ მიზნით, ქვეყანა უკვე რამდენიმე წელია, რაც ენერგეტიკული გაერთიანების წევრია, რომლის მთავარ მიზანს, სწორედ ევროკავშირის კანონმდებლობასთან ჰარმონიზაცია წარმოადგენს.უნდა აღინიშნოს, რომ ამ პროცესში საქართველომ უკვე წარმატებით შეასრულა მესამე ენერგეტიკული პაკეტის მიერ წამოყენებული მოთხოვნები. რაც შეეხება მეოთხე ენერგეტიკულ პაკეტს, აღნიშნულის კონცეფციაა „სუფთა ენერგია ყველა ევროპელისთვის“, რომლის შესრულებაც ასევე საქართველოს ვალდებულებაა.ენერგეტიკის სასწავლო ცენტრის საბჭოს წევრი სალომე ჯანელიძე აცხადებს, რომ სხვა მრავალ სიკეთესთან ერთად მეოთხე ენერგეტიკული პაკეტი მომხმარებელს სხვადასხვა შესაძლებლობას აძლევს. მათ შორის მნიშვნელოვანია ჭკვიანი მრიცხველების იმპლემეტაცია, რომლის საშუალებითაც ელექტროენერგიის მოხმარება უფრო მეტად ეფექტიანი გახდება.„მეოთხე ენერგეტიკული პაკეტის მიხედვით, მომხმარებელი უნდა იყოს უფრო მეტად ინფორმირებული და გაძლიერებული. ამის ერთ-ერთი საშუალება არის ჭკვიანი მრიცხველები. სწორედ ამ მრიცხველების საშუალებით მომხმარებელს აქვს იმის შესაძლებლობა, რომ მართოს ენერგიის მოხმარება, მოიხმაროს ის, როდესაც ენერგიის ფასი შედარებით მაღალია და პირიქით, როდესაც სისტემას სჭირდება, ამ შემთხვევაში შეზღუდოს მოხმარება და მიიღოს გარკვეული საფასური. თუ საუბარი გვაქვს მცირე მომხმარებლებზე, რა თქმა უნდა, ინდივიდუალურად საყოფაცხოვრებო მომხმარებელი დიდ გავლენას ვერ იქონიებს სისტემის მდგომარეობაზე. სწორედ ამიტომ აქ შემოდის ეგრეთ წოდებული აგრეგატორი, რომელიც აერთიანებს ათასობით მომხმარებელს. სწორედ მათი საშუალებით იცვლება ქცევა, რაც გავლენას ახდენს როგორც ელექტროენერგიის ეფექტიან მოხმარებაზე, ისე თავად მომხმარებლებზე“. - აღნიშნავს სალომე ჯანელიძე.აქვე იმასაც შეგახსენებთ, რომ საქართველო 2017 წლიდან energy community-ის წევრია. აღნიშნული წევრობისა და შემდგომში თანამშრომლობის ძირითადი მიზანია, ენერგეტიკულ სექტორში საქართველოს კანონმდებლობის ევროპულ კანონმდებლობასთან ჰარმონიზაცია.

“ენერგეტიკულ გაერთიანებაში გაწევრიანება საქართველოსთვის უდიდესი ნაბიჯია ევროკავშირისკენ მიმავალ გზაზე“ - ამის შესახებ ენერგეტიკის სასწავლო ცენტრის საბჭოს წევრმა სალომე ჯანელიძემ განაცხადა. მისივე თქმით, ენერგეტიკულ გაერთიანებაში საქართველოს შესაძლებლობას აძლევს იყოს მომზადებული ევროკავშირის კანონმდებლობასთან ჰარმონიზაციის მიმართულებით.„ენერგეტიკულ გაერთიანებაში გაწევრიანება იყო უდიდესი ნაბიჯი საქართველოსთვის, გამომდინარე იქიდან, რომ ეს ორგანიზაცია აერთიანებს იმ ქვეყნებს, რომლებსაც სურთ გახდნენ ევროკავშირის სრულფასოვანი წევრები. სწორედ ენერგეტიკული გაერთიანების მეშვეობით ხდება სექტორის მომზადება, შესაბამისი წესებისა თუ მოთხოვნების ტრანსპოზიცია, ბაზრების ლიბერალიზაცია და ამგვარად ქვეყანა ემზადება გახდეს ევროკავშირის წევრი, ასევე შეუერთდეს იმ ერთიან ბაზარს, რომელიც წარმოადგენს ევროკავშირის ერთ-ერთ მთავარ ღირებულებას.ჩვენი მთავარი მიზანია, რომ თანხვედრაში ვიყოთ იმ მოთხოვნებთან და პრინციპებთან, რაც ახასიეთებს ევროკავშირის ენერგეტიკულ ბაზრებს.  საქართველოს გაწევრიანება ენერგეტიკულ გაერთიანებაში მოხდა სპეციალური შეერთების ოქმის გაფორმებით, რომლის რატიფიცირება მოხდა 2017 წელს. სწორედ ამ ოქმში იყო აღწერილი თუ რა ვალდებულებები უნდა შეესრულებინა ქვეყანა და რა ვადაში. ეს ვადები ელექტროენერგეტიკის სფეროში იყო 2018 წლის ბოლომდე, ამ ვადაში საქართველოს საკუთარ კანონმდებლობაში უნდა გადმოეტანა ენერგეტიკასთან დაკავშირებული დირექტივები და რეგულაციები. აქვე აღვნიშნავ, რომ ენერგეტიკული ბაზრის ტესტირებისთვის ჩვენ გვქონდა დამატებით ერთი წელი.რაც შეეხება ბუნებრივ გაზს, აქ ქვეყანას უფრო მეტი დრო ჰქონდა, კერძოდ, 2020 წლის ბოლომდე უნდა მოგვეხდინა როგორც კანონმდებლობის გადმოტანა, ისე უშუალო იმპლემეტაცია“. - აცხადებს სალომე ჯანელიძე.ენერგეტიკის სასწავლო ცენტრის საბჭოს წევრი ასევე აცხადებს, რომ განვლილი წლების განმავლობაში ქვეყანამ მნიშვნელოვანი ნაბიჯები გადადგა ენერგეტიკული სექტორის ევროკავშირთან დაახლოებით, მათ შორის, საუბარია ერთიანი ენერგეტიკული ბაზრის არსებობაზე, მომხმარებელთა უფლებების დაცვასა და სისტემის ოპერატორების განცალკევებას.„მესამე ენერგეტიკული პაკეტი გულისხმობდა ელექტროენერგიის და ბუნებრივი გაზის დირექტივებსა და რეგულაციებს, რომელთა ძირითადი მიზანია, ხელი შეუწყონ ერთიანი ენერგეტიკული ბაზრების არსებობას ევროკავშირისა და ენერგეტიკული გაერთიანების მასშტაბით. მისი ძირითადი პრინციპებია, რა თქმა უნდა, ბაზრების ლიბერალიზაცია, სხვა სიტყვებით რომ ვთქვათ, ბაზრებზე არ უნდა ხდებოდეს ფასების რეგულირება. ასევე ძალიან მნიშვნელოვანი პრინციპია სისტემის ოპერატორების განცალკევება, რაც იმას გულისხმობს, არ შეიძლება საწარმო, რომელიც ერთის მხრივ აკონტროლებს წარმოების, ვაჭრობისა და მიწოდების საქმიანობას ამავდროულად არ უნდა აკონტროლებდეს განაწილებისა და გადაცემის საქმიანობებს.კიდევ ერთი საკითხია მომხმარებელთა უფლებების დაცვა. მესამე ენერგეტიკული პაკეტის მიზანი იყო, რომ უფრო მეტად გაძლიერებულიყო მომხმარებელი, ჰქონოდა უფრო მეტი კონტროლი საკუთარ არჩევანთან დაკავშირებით.გარდა ამისა, მესამე ენერგეტიკულ პაკეტში ყურადღება გამახვილებული იყო იმაზეც, რომ ყველა ქვეყანას უნდა ჰყავდეს დამოუკიდებელი მარეგულირებელი ორგანო ენერგეტიკის დარგში“. - აცხადებს სალომე ჯანელიძე.აქვე იმასაც შეგახსენებთ, რომ საქართველო 2017 წლიდან energy community-ის წევრია. აღნიშნული წევრობისა და შემდგომში თანამშრომლობის ძირითადი მიზანია, ენერგეტიკულ სექტორში საქართველოს კანონმდებლობის ევროპულ კანონმდებლობასთან ჰარმონიზაცია.

საქართველოს ენერგეტიკისა და წყალმომარაგების მარეგულირებელი ეროვნული კომისია გეგმავს სტატისტიკური პორტალის შექმნას, სადაც განთავსებული იქნება საჯაროდ ხელმისაწვდომი მონაცემები/ინფორმაცია საქართველოს ელექტროენერგეტიკის, ბუნებრივი გაზის, წყალმომარაგებისა და ირიგაციის სექტორების შესახებ.პორტალის შექმნის მიზანია კომისიაში თავმოყრილი საჯარო ინფორმაცია ყველა დაინტერესებული პირისათვის ხელმისაწვდომი იყოს მარტივად, დროულად და მოსახერხებელი ფორმატით.სტატისტიკური პორტალის პოტენციურ მომხმარებელთა სხვადასხვა ჯგუფის საჭიროებების, მოლოდინების, სტატისტიკური ინფორმაციის სახეებისა და პრიორიტეტების შესახებ ინფორმაციის მიღების მიზნით, შემუშავდა კითხვარი. გამოკითხვის შედეგები მაქსიმალურად იქნება გათვალისწინებული პორტალის შემუშავების პროცესში.გთხოვთ, შეავსოთ კითხვარი 2024 წლის 23 აპრილის ჩათვლით მითითებულ ბმულზე: https://forms.gle/myRQABDAEJY63Rpu6

საქართველოს ენერგეტიკისა და წყალმომარაგების მარეგულირებელი ეროვნული კომისია (სემეკ) რეგულირებად სექტორებში მოქმედ რეგულირებად კომპანიებში მარეგულირებელ აუდიტს ამკაცრებს. სემეკის გადაწყვეტილების შესაბამისად, გეგმურ მარეგულირებელ აუდიტთან ერთად სისტემატურად მოხდება არაგეგმური მარეგულირებელი აუდიტის განხორციელება, რაც გულისხმობს რეგულირებული კომპანიების ფინანსური და ტექნიკური მდგომარეობის, მათ მიერ განხორციელებული შესყიდვების მიზნობრიობის შესწავლას, დანახარჯების რეგულირებად საქმიანობასთან კავშირის/საჭიროების დადგენას, მიზანშეწონილობისა და გონივრულობის განსაზღვრას.სემეკში სპეციალური დეპარტამენტი შეიქმნა, რომლის ფუნქციებსაც სატარიფო მიზნებისათვის განსახორციელებელი დანახარჯების მარეგულირებელი აუდიტის პარალელურად წარმოადგენს წინასწარ განსაზღვრული კრიტერიუმების შესაბამისად, რეგულირებულ საწარმოთა ხარჯების შედარებითი ანალიზი.სემეკში შექმნილი მარეგულირებელი აუდიტის დეპარტამენტის ფუნქციებია ერთიანი საბუღალტრო-სააღრიცხვო სისტემის შემუშავება, დანერგვა და მონიტორინგი, ერთიანი საბუღალტრო-სააღრიცხვო სისტემის შესაბამისად კომპანიის მიერ წარმოდგენილი ანგარიშგებების შესწავლა და ანალიზი, დანახარჯების მარეგულირებელი აუდიტის წესის, სახელმძღვანელო ინსტრუქციების, სატარიფო განაცხადთან ერთად წარმოსადგენი დოკუმენტების ჩამონათვალის შემუშავება, აუდიტის გეგმის შემუშავება და აუდიტის პროცესის დაგეგმვა, კომპანიების მიერ წარმოდგენილი სატარიფო განაცხადებისა და თანდართული მასალების განხილვა და შესაბამისი დასკვნების მომზადება, საპროგნოზო სატარიფო დანახარჯების შესწავლა/ანალიზი და მიზანშეწონილი ოდენობის განსაზღვრა.

