სამხრეთ კორეულ კომპანიას თურქეთში ოთხი ბირთვული რეაქტორის აშენება სურს

კორეის ელექტროენერგეტიკული კორპორაციის (KEPCO) გენერალურმა დირექტორმა ჩუნგ სუნგ ილმა თურქეთის ენერგეტიკისა და ბუნებრივი რესურსების მინისტრს ფატიჰ დონმეზს წარუდგინა წინასწარი განაცხადი ქვეყანაში ოთხი ატომური რეაქტორის მშენებლობის შესახებ. პროექტის ჯამური საინვესტიციო ღირებულება 30 მლრდ დოლარზე მეტია. აღნიშნულის შესახებ ინფორმაციას Yonhap ავრცელებს.

სამხრეთ კორეის მხარის მიერ შედგენილ დოკუმენტაციაში დეტალურადაა გაწერილი პროექტის დეტალური გეგმა. KEPCO გეგმავს, რომ მიმდინარე წელს ობიექტის მშენებლობის ტექნიკურ-ეკონომიკური დასაბუთების მომზადება დაიწყოს და ხელშეკრულებაც გააფორმოს.

როგორც უცხოური მედია წერს, სამხრეთ კორეის კომპანიამ თურქეთის მთავრობასთან, ქვეყნის ჩრდილოეთით, ატომური ელექტროსადგურის მშენებლობაზე მოლაპარაკებები 2022 წელს დაიწყო. პროექტის მიხედვით, რეაქტორები 1400 მეგავატ ელექტროენერგიას გამოიმუშავებენ.

წყარო: commersant.ge