დავით ნარმანიამ სემეკის 2024 წლის საქმიანობის ანგარიში ადამიანის უფლებათა დაცვისა და სამოქალაქო ინტეგრაციის კომიტეტის სხდომაზე წარადგინა

საქართველოს ენერგეტიკისა და წყალმომარაგების მარეგულირებელი ეროვნული კომისიის (სემეკ) თავმჯდომარემ, დავით ნარმანიამ საქართველოს პარლამენტის ადამიანის უფლებათა დაცვისა და სამოქალაქო ინტეგრაციის კომიტეტის სხდომაზე სემეკის 2024 წლის საქმიანობის ანგარიში წარადგინა.დავით ნარმანიამ პარლამენტის წევრებს მიაწოდა ინფორმაცია 2024 წელს დანერგილი გამარტივებული მომსახურებების,  მომხმარებელთა უფლებების დაცვის კუთხით შემუშავებული მექანიზმების, ელექტროენერგეტიკის, ბუნებრივი გაზის, წყალმომარაგებისა და მელიორაციის სექტორებში არსებული მდგომარეობისა და რეგულირების განვითარების მიზნით განხორციელებული პროექტების შესახებ.სემეკის თავმჯდომარის თქმით, 2024 წელს კომისია ინტენსიურად მუშაობდა როგორც რეგულირების გაუმჯობესების, ასევე მომხმარებელთა უფლებების დაცვის კუთხით.„2024 წლის განმავლობაში, მომხმარებელთა უფლებების დაცვის მიმართულებით კომისიამ განიხილა 3000-ზე მეტი განცხადება/საჩივარი. მათ შორის, ისეთი საჩივრები, რომლებიც შეეხებოდა კომუნალური კომპანიების მხრიდან უსაფუძვლო დარიცხვებს. სემეკის გადაწყვეტილებებით მომხმარებლებს ჩამოეწერათ 3 მილიონ ლარამდე უსაფუძვლოდ დარიცხული თანხები. გარდა ამისა, მომსახურების სტანდარტების დარღვევის გამო, მომხმარებლებისთვის დარიცხული კომპენსაციების ჯამმა 2,5 მილიონი ლარი შეადგინა“, - განაცხადა დავით ნარმანიამ.სემეკის თავმჯდომარემ ანგარიშის წარდგენისას აღნიშნა, რომ სხვა სიახლეებთან ერთად, 2024 წელს სემეკმა დანერგა ახალი რეგულაცია, რომელიც შეეხება მრავალბინიან საცხოვრებელ სახლებში  ცენტრალური გათბობის ერთიანი სისტემის განვითარებას.  მისივე თქმით, ამოქმედდა სტატისტიკის პორტალი, სადაც განთავსდა დეტალური ინფორმაცია როგორც ელექტროენერგიის მიწოდება-მოხმარების ფაქტობრივი ბალანსების, ასევე ნეტო აღრიცხვისა და ელექტროენერგიის საცალო მომხმარებლებზე მიწოდებული სტატისტიკური მონაცემების შესახებ.კომიტეტის მიერ სემეკის 2024 წლის საქმიანობის ანგარიშს დადებითი შეფასება მიეცა.