სემეკის საქმიანობის ერთ-ერთ მთავარ პრიორიტეტს მომხმარებელთა უფლებების დაცვა წარმოადგენს. აქედან გამომდინარე, მარეგულირებელი კომისია ყოველდღიურ რეჟიმში მუშაობს კომუნალური მომსახურებების გასაუმჯობესებლად. სემეკის რეგულაციები ორიენტირებულია მომხმარებელთა უფლებების დაცვასა და მომსახურების ხარისხის გაუმჯობესებაზე. შესაბამისად, მოქალაქეს, რომელიც თვლის, რომ კომუნალური მომსახურების კომპანიის მიერ დაირღვა მისი უფლება, შეუძლია მიმართოს სემეკს ან სემეკთან არსებულ ენერგოომბუდსმენის სამსახურს.სემეკის მიერ გამოქვეყნებული უახლესი ინფორმაციიდან ირკვევა, რომ მიმდინარე წლის 3 თვეში კომისიაში მომხმარებლების მხრიდან 723 განაცხადი შევიდა. ამ განცხადებების საფუძველზე სემეკმა მომხმარებლებს კომუნალური კომპანიების მიერ უსაფუძვლოდ დარიცხული თანხები ჩამოაწერა, რომელთა ჯამური ოდენობა 98 911 ლარს შეადგენს. უფრო დეტალურად, მომხმარებლისთვის 7 228 ლარის ჩამოწერა ბუნებრივი გაზის სექტორში მოხდა, 47 123 ლარის ელექტროენერგიის სექტორში, ხოლო სასმელი წყლის სექტორში ჩამოწერილი თანხების ჯამურმა ოდენობამ 44 559 ლარი შეადგინა. ასევე არ უნდა გამოგვრჩეს ჩამოწერილი ხანდაზმული დავალიანების ოდენობა, რომელი 4 615 ლარს შეადგენდა.როგორც სემეკის თავმჯდომარე დავით ნარმანია აცხადებს, კომისიაში მოქმედებს დავების განხილვის გამარტივებული წესი, რაც ხელს უწყობს მომხმარებელთა საჩივრებზე კომისიის სწრაფ რეაგირებას.„სემეკის ერთ-ერთი მთავარი მიზანია დაიცვას ბალანსი ელექტროენერგიის, ბუნებრივი გაზის, წყალმომარაგების კომპანიებსა და მომხმარებლებს შორის. მიუხედავად იმისა, რომ სემეკის მხრიდან მიმდინარეობს კომპანიების მუდმივი მონიტორინგი, ფიქსირდება მომხმარებელთა უფლებების დარღვევის ფაქტები, რაზეც კომისია მკაცრად რეაგირებს. კომისიაში მოქმედებს დავების განხილვის გამარტივებული წესი, რაც ხელს უწყობს მომხმარებელთა საჩივრებზე კომისიის სწრაფ რეაგირებას. სემეკის მიერ შემუშავებული და სექტორებში მოქმედი მარეგულირებელი წესები მკაფიოდ განსაზღვრავს როგორც კომპანიების, ასევე მომხმარებლების უფლება-მოვალეობებს. მნიშვნელოვანია, რომ მომხმარებელმა იცოდეს, თუ რა ხარისხისა და სტანდარტების მომსახურება უნდა მოითხოვოს კომუნალური კომპანიისგან“. - აცხადებს დავით ნარმანია.

ეკონომიკისა და მდგრდი განვითარების მინისტრის შეფასებით, ბოლო წლებში საქართველოში არსებული მაღალი ეკონომიკური ზრდის პროცესში კრიტიკულად მნიშვნელოვან როლს თამაშობს ენერგეტიკის დარგი, მეტი ადგილობრივი გენერაცია. ლევან დავითაშვილმა ენერგეტიკის კერძო სექტორის წარმომადგენლებთან შეხვედრაზე განაცხადა, რომ ეკონომიკური ზრდის პროპორციით ქვეყანაში ენერგომოხმარება იზრდება და ამას გენერაციის ობიექტების დამატება და ზოგადად, ქვეყანაში გენერაციის ზრდა უნდა მოჰყვებოდეს.„ასე რომ, ჩვენი პროგნოზებით, ჩვენ 20 მილიარდ კილოვატ საათამდე ენერგიის მოხმარება მოგვიწევს დაახლოებით 2030 წლისთვის, რაც ნიშნავს რომ მნიშვნელოვანი სიმძლავრეების დამატება მოგვიწევს გენერაციის კუთხით. საქართველოს საკუთარი რესურსების გათვალისწინებით, გააჩნია რესურსები სწორედ განახლებადი წყაროებიდან ენერგო მიმართულებით. ვფიქრობ, რომ ეს ადეკვატურია მსოფლიო ტენდენციების - მწვანე განახლებადი წყაროებიდან მივიღოთ ენერგორესურსები. ეს ჩვენი ევროინტეგრაციის პროცესშიც ეს ძალიან მნიშვნელოვანია“ - აღნიშნა ეკონომიკისა და მდგრადი განვითარების მინისტრმა.