კასპიის ბიზნეს ფორუმზე ენერგეტიკული რესურსების ტრანზიტის საკითხები განიხილეს

კასპიის ბიზნეს ფორუმზე რომელზეც შუა დერეფნის მეშვეობით კასპიის რეგიონის ენერგეტიკული რესურსების ტრანზიტის საკითხები განიხილეს.„საქართველო აფართოებს თავის, როგორც სატრანზიტო ქვეყნის, როლს არა მხოლოდ ნახშირწყალბადების ტრანზიტის მიმართულებით, არამედ ელექტროენერგიის გადაცემის კუთხითაც. კერძოდ, საქართველოს აქვს შესაძლებლობა, უშუალოდ დაუკავშირდეს ევროპულ ენერგოსისტემებს დაგეგმილი შავი ზღვის წყალქვეშა კაბელის მეშვეობით,“ - განაცხადა ეკონომიკისა და მდგრადი განვითარების სამინისტროს ენერგეტიკული პოლიტიკისა და საინვესტიციო პროექტების დეპარტამენტის უფროსმა ჯუბო ტურაშვილმა კასპიის ბიზნეს ფორუმზე გამოსვლისას, რომელიც აშშ -ში, ქალაქ ნიუ-იორკში გაიმართა.ეკონომიკისა და მდგრადი განვითარების სამინისტროს წარმომადგენელმა ყურადღება გაამახვილა საქართველოს სტრატეგიული მდებარეობაზე და აღნიშნა, რომ საქართველო მზად არის, მნიშვნელოვანი წვლილი შეიტანოს ევროპის ენერგეტიკულ უსაფრთხოებაში.„საქართველო საიმედო სატრანზიტო პარტნიორი ქვეყანაა. მისი მიზანია, კიდევ უფრო გააძლიეროს საკუთარი სატრანზიტო ფუნქცია მომავალში. ქვეყანა სამხრეთ კავკასიის მასშტაბით უწყვეტი და უსაფრთხო ტრანზიტის უზრუნველყოფის ჯაჭვის მნიშვნელოვანი ნაწილია, რაც ხელს უწყობს ევროკავშირის ენერგეტიკულ უსაფრთხოებას  წყაროებისა და მარშრუტების დივერსიფიკაციით,“ - აღნიშნა ჯუბო ტურაშვილმა.თავის გამოსვლაში, ეკონომიკის სამინისტროს ენერგეტიკული პოლიტიკისა და საინვესტიციო პროექტების დეპარტამენტის ხელმძღვანელმა დეტალურად ისაუბრა უკვე არსებულ სატრანზიტო მიმართულებებზე, მათ შორის, სამხრეთის გაზის დერეფანზე, რომლის გაფართოება მნიშვნელოვანი მამოძრავებელი ძალაა ევროკავშირისთვის, რათა გაიზარდოს გაზის მიწოდების დივერსიფიკაცია და ენერგომომარაგების მთლიანი უსაფრთხოება. მან ასევე ყურადღება გაამახვილა ცენტრალური აზიიდან ნავთობის სატრანზიტო ნაკადების შუა დერეფანში მოზიდვის შესაძლებლობებზე.ფორუმის მონაწილეებს შორის დიდი ინტერესი გამოიწვია შავი ზღვის წყალქვეშა კაბელის პროექტის მიმდინარეობამ.„ეს არის ფლაგმანი პროექტი რეგიონში, რომელიც მიზნად ისახავს რეგიონული დაკავშირებულობის გაძლიერებას. საქართველოსა და რუმინეთის ელექტროსისტემების დამაკავშირებელი კაბელი საშუალებას მისცემს საქართველოში და მთლიანად რეგიონში წარმოებული მწვანე ენერგიის ევროპულ ბაზრებზე გატანას. ეს პროექტი მნიშვნელოვნად გაზრდის ელექტროენერგიის გაცვლის შესაძლებლობებს სამხრეთ კავკასიასა და ევროპას შორის. მას აქვს დიდი პოტენციალი, ხელი შეუწყოს განახლებადი ენერგიის წყაროების განვითარებას საქართველოში და უფრო ფართო რეგიონში,“ - აღნიშნა ჯუბო ტურაშვილმა.მისი თქმით, ელექტროენერგიის ბაზრის გაფართოება ევროპისკენ წაახალისებს ინვესტიციებს წარმოებისა და გადაცემის ინფრასტრუქტურაში, ხელს შეუწყობს სამუშაო ადგილების შექმნას მშენებლობასა და მოვლა-პატრონობაში და ამით ხელს შეუწყობს ეკონომიკურ ზრდას.

იუსტიციის სახლში გადატანილ კომუნალურ სერვისებზე მიმართვიანობა გაიზარდა

იუსტიციის სახლში ელექტროენერგიის, ბუნებრივი გაზისა და წყალმომარაგების სერვისებით, საქართველოს მასშტაბით,  74 418 მოქალაქემ ისარგებლა. გასული წლის მონაცემებთან შედარებით, კომუნალურ სერვისებზე იუსტიციის სახლში მოქალაქეთა მიმართვიანობა თითქმის ორჯერ არის გაზრდილი.იუსტიციის სახლში გადატანილი კომუნალური სერვისებით მოქალაქეთა დაინტერესების მაჩვენებლებს სემეკის თავმჯდომარე დავით ნარმანია და იუსტიციის სახლის თავმჯდომარე ლაშა ლობჯანიძე გაეცნენ.სემეკისა და იუსტიციის სახლის ერთობლივი პროექტის ფარგლებში, რომელიც მოქალაქეებისთვის უფრო ხელმისაწვდომს ხდის კომუნალურ სერვისებს, განაცხადების ჩაბარება ერთ სივრცეშია შესაძლებელი. კერძოდ, ელექტროენერგიის, ბუნებრივი გაზისