ენერგეტიკის სასწავლო ცენტრი ელექტროენერგეტიკის რეგულირების საკითხებზე ახალ სასწავლო კურსს იწყებს

ენერგეტიკის სასწავლო ცენტრი ელექტროენერგეტიკის რეგულირების საკითხებზე ახალ სასწავლო კურსს იწყებს

საქართველოს ენერგეტიკისა და წყალმომარაგების მარეგულირებელ ეროვნულ კომისიასთან (სემეკ) არსებული ენერგეტიკის სასწავლო ცენტრი აცხადებს რეგისტრაციას სასწავლო კურსზე: „ელექტროენერგეტიკის რეგულირების მექანიზმები და პრაქტიკა“.  სასწავლო კურსის ავტორები  არიან  ცენტრის გუნდის წევრები, რომლებსაც გააჩნიათ შესაბამისი თეორიული ცოდნა და რეგულირების საკითხებზე მრავალწლიანი სამუშაო გამოცდილება.კურსი განკუთვნილია ელექტროენერგეტიკის სექტორში დასაქმებული სპეციალისტებისთვის,  უმაღლესი სასწავლებლის სტუდენტებისთვის, მკვლევრებისთვის და ყველა იმ დაინტერესებული პირისთვის, რომელთა პროფესიული ინტერესები მოიცავს ელექტროენერგეტიკის სექტორის რეგულირების საკანონმდებლო/სამართლებრივ,  ეკონომიკურ და ტექნიკურ ასპექტებს.კურსი მიზნად ისახავს ცოდნის გაღრმავებას ელექტროენერგეტიკის რეგულირების  მექანიზმების სხვადასხვა თეორიულ და პრაქტიკულ  საკითხებში. კურსის ფარგლებში დაგეგმილია გასვლითი ღონისძიებები.კურსის დასრულების შემდგომ, მონაწილეებს გადაეცემათ სერტიფიკატები და პრაქტიკული გზამკვლევი რეგულირების საკითხებზე.სასწავლო კურსზე რეგისტრაციის ბოლო ვადაა მიმდინარე წლის 25 აპრილი. დეტალური ინფორმაციისთვის ეწვიეთ ენერგეტიკის სასწავლო ცენტრის ვებგვერდს:

ვახტანგ ცინცაძე: შავი ზღვის წყალქვეშა კაბელი რეგიონის ენერგოუსაფრთხოებას გააძლიერებს

"შავი ზღვის წყალქვეშა კაბელის პროექტი უზრუნველყოფს საიმედო მარშრუტს საქართველოდან ევროპელ მომხმარებლებზე სუფთა, განახლებადი ელექტროენერგიის მიწოდებისთვის,"- ამის შესახებ  საქართველოს ეკონომიკისა და მდგრადი განვითარების მინისტრის მოადგილე ვახტანგ ცინცაძემ განაცხადა, რომელმაც მწვანე ენერგიის მრჩეველთა საბჭოს მე-3 მინისტერიალის სხდომაზე მიიღო მონაწილეობა.მისი თქმით, შავი ზღვის წყალქვეშა კაბელი უზრუნველყოფს რეგიონის ენერგოუსაფრთხოების გაძლიერებას და საქართველოში წარმოებული ელექტროენერგიის ექსპორტის ხელშეწყობას, ასევე გაამყარებს საქართველოს პოზიციებს ენერგეტიკული ტრანზიტის მიმართულებით.მინისტრის მოადგილის ინფორმაციით, საერთაშორისო კვლევის საფუძველზე დადგინდა, რომ პროექტი ტექნიკურ-ეკონომიკურად დასაბუთებულია. „შავი ზღვის კაბელის პროექტი შეტანილია ევროპის ელექტროენერგიის გადამცემი სისტემის ოპერატორების ქსელის (ENTSO-E) 2026 წლის ათწლიან განვითარების გეგმების პროექტების სიაში. რამდენიმე კვირის წინ ბრიუსელში, ევროკომისიის ენერგეტიკის გენერალურ დირექტორატში გაიმართა სამუშაო შეხვედრა შავი ზღვის კაბელის პროექტის განსახილველად, როგორც საერთო ინტერესის კანდიდატი პროექტისა (PMI),“ - აღნიშნა ვახტანგ ცინცაძემ.მისი თქმით, პროექტის წარმატებული განხორციელება მოითხოვს მჭიდრო კოორდინაციას, სტრატეგიულ ინვესტიციებს და ძლიერ პარტნიორობას. „საქართველო სრულ მზადყოფნაშია ითანამშრომლოს ჩვენს რეგიონულ და საერთაშორისო პარტნიორებთან ამ ინიციატივის განსახორციელებლად. შავი ზღვის წყალქვეშა კაბელის პროექტი, არის გლობალური ინვესტიცია სტრატეგიულ ინფრასტრუქტურაში. ეს არის ჩვენი საერთო ხედვა მდგრადი და ენერგეტიკულად უსაფრთხო მომავლისთვის,“ - აღნიშნა ვახტანგ ცინცაძემ.მინისტერიალის სხდომას საქართველოს მხრიდან ასევე დაესწრო საქართველოს სახელმწიფო ელექტროსისტემის დირექტორთა საბჭოს წევრი ზვიად გაჩეჩილაძე.

"ელექტროენერგიის გადამცემი ტრანსსასაზღვრო ინფრასტრუქტურის განვითარება საქართველოს სატრანზიტო პოტენციალს კიდევ უფრო გააძლიერებს"

აზერბაიჯანის, საქართველოს, თურქეთისა და ბულგარეთის ენერგეტიკის სამინისტროებს შორის მწვანე ელექტროენერგიის გადაცემისა და ვაჭრობის სფეროში თანამშრომლობის გაძლიერების შესახებ ურთიერთგაგების მემორანდუმი გაფორმდა, რომელსაც საქართველოს მხრიდან ხელი ეკონომიკისა და მდგრადი განვითარების მინისტრის მოადგილე ვახტანგ ცინცაძემ მოაწერა.ხელმოწერა აზერბაიჯანის დედაქალაქ ბაქოში გაიმართა. მემორანდუმი მიზნად ისახავს მწვანე ელექტროენერგიის გადაცემისა და ვაჭრობის სფეროში მხარეებს შორის ეკონომიკური, სამეცნიერო და ტექნიკური თანამშრომლობის განვითარებასა და გაძლიერებას ერთობლივი მწვანე ელექტროენერგიის პროექტების წახალისების, შესაბამისი ენერგეტიკული ინფრასტრუქტურის შექმნის, ცოდნისა და ტექნოლოგიების გაზიარების, ასევე, ურთიერთსასარგებლო ინიციატივების მხარდაჭერის გზით.როგორც ეკონომიკისა და მდგრადი განვითარების მინისტრის მოადგილე ვახტანგ ცინცაძემ განაცხადა, მემორანდუმზე ხელმოწერით კიდევ უფრო მეტად გაღრმავდება ოთხი ქვეყნის თანამშრომლობა ელექტროენერგიის ტრანსასაზღვრო ინფრასტრუქტურის სფეროში.„აღნიშნული სახმელეთო კორიდორის განვითარება კიდევ უფრო გააძლიერებს საქართველოს სატრანზიტო პოტენციალს და ხელს შეუწყობს ქვეყანაში წარმოებული ელექტროენერგიის ექსპორტს ალტერნატიული მარშრუტების მეშვეობით, ასევე გაზრდის ქვეყნის ენერგოუსაფრთხოებას და ენერგობაზრების დივერსიფიცირებას,“ - აღნიშნა მინისტრის მოადგილემ.მემორანდუმში ხაზგასმულია რეგიონული ენერგეტიკული უსაფრთხოებისა და კეთილდღეობის უზრუნველყოფისათვის ტრანსსასაზღვრო თანამშრომლობის მნიშვნელობა. მხარეებმა გამოთქვეს სურვილი, განახორციელონ ახალი ენერგეტიკული ინფრასტრუქტურული პროექტები და ხელი შეუწყონ მწვანე ელექტროენერგიის ვაჭრობას, როგორც მემორანდუმის მხარე ქვეყნებს შორის, ასევე, მეზობელ ქვეყნებთან.მემორანდუმის თანახმად, სამუშაო ჯგუფი ჩამოყალიბდება, რომელიც შეიმუშავებს თანამშრომლობის ერთობლივ გეგმებს და ზედამხედველობას გაუწევს მათ განხორციელებასა და ანალიზს.

ენერგეტიკის სასწავლო ცენტრში მიმდინარე პროექტის ფარგლებში ბათუმსა და ფოთში შეხვედრა გაიმართა