მისივე თქმით, გენერაციის განვითარების პარალელურად ქსელიც უნდა გაძლიერდეს, რაც გულისხმობს არამხოლოდ ქვეყნის შიდა გადაცემის ინფრასტრუქტურის გაძლიერებას, მნიშვნელოვანია ასევე ტრანსსასაზღვრო გადაცემის ინფრასტრუქტურის განვითარებაც. მისი განცხადებით, ასევე მნიშვნელოვანი პრიორიტეტია ევროპასთან პირდაპირ დაკავშირებადობა.„შავი ზღვისქვეშა მაღალი სიმძლავრის კაბელის პროექტი - ეს არის რეალობა, გეგმა, რომლის განხორციელებასაც ჩვენ გეგმაზომიერად მივყვებით. 2030 წლისთვის საკმაოდ რეალურია, რომ ქვეყანას ჰქონდეს პირდაპირი დაკავშირებადობა უმსხვილეს ევროპულ ბაზართან და არამხოლოდ ახლო სამეზობლოსთან, ქვეყანამ შეძლოს მათ შორის ადგილობრივი ელექტროენერგიის ექსპორტი. თუმცა, ჩვენ გვესმის, რომ მთელი რიგი დარგები უფრო მეტ ელექტროენერგია მოიხმარენ მომავალში, ენერგოსტრუქტურაც იცვლება და თავად მოხმარების სტრუქტურაც. გვესმის, რომ ციფრული განვითარების ეპოქაში ვცხოვრობთ და ეს ნიშნავს, რომ მეტ ციფრულ მონაცემს მეტი ელექტროენერგიის მოხმარება სჭირდება“ - განაცხადა ლევან დავითაშვილმა.ეკონომიკის სამინისტროს ცნობით, ენერგეტიკის დარგის აქტუალური საკითხების განხილვისა და პროცესების ეფექტიანად მართვის მიზნით, ლევან დავითაშვილის ინიციატივით, რეგულარულად გაიმართება შეხვედრები სექტორთან. ამ ფორმატში გარკვეული პერიოდულობით შედგება დიალოგი და მსჯელობა როგორც მიმდინარე, ისე სტრატეგიულ საკითხებზე.

პირველმა ვიცე-პრემიერმა, ეკონომიკისა და მდგრადი განვითარების მინისტრმა ენერგეტიკის კერძო სექტორთან შეხვედრა გამართა.ეკონომიკის სამინისტროს ცნობით, ლევან დავითაშვილმა თავის გამოსვლაში საქართველოში ენერგეტიკის დარგის განვითარების ხედვაზე, პოლიტიკასა და ამ პროცესში კერძო სექტორთან თანამშრომლობის მნიშვნელობაზე გააკეთა აქცენტი. მან დამსწრე საზოგადოებას გააცნო სექტორში არსებული სურათი, განვითარების დინამიკა, რეფორმების და მნიშვნელოვანი პროექტების მიმდინარეობის პროცესი, ასევე ისაუბრა დარგის განვითარების მხარდამჭერ მექანიზმებზე.„ჩვენთვის ძალიან მნიშვნელოვანია დიალოგი კერძო სექტორთან. მნიშვნელოვანია, რომ თქვენგან მუდმივად მოვისმინოთ ის მოსაზრებები, რომელიც შეიძლება აქტუალური იყოს ენერგეტიკის სფეროს განვითარების კუთხით. ბოლო წლებში ქვეყანაში ენერგეტიკის პრიორიტეტულობა გაიზარდა და ვხედავთ, რომ უკვე გასულ წელს და მიმდინარე წელს ასზე მეტი მეგავატი ახალი დადგმული სიმძლავრე ემატება ჩვენს ენერგეტიკულ სისტემას. სწრაფი ეკონომიკური ზრდის უზრუნველსაყოფად გვჭირდება კიდევ უფრო მეტი ადგილობრივი გენერაცია, ამიტომ საჭიროა კიდევ უფრო მეტად წავახალისოთ ენერგეტიკული დარგი“, - აღნიშნა პირველმა ვიცე-პრემიერმა.ეკონომიკის სამინისტროსა და ბიზნეს ასოციაციის თანამშრომლობით ორგანიზებულ ღონისძიებაში მონაწილეობა მიიღეს ენერგეტიკის სექტორში მომუშავე საჯარო უწყებების და კერძო ბიზნესების წარმომადგენლებმა, პროფილურმა არასამთავრობო ორგანიზაციებმა და საბანკო სექტორმა.