ლევან დავითაშვილი: სხვადასხვა მხარესთან შეჯერებული და ფართო კონსენსუსის საფუძველზე მიღებული ენერგეტიკული პოლიტიკა იქნება წარმატებული

„საქართველოს განახლებადი ენერგიების წყაროებიდან ელექტროენერგიის წარმოების მნიშვნელოვანი პოტენციალი გააჩნია, აღარაფერს ვამბობ ჰიდროენერგეტიკაზე, რომელიც  დომინანტია ჩვენს გენერაციაში. გარდა ამისა, ქარის და მზის სადგურები უფრო და უფრო პოპულარული ხდება საინვესტიციო კუთხით და ვფიქრობ, ჩვენს ქვეყანას, მეზობელ ქვეყნებთან შედარებით, რომლებიც ცდილობენ  უფრო მეტი მიზიდულობის ცენტრად იქცნენ და გახდენ ენერგორესურსების სავაჭრო ჰაბები, კიდევ უფრო მეტი შესაძლებლობა და პოტენციალი გააჩნია და ესეც მნიშვნელოვანია, რომ გამოვიყენოთ“ - ამის შესახებ ეკონომიკისა და მდგრადი განვითარების მინისტრმა ლევან დავითაშვილმა „საქართველოს ბანკის“ ორგანიზებით გამართულ კონფერენციაზე სიტყვით გამოსვლისას განაცხადა. ღონისძიებაზე სახელწოდებით  „ელექტროენერგიის ბაზარი საქართველოში“ წარმოდგენილი იყო საქართველოს ელექტროენერგიის ბაზრის კვლევა, გადამცემი ქსელის განვითარება, ბაზრის რეფორმის მიმოხილვა, კონფერენციის მონაწილეებმა ასევე განიხილეს ამ სექტორში არსებული აქტუალური საკითხები.ლევან დავითაშვილის შეფასებით, ეკონომიკის განვითარებაში ენერგეტიკის მიმართულება უმნიშვნელოვანესია, რადგან მისი სწორად განვითარების გარეშე ეკონომიკის კონკურენტუნარიანობაზე საუბარი ზედმეტია. პირველი ვიცე-პრემიერის თქმით, ენერგეტიკის სწორად, მდგრადად, გრძელვადიანად განვითარებისთვის ძალიან მნიშვნელოვანია  სხვადასხვა მხარის მოსმენა,  პოზიციების შეჯერება და ამის ასახვა ენერგეტიკულ პოლიტიკაში, რომელიც ფართო კონსენსუსის საფუძველზე იქნება მიღებული და მას ალტერნატივა არ გააჩნია. როგორც მინისტრმა აღნიშნა,  ყველა წარმატებული პოლიტიკა, რომელსაც ქვეყანა ახორციელებს, არის იმ შემთხვევაში წარმატებული, თუ ის გაზიარებულია სხვადასხვა მხარის მიერ და შეჯერებულია ძირითად აქტორებთან.ლევან დავითაშვილის ინფორმაციით, ამ შემთხვევაშიც, ენერგეტიკაში ბოლო წლებში ძირითადი ინვესტორები იყვნენ კერძო ადგილობრივი თუ უცხოური კომპანიები, მომავალშიც დიდია დაინტერესება კერძო ინვესტორების მხრიდან და შესაბამისად, მათთან გაზიარებული პოლიტიკა იქნება სწორი პოლიტიკა.ლევან დავითაშვილმა ხაზი გაუსვა ინფრასტრუქტურის განვითარების მნიშვნელობას გენერაციის ობიექტების წარმატებით განვითარებაში. მისი შეფასებით, აქ უმნიშვნელოვანესია  განვითარება და კოორდინირებული მოქმედებები სინქრონულად.„ეს კოორდინაცია გასაუმჯობესებელია მომავალში და ვფიქრობ, უფრო კოორდინირებული პოლიტიკით შევძლებთ განვავითაროთ ინფრასტრუქტურა  თანხვედრაში კერძო ინვესტორების საინვესტიციო გეგმებთან. ასევე გვესმის, რომ როცა ვსაუბრობთ განახლებადი წყაროებიდან ენერგოობიექტების ინტეგრაციაზე, ძალიან მნიშვნელოვანია ელექტროენერგიის შენახვის ინფრასტრუქტურა. ამ კუთხით მნიშვნელოვანი პროექტი აქვს საქართველოს სახელმწიფო ელექტროსისტემას - იგეგმება 200 მეგავატიანი ბატარეების შეძენა, რისთვისაც მიმდინარე წელს გამოვაცხადებთ ტენდერს. დაფინანსება მიღებულია აზიის განვითარების ბანკის მხრიდან, ამას წინ უძღოდა ორწლიანი კვლევითი სამუშაოები, რომელიც წარმატებით დასრულდა და ვფიქრობ, ეს იქნება მნიშვნელოვანი ელემენტი, რომელიც ხელს შეუწყობს სისტემის სტაბილურობას“ - განაცხადა პირველმა ვიცე-პრემიერმა.თავის გამოსვლაში ლევან დავითაშვილი ასევე შეეხო  საქართველოს გეოსტრატეგიული მდებარეობიდან გამომდინარე არსებულ შესაძლებლობებს, გახდეს მათ შორის, მონაცემთა  გაცვლის ერთ-ერთი მნიშვნელოვანი კვანძი. მინისტრის შეფასებით, ის შეიძლება იყოს ციფრული დერეფნის მნიშვნელოვანი ნაწილი, რომელიც აკავშირებს ევროპას და აზიას არამხოლოდ სატრანსპორტო,  არამედ ციფრული კუთხითაც. ლევან დავითაშვილის თქმით, გლობალურად ენერგოინტენსიური წარმოებების, დატა ცენტრების, ხელოვნური ინტელექტის ცენტრების, მრეწველობის ზრდის პირობებში ელექტროენერგიაზე მოხმარება სულ უფრო იზრდება, ხოლო ისეთი დარგები, როგორიც არის, მაგალითად,  ცემენტის წარმოება, ქიმიური მრეწველობა, ასევე ფოლადის წარმოება, იწყებენ მწვანე, განახლებადი ენერგიების გამოყენებას, რაც, მინისტრის აზრით,  მომავალში კიდევ უფრო აქტიური მიმართულება იქნება. მისივე განცხადებით,  მთელი რიგი ქვეყნები, მათ შორის, ევროკავშირი, ახალ რეგულაციებს და სავაჭრო წესებს აწესებენ, რომ ასეთი დარგები, მეტწილად, დამოკიდებული იყოს განახლებადი წყაროებიდან ენერგიის გამოყენებაზე და მნიშვნელოვანია, რომ საქართველოს განახლებადი ენერგიების წყაროებიდან ელექტროენერგიის წარმოების ძალიან მნიშვნელოვანი პოტენციალი გააჩნია.

"ენერგეტიკა არის ის სექტორი, რომელშიც მომავალში ასეულობით მილიონის ჩადება შეიძლება" - არჩილ გაჩეჩილაძე

ენერგეტიკა არის ის სექტორი, რომელშიც მომავალში ასეულობით მილიონის ჩადება შეიძლება. ამისთვის მნიშვნელოვანია, რომ ქსელი გამართული და მზარდი იყოს, - ამის შესახებ საქართველოს ბანკის გენერალურმა დირექტორმა, არჩილ გაჩეჩილაძემ ჟურნალისტებთან განაცხადა. მისივე შეფასებით, კერძო სექტორის მხრიდან აღნიშნული მიმართულებით აქტივობა საკმაოდ გაზრდილია. "ენერგეტიკა უმნიშვნელოვანესი სექტორია საქართველოს ეკონომიკის განვითარებისთვის. ეს არის ინფრასტრუქტურა და მას მიმაგრებული სხვადასხვა ინდივიდუალური პროექტი. ამ ინფრასტრუქტურას სჭირდება საკმაოდ დინამიური განვითარება და როგორც რეგულატორული, ისე სახელმწიფო სტრატეგიის კოორდინირება კერძოსთან.კერძო სექტორის მიმართულებით საკმაოდ დიდ აქტივობას ვხედავთ და ყველაფერი თუ წარმატებით დასრულდა 100 მილიონის დაფინანსებაა შესაძლებელი ამ სექტორში. 20-30%-იანი ზრდა შეიმჩნევა და აქტივობა ამ მიმართულების საკმაოდ დიდია. ზოგადად, საკრედიტო აქტივობა ქვეყანაში კარგია, 15-17%-ის ფარგლებშია წლიური ზრდა სექტორის, რაც მისასალმებელია. საბანკო სექტორის აქტიურობა, ზრდა და მომგებიანობა მთლიანად დამოკიდებულია ქვეყნის ეკონომიკურ აქტიურობაზე", - აცხადებს არჩილ გაჩეჩილაძე.bp.ge 

სემეკში მიკროსიმძლავრის ელექტროსადგურების საკითხზე სამუშაო შეხვედრა გაიმართა

საქართველოს ენერგეტიკისა და წყალმომარაგების მარეგულირებელ ეროვნულ კომისიაში (სემეკ) მიკროსიმძლავრის ელექტროსადგურების შესახებ სამუშაო შეხვედრა გაიმართა. შეხვედრას ესწრებოდნენ სემეკის თავმჯდომარე და კომისიის წევრები, განახლებადი ენერგიების კომპანიების წარმომადგენლები და დაინტერესებული პირები.შეხვედრის ფარგლებში გაიმართა მსჯელობა „ენერგეტიკისა და წყალმომარაგების შესახებ“ საქართველოს კანონში შესულ ცვლილებებსა და შესაბამისად სემეკის მიერ შემუშავებული ნორმატიული აქტის პროექტზე,  რომელიც შეეხება ელექტროენერგიის გამანაწილებელ ქსელზე მიერთებული მიკროსიმძლავრის ელექტროსადგურების ნეტო აღრიცხვის სისტემიდან ნეტო დარიცხვის სისტემაზე გადასვლის ვალდებულებას.ნეტო აღრიცხვის სისტემიდან ნეტო დარიცხვის სისტემაზე გადასვლას ითვალისწინებს ევროპის მეოთხე ენერგეტიკული პაკეტი, რომლის განხორციელების ვალდებულება განპირობებულია ასოცირების შესახებ შეთანხმებით და ენერგეტიკული გაერთიანების (Energy Community) დამფუძნებელ ხელშეკრულებასთან საქართველოს მიერთების ოქმით.შიდა ბაზრების დირექტივა (Directive (EU)2019/944) ითვალისწინებს ნეტო აღრიცხვიდან ნეტო დარიცხვაზე გადასვლის ვალდებულებას 2027 წლის პირველი იანვრიდან. შესაბამისად, სემეკს მიეცა უფლებამოსილება 2027 წლის 1 იანვრიდან დაადგინოს ახალი მექანიზმი. „ენერგეტიკისა და წყალმომარაგების შესახებ“ საქართველოს კანონით ასევე  განისაზღვრა, თუ რა პერიოდით ისარგებლებენ 2027 წლის 1 იანვრამდე გამანაწილებელ ქსელზე მიერთებული მიკროსიმძლავრის ელექტროსადგურები ნეტო აღრიცხვის სქემით.ენერგეტიკული გაერთიანების მიერ სემეკისთვის მოცემული რეკომენდაციებისა და განმარტების შესაბამისად, ნეტო აღრიცხვისგან განსხვავებით, რომელიც მომხმარებლებს აძლევს შესაძლებლობას გამოიყენონ ქსელში გადაცემული ჭარბი ელექტროენერგია მომავალი მოხმარებისთვის, ნეტო დარიცხვა გულისხმობს ქსელში მიწოდებული და მოხმარებული ელექტროენერგიის ცალკე-ცალკე აღრიცხვას. ნეტო დარიცხვის დროს, აქტიური მომხმარებლის მიერ ქსელში მიწოდებული ჭარბი ელექტროენერგია ფინანსურად ანაზღაურდება და კვტ/სთ ელექტროენერგია არ შეინახება კრედიტად მომავალი გამოყენებისთვის. ეს ნიშნავს, რომ აქტიური მომხმარებელი იღებს ანაზღაურებას გამომუშავებული და ქსელში მიწოდებული ელექტროენერგიისთვის და ამასთანავე იხდის ქსელიდან მოხმარებული ელექტროენერგიის ღირებულებას, როგორც ნებისმიერი სხვა საბოლოო მომხმარებელი.