ბათუმისა და ქ. ფოთის საჯარო სკოლების ხელმძღვანელ პირებთან, რესურსცენტრების წარმომადგენლებთან ენერგეტიკის სასწავლო ცენტრის საბჭოს წევრებმა შეხვედრა გამართეს. შეხვედრის თემას წარმოადგენდა სკოლების მოსწავლეების ცნობიერების დონის ამაღლება სასმელი წყლის, გარემოს, შიდა ჰაერის დაბინძურებისა და კატასტროფების რისკის შემცირების საკითხებზე.ენერგეტიკის სასწავლო ცენტრის საბჭოს წევრმა, ელეონორა ლაგვილავამ შეხვედრის მონაწილეებს გააცნო გაეროს ბავშვთა ფონდის (UNICEF) მხარდაჭერით, სემეკთან არსებულ ენერგეტიკის სასწავლო ცენტრში მიმდინარე პროექტის „წყალი, გარემო და ჯანმრთელობა მოზარდების უსაფრთხო მომავლისათვის“ მიზნები და მნიშვნელობა. პროექტის ექსპერტმა, თემურ თორდინავამ ისაუბრა პროექტის ფარგლებში დაგეგმილ ღონისძიებებზე.პროექტის -  „წყალი, გარემო და ჯანმრთელობა მოზარდების უსაფრთხო მომავლისათვის“ მიზანია  საქართველოს სხვადასხვა რეგიონის სკოლების მოსწავლეების ცნობიერების დონის ამაღლება სასმელი წყლის, გარემოს, შიდა ჰაერის დაბინძურებისა და კატასტროფების რისკის შემცირების საკითხებზე. პროექტის ფარგლებში ყურადღება გამახვილდება გარემოს დაცვის საკითხებში ახალგაზრდების ჩართულობის ზრდის მექანიზმების განვითარების ხელშეწყობაზე, ამასთანავე მონაწილეებს მიეწოდებათ სიღრმისეული ინფორმაცია წყლის რესურსების რაციონალურად გამოყენებისა და დაცვის აუცილებლობის შესახებ.პროექტში მონაწილეობას მიიღებს ბათუმის, რუსთავის, ქუთაისისა და ფოთის ორმოცი სკოლის 650 მოსწავლე, ასევე ქუთაისისა და ბათუმის სახელმწიფო უნივერსიტეტების 50 სტუდენტი. პროექტის ფარგლებში მოსწავლე-ახალგაზრდებს ჩაუტარდებათ ტრენინგები და საჯარო ლექციები. ასევე, დაგეგმილია საინფორმაციო შეხვედრები მუნიციპალური ხელისუფლებისა და საბავშვო ბაღების წარმომადგენლებთან.პროექტის ხანგრძლივობაა 8 თვე.

ენერგეტიკის სასწავლო ცენტრში მიმდინარე პროექტის ფარგლებში რუსთავში შეხვედრა გაიმართა

გაეროს ბავშვთა ფონდის (UNICEF) მხარდაჭერით, სემეკთან არსებულ ენერგეტიკის სასწავლო ცენტრში მიმდინარე პროექტის „წყალი, გარემო და ჯანმრთელობა მოზარდების უსაფრთხო მომავლისათვის“ ფარგლებში ქ. რუსთავში შეხვედრა გაიმართა. შეხვედრას ესწრებოდნენ საჯარო სკოლების ხელმძღვანელი პირები, მასწავლებლები  და ენერგეტიკის სასწავლო ცენტრის წარმომადგენლები.ენერგეტიკის სასწავლო ცენტრის საბჭოს წევრმა, ელეონორა ლაგვილავამ  შეხვედრის მონაწილეებს მიაწოდა ინფორმაცია გაეროს ბავშვთა ფონდის (UNICEF)-ის მხარდაჭერით მიმდინარე პროექტის შესახებ. მან ყურადღება გაამახვილა მოსწავლე-ახალგაზრდობის ცნობიერების დონის ამაღლების აუცილებლობაზე. პროექტის ექსპერტმა, თემურ თორდინავამ შეხვედრის მონაწილეებს გააცნო პროექტის ფარგლებში დაგეგმილი ღონისძიებები.პროექტის -  „წყალი, გარემო და ჯანმრთელობა მოზარდების უსაფრთხო მომავლისათვის“ მიზანია  საქართველოს სხვადასხვა რეგიონის სკოლების მოსწავლეების ცნობიერების დონის ამაღლება სასმელი წყლის, გარემოს, შიდა ჰაერის დაბინძურებისა და კატასტროფების რისკის შემცირების საკითხებზე. პროექტის ფარგლებში ყურადღება გამახვილდება გარემოს დაცვის საკითხებში ახალგაზრდების ჩართულობის ზრდის მექანიზმების განვითარების ხელშეწყობაზე, ამასთანავე მონაწილეებს მიეწოდებათ სიღრმისეული ინფორმაცია წყლის რესურსების რაციონალურად გამოყენებისა და დაცვის აუცილებლობის შესახებ.პროექტში ჩართული იქნება ბათუმის, რუსთავის, ქუთაისისა და ფოთის ორმოცი სკოლის 650 მოსწავლე, ასევე ქუთაისისა და ბათუმის სახელმწიფო უნივერსიტეტების 50 სტუდენტი. პროექტის ფარგლებში მოსწავლე-ახალგაზრდებს ჩაუტარდებათ ტრენინგები და საჯარო ლექციები. ასევე, დაგეგმილია საინფორმაციო შეხვედრები მუნიციპალური ხელისუფლებისა და საბავშვო ბაღების წარმომადგენლებთან.პროექტის ხანგრძლივობაა 8 თვე.