საქართველოში კონკურენციის პოლიტიკის გაძლიერების, სამართლებრივი აღსრულების გაუმჯობესების და საერთაშორისო, საუკეთესო პრაქტიკის გაზიარების მიზნით, საქართველოს კონკურენციისა და მომხმარებლის დაცვის სააგენტოს ინიციატივით, ეროვნული მარეგულირებელი უწყებების მონაწილეობით, მრგვალი მაგიდა გაიმართა. ღონისძიება გახსნეს და მონაწილეებს სიტყვით მიმართეს კონკურენციისა და მომხმარებლის დაცვის სააგენტოს თავმჯდომარემ, ირაკლი ლექვინაძემ, ეროვნული ბანკის პირველმა ვიცე-პრეზიდენტმა, პრეზიდენტის მოვალეობის შემსრულებელმა ნათია თურნავამ, სემეკის თავმჯდომარემ დავით ნარმანიამ, დაზღვევის სახელმწიფო ზედამხედველობის სამსახურის უფროსმა, დავით ონოფრიშვილმა და კომუნიკაციების კომისიის წევრმა ეკატერინე იმედაძემ.სემეკის თავმჯდომარემ დავით ნარმანიამ სიტყვით გამოსვლისას აღნიშნა, რომ კონკურენციის კანონმდებლობის რეფორმის შედეგად ძირეულად მოწესრიგდა საქართველოს კონკურენციისა და მომხმარებლის დაცვის სააგენტოსა და შესაბამის მარეგულირებელ ორგანოებს შორის კომპეტენციის გამიჯვნის საკითხები.„უნდა აღინიშნოს, რომ ენერგეტიკის სექტორში კონკურენციის კანონმდებლობის აღსრულების მიზნით განხორციელებული ინსტიტუციური და ნორმატიული ცვლილებები განსაკუთრებულ მნიშვნელობას იძენს ენერგეტიკული ბაზრის მიმდინარე რეფორმის ფონზე. ენერგეტიკული ბაზრის ლიბერალიზაცია მიზნად ისახავს ენერგეტიკულ ბაზარზე კონკურენციის გაზრდას და, ამ გზით, მომხმარებლების კეთილდღეობის უზრუნველყოფას, რაც შეუძლებელი იქნებოდა კონკურენციის მომწესრიგებელი, სრულყოფილი და ქმედითი საკანონმდებლო ბაზის არსებობის გარეშე“, -  აღნიშნა სემეკის თავმჯდომარემ.რეგულირებად სექტორებში, ადგილობრივ და საერთაშორისო დონეზე, კონკურენციის პოლიტიკის აღსრულების მექანიზმებზე მოხსენება წარადგინეს საქართველოს კონკურენციისა და მომხმარებლის დაცვის სააგენტოს იურიდიული დეპარტამენტის უფროსის მოადგილემ ირაკლი შაკიაშვილმა, ლიეტუვის კონკურენციის საბჭოს თავმჯდომარის მოადგილემ და საბჭოს წევრმა, მედეინა ავგუსტინავიჩიენემ და ავსტრიის კონკურენციის ფედერალური უწყების საქმის მკვლევარმა, ნორა შინდლერმა.ავსტრიის და ლიეტუვის მაგალითებზე დაყრდნობით, მონაწილეებმა იმსჯელეს - ენერგეტიკის, კომუნიკაციების, საფოსტო და საბანკო სექტორში მიმდინარე ტენდენციებზე, გამოწვევებზე, შესაძლებლობებზე და იმ შედეგებზე, რომელიც მარეგულირებელი უწყებებისთვის სტრატეგიულად მნიშვნელოვან საკითხებს წარმოადგენს. ეროვნული მარეგულირებელი უწყებების მონაწილეობით გამართული მრგვალი მაგიდა ევროკავშირის მიერ დაფინანსებული TWINNING-ის პროექტის მხარდაჭერით გაიმართა.

წყალმომარაგების სექტორი ქვეყნის ერთ-ერთ მნიშვნელოვან დარგს წარმოადგენს, რომელსაც სემეკი 2008 წლიდან არეგულირებს. მარეგულირებელი კომისიის ძირითად ფუნქციებში შედის წყალმომარაგების საქმიანობის ლიცენზიის გაცემა, წყალმომარაგების ლიცენზიატებისთვის ტარიფების დადგენა, მიწოდებისა და მოხმარების წესების დადგენა, საინვესტიციო პროექტების შეთანხმება, სალიცენზიო პირობების შესრულების მონიტორინგი და ა.შ.აღსანიშნავია ის გარემოება, რომ უკანასკნელი 5 წლის განმავლობაში სექტორის რეგულირების კუთხით მნიშვნელოვანი ნაბიჯები გადაიდგა. მათ შორის, აღსანიშნავია კომისიის 2020 წელს დამტკიცებული „ლიცენზირების წესებისა და ენერგეტიკული საქმიანობის თაობაზე შეტყობინების წესი“. შედეგად, ლიცენზიის ამღებ კომპანიებს დაეკისრათ ვალდებულებები, რომლებიც წყალმომარაგების უზრუნველსაყოფადაა საჭირო. თავის მხრივ, კომისია მუდმივ რეჟიმში ახორციელებს წყალმომარაგების ლიცენზიატი საწარმოების სალიცენზიო პირობების შესრულების მონიტორინგს, რომელიც ხორციელდება სხვადასხვა საშუალებით, მათ შორის, ლიცენზიატთა მიერ კომისიაში წარმოდგენილი ანგარიშგების ფორმების საფუძველზე. ეს პროცესი მნიშვნელოვანია, რათა კომპანიებმა არ გადაუხვიონ ლიცენზირების წესებს და მომხმარებელს ხარისხიანად მოემსახურონ.სექტორში გადადგმულ ერთ-ერთ მნიშვნელოვან ნაბიჯად ასევე უნდა ჩაითვალოს „წყალმომარაგების სექტორში ინვესტიციების შეფასების წესი“, რომლის ფარგლებშიც ლიცენზიანტი საწარმოები კომისიაში წარმოადგენენ გრძელვადიან და მოკლევადიან საინვესტიციო გეგმებს. ახალი ინვესტიციები სასიცოცხლოდ მნიშვნელოვანია, რადგან შესაძლებლობა ხდება როგორც ახალი მომხმარებლების სასმელი წყლით უზრუნველყოფა, ისე ხარისხის მაჩვენებლის უფრო მეტად გაზრდა, რაც გულისხმობს ავარიული გათიშვების მინიმუმადე დაყვანას. ცხადია ეს პროცესი ერთ დღეში არ ხდება, თუმცა იმის გათვალისწინებით, რომ წყალმომარაგების ლიცენზიანტმა კომპანიებმა უკვე დაიწყეს საინვესტიციო გეგმების შესრულება, გრძელვადიან პერიოდში შედეგიც აუცილებლად იქნება. ასე მაგალითად, წყალმომარაგების ლიცენზიატი საწარმოების მიერ თითოეული მომხმარებლისთვის სათანადო წესით წყალმომარაგების მომსახურებით უზრუნველყოფის მიზნით, არსებულის რეაბილიტაციისა და აგრეთვე ახალი ქსელის მშენებლობისა თუ აბონენტთა ინდივიდუალური გამრიცხველიანების კუთხით, წყალმომარაგების ორი მსხვილი ლიცენზიატი საწარმოს – შპს „ჯორჯიან უოთერ ენდ ფაუერისა“  და შპს „საქართველოს გაერთიანებული წყალმომარაგების კომპანიის“ მიერ 2022 წელს ფაქტობრივად განხორციელებულმა ინვესტიციამ ჯამში შეადგინა 293.8 მლნ ლარი, რაც 2021 წლის მაჩვენებლებს აღემატება.კიდევ ერთი მნიშვნელოვანი ნაბიჯი ტარიფების გაანგარიშების მეთოდოლოგიის ცვლილებაა. სატარიფო მეთოდოლოგია მიზნად ისახავს მომხმარებელთა დაცვას მონოპოლიური ფასებისაგან და ასევე უზრუნველყოფს ინვესტორების ინტერესების დაცვას, სტაბილური ფუნქციონირების, გაწეული გონივრული დანახარჯების ანაზღაურებისა და სამართლიანი მოგების მიღების შესაძლებლობას. აღნიშნული სატარიფო მეთოდოლოგიის საფუძველზე ტარიფები დგინდება 3 წლით. სატარიფო მეთოდოლოგია ითვალისწინებს ფაქტობრივად განხორციელებული ინვესტიციების შესაბამისად ტარიფების კორექტირებას მომდევნო სატარიფო რეგულირების პერიოდისათვის.აქვე შეგახსენებთ, რომ დღეის მდგომარეობით საქართველოში წყალმომარაგების სექტორში ოპერირებს წყალმომარაგების 8 ლიცენზიატი. წყალმომარაგების სექტორში მოქმედი ლიცენზიატებიდან 1 წარმოადგენს სახელმწიფო საკუთრებაში არსებულ საწარმოს, 5 - მუნიციპალურს და 2 - კერძო საკუთრებაში არსებულს. მოსახლეობის 68.1%-ის (2 მილიონ ადამიანზე მეტი) სასმელი წყლით წყალმომარაგებას უზრუნველყოფენ წყალმომარაგების ლიცენზიატი კომპანიები, ხოლო 31.9 %-ის (მილიონ ადამიანზე მეტი) წყალმომარაგებით უზრუნველყოფა ადგილობრივი თვითმმართველობის ერთეულების ვალდებულებას წარმოადგენს.

ეკონომიკისა და მდგრადი განვითარების მინისტრი აცხადებს, რომ ენერგეტიკაში მხარდაჭერის სქემების გაგრძელება აუცილებელია. ამის შესახებ მან პარლამენტში, “მინისტრის საათის” ფორმატში საუბრისას განაცხადა.„სიმძლავრის აუქციონში ჯამში, 1800 მეგავატზე მეტი მოცულობის პროექტების შესახებ განაცხადი მივიღეთ. ამიტომ, ჩვენ მიგვაჩნია, რომ ამ მხარდაჭერის სქემის გაგრძელება აუცილებელია, რადგან ვხედავთ, რომ დაინტერესება დიდია - იმისთვის, რომ უფრო სწრაფად და უფრო მეტი პროექტი განვახორციელოთ მომავალში“ - განაცხადა ლევან დავითაშვილმა.განახლებადი ენერგიების მხარდაჭერის სქემის ფარგლებში, მეორე აუქციონი 800 მგვტ სიმძლავრისთვის თებერვალში დასრულდა. ეკონომიკის სამინისტროს ცნობით, სიმძლავრის აუქციონის შესახებ დადგენილებისა და წესების მიხედვით, ამ ეტაპზე მიმდინარეობს აუქციონში შემოსული განაცხადების განხილვა.ამასთან, ლევან დავითაშვილის თქმით, ელექტროენერგიის მიწოდების უსაფრთხოების და გადამცემი ქსელის გაძლიერების მიზნით, მომდევნო წლებში საქართველოში დამატებით 1000 კმ-ზე მეტი ელექტროგადამცემი ხაზები აშენდება, მათ შორის, განმტკიცდება და გაძლიერდება მეზობელ ქვეყნებთან დამაკავშირებელი ხაზები."აქტიურ ფაზაშია შავი ზღვის წყალქვეშა ელექტროგადამცემი კაბელის პროექტიც. ამჟამად მიმდინარეობს მუშაობა პროექტის ტექნიკურ-ეკონომიკურ დასაბუთებაზე, რომელიც 2024 წლის ივლისისათვის დასრულდება. პარალელურად, სს „საქართველოს სახელმწიფო ელექტროსისტემა“ მუშაობს პროექტისთვის საჭირო გარემოს და სოციალური ზემოქმედების, ასევე, ზღვის ფსკერის გეოტექნიკური და გეოფიზიკური კვლევების ანგარიშის ჩასატარებლად მომსახურების შესყიდვაზე" - განაცხადა ეკონომიკის მინისტრმა.