ჩვენთვის უნგრეთთან თანამშრომლობა ყველა სფეროში მნიშვნელოვანია, მათ შორის, ენერგეტიკასა და სოფლის მეურნეობაში - ირაკლი კობახიძე

საქართველოსა და უნგრეთის პრემიერ-მინისტრების თანათავმჯდომარეობით ბუდაპეშტში საქართველო-უნგრეთის მთავრობათაშორისი კომისიის მეორე სხდომა გაიმართა.სხდომაზე, რომელშიც ორი ქვეყნის მინისტრთა კაბინეტის წევრები მონაწილეობდნენ, განიხილეს სექტორული კავშირების შემდგომი გაღრმავების კუთხით არსებული პოტენციალი. აღინიშნა თანამშრომლობის განვითარების მნიშვნელობა ისეთ  სფეროებში, როგორებიცაა ენერგეტიკა და დაკავშირებადობა, გარემოს დაცვა და სოფლის მეურნეობა, თავდაცვა, სამართალდაცვითი სფერო, იუსტიცია, ჯანდაცვა, განათლება და კულტურა.საქართველოს პრემიერ-მინისტრმა უნგრელ კოლეგას სამიტის ორგანიზებისა და ქართული დელეგაციის მასპინძლობისთვის მადლობა გადაუხადა.„ჩვენთვის სამაგალითოა თქვენი ლიდერობა, ის, თუ როგორ უძღვებით თქვენი ქვეყნის ხელმძღვანელობის საქმეს, როგორ ზრუნავთ უნგრეთისა და უნგრელი ხალხის ეროვნული ინტერესების, უნგრეთის იდენტობის დაცვაზე. ჩვენი გადმოსახედიდან ჩვენ გვაკავშირებს საერთო ღირებულებები და ეს ღირებულებითი ერთიანობა, ვფიქრობთ, არის ის, რაც აძლიერებს პარტნიორობას, მეგობრობას ჩვენს ქვეყნებსა და ხელისუფლებებს შორის.მე მინდა, ვისარგებლო შემთხვევით და გადაგიხადოთ განსაკუთრებული მადლობა საქართველოს ძალიან ძლიერი მხარდაჭერისთვის. პირველ რიგში, მადლობა იმისათვის, რომ მხარს უჭერთ ჩვენი ქვეყნის სუვერენიტეტსა და ტერიტორიულ მთლიანობას. ასევე განსაკუთრებული მადლობა მინდა გადაგიხადოთ საქართველოს ევროინტეგრაციის გზაზე თქვენი მხარდაჭერისთვის. როდესაც საქართველომ შეძლო კანდიდატის სტატუსის მიღება, ამაში თქვენი დამსახურება იყო განსაკუთრებული და დღესაც, როდესაც ვაგრძელებთ ჩვენს გზას ევროკავშირის მიმართულებით, ჩვენი ქვეყნისა და ქართველი ხალხისთვის თქვენს მხარდაჭერას ენიჭება უდიდესი მნიშვნელობა. ჩვენთვის ძალიან მნიშვნელოვანია ორმხრივი თანამშრომლობის განვითარება უნგრეთსა და საქართველოს შორის“, - განაცხადა ირაკლი კობახიძემ.საქართველოს პრემიერ-მინისტრმა აღნიშნა, რომ მაღალი დონის პოლიტიკურ ურთიერთობებთან ერთად, მნიშვნელოვანია სავაჭრო-ეკონომიკური კავშირების კიდევ უფრო გაღრმავება. მთავრობის მეთაურის შეფასებით, ამ მიმართულებითაც კარგი დინამიკა არსებობს, თუმცა რესურსი კიდევ უფრო მეტია.„ჩვენს ინტერესებშია, რომ მაქსიმუმი გავაკეთოთ ამ პოტენციალის მაქსიმალურად ასათვისებლად. ვფიქრობთ, რომ ჩვენს ქვეყნებს შორის სავაჭრო-ეკონომიკური ურთიერთობების განვითარებას აქვს ძალიან დიდი პოტენციალი. ძალიან მნიშვნელოვანია ჩვენთვის დარგობრივი თანამშრომლობის გაღრმავება. ჩვენთვის ყველა სფეროში საინტერესოა თანამშრომლობა - ისეთ სფეროებში, როგორებიცაა ენერგეტიკა, დაკავშირებადობა, გარემოს დაცვა, სოფლის მეურნეობა, განათლება, კულტურა, სამართალდამცავი სფერო, იუსტიცია, ჯანდაცვა. ყველა მიმართულებით ვართ ძალიან დაინტერესებულები, რომ კიდევ უფრო მეტად გავაღრმაოთ თანამშრომლობა. ამისთვის ძალიან მნიშვნელოვანია, რომ ჩვენი ორმხრივი კომისიის დარგობრივი ფორმატებიც კიდევ უფრო მეტად განვითარდეს. მოხარულები ვართ, რომ ვითარდება სამართლებრივი ჩარჩო, რომელიც დაკავშირებულია ჩვენს ქვეყნებს შორის პარტნიორობასთან და ამ მიმართულებითაც მზად ვართ მაქსიმალური თანამშრომლობისთვის. თქვენს მხარდაჭერას ჩვენი ქვეყნისთვის ძალიან დიდი მნიშვნელობა აქვს“, - აღნიშნა ირაკლი კობახიძემ.მთავრობათაშორისი სამიტის ფორმატის მნიშვნელობაზე გაამახვილა ყურადღება უნგრეთის პრემიერ-მინისტრმა. ვიქტორ ორბანმა აღნიშნა, რომ მსგავსი მჭიდრო თანამშრომლობა უნგრეთს სულ რამდენიმე ქვეყანასთან აკავშირებს.„ამ ფორმატში განვიხილავთ სხვადასხვა სამინისტროს შორის თანამშრომლობის საკითხებს და ეს არის იმის ნიშანი, რომ არა ცალკეული სამინისტროები, არამედ მთლიანად, მთელი მთავრობა თანამშრომლობს ჩვენს მთავრობასთან. ეს არის იშვიათი მოვლენა ჩვენს პრაქტიკაში და მინდა ვთქვა, რომ საქართველოსთან, თქვენთან თანამშრომლობა, ბატონო პრემიერ-მინისტრო, ჩვენთვის ძალიან დიდი პატივია - უპირველეს ყოვლისა იმიტომ, რომ უნგრელები პატივს სცემენ ისტორიას და თქვენ გაქვთ საოცარი ისტორია. თქვენი ქრისტიანული ისტორია გაცილებით დიდია, ვიდრე ჩვენი. ძალიან დიდი პატივია თქვენთან თანამშრომლობა, რამდენადაც ორივე ქვეყანას გვიყვარს თავისუფლება. მიყვარს სამშობლო, ვარ ჩემი ქვეყნით ამაყი  - ასეთი ფრაზები უკვე სირცხვილად ითვლება დასავლეთში და აღარ გამოიყენება, მაგრამ ჩვენ მაინც გვიყვარს ამ სიტყვების თქმა და სიამოვნებით ვმასპინძლობთ სტუმრებს, რომლებსაც ასეთივე გრძნობები და სენტიმენტები გააჩნიათ ამ ფრაზების მიმართ. თქვენი ვიზიტი არის ჩვენთვის დიდი პრივილეგია იმ შედეგების გამო, რომლებიც გაქვთ ქვეყანაში. ევროპული ეკონომიკა ახლა ძალიან ზიანდება. თუ ვინმეს აქვს 1%-ზე მეტი ეკონომიკური ზრდა, ეს არის დიდი მიღწევა. აქედან გამომდინარე, თქვენი 7%-იანი ზრდა არის გალაქტიკური მოვლენა. ვიცი, რომ ეს ნამდვილად არის თქვენი ძალისხმევის უდიდესი შედეგი. ყოველთვის დიდი პატივია მოგესალმოთ და გიმასპინძლოთ უნგრეთში“,  - აღნიშნა ვიქტორ ორბანმა.საქართველო-უნგრეთის მთავრობათაშორისი სამიტის ფარგლებში გაფორმდა შეთანხმებები ორ ქვეყანას შორის გარემოს დაცვისა და სოფლის მეურნეობის, ინოვაციებისა და სპორტის სფეროებში თანამშრომლობის შესახებ. დოკუმენტებს ორი ქვეყნის მინისტრთა კაბინეტის წევრებმა მოაწერეს ხელი. ორი ქვეყნის პრემიერ-მინისტრებმა ხელი მოაწერეს საქართველო-უნგრეთის მე-2 მთავრობათაშორისი სამიტის დეკლარაციას.