“ინტერ რაომ” საქართველოში არსებული აქტივები მაღალ ფასად გაყიდა

რუსულმა კომპანია „ინტერ რაომ“ საქართველოში საკუთარი აქტივები საბალანსო ღირებულებაზე გაცილებით უფრო მაღალ ფასად გაყიდა.  ამის შესახებ კომპანიის მმართველი საბჭოს წევრმა ილნარ მირსიაპოვმა ჟურნალისტებს განუცხადა.

„მიღწეული შეთანხმებით, გარკვეული პერიოდის განმავლობაში ინფორმაციის გასაჯაროების უფლება არ გვაქვს, მაგრამ შემიძლია გითხრათ, რომ გარიგება ბევრად აღემატება აქტივების საბალანსო ღირებულებას და ჩვენი აქციონერებისთვის ძალზე ეფექტურია“, – განაცხადა მირსიაპოვმა.

2 ივნისს ცნობილი გახდა, რომ რუსულმა ენერგოჰოლდინგმა „ინტერ რაო“-მ კომპანია „მტკვარი ენერგეტიკა“-ს აქციების 100% გაყიდა. „მტკვარი ენერგეტიკა“-ს ახალი მფლობელი „საერთაშორისო ინვესტორთა კონსორციუმი“ დასახელდა.

მაშინ ილნარ მირსიაპოვმა განაცხადა, ჰოლდინგის გრძელვადიანი სტრატეგია ბიზნესის განვითარებას რუსეთის ტერიტორიაზე ითვალისწინებს, თუმცა კომპანია საქართველოში მუშაობის შეწყვეტას არ გეგმავს.

საქართველოში „ინტერ რაო“ სტრატეგიულ ობიექტებს, მათ შორის სს „თელასს“, „ხრამჰესი 1“ -სა და „ხრამჰესი 2“-ს ფლობს.

Leave a Reply

Menu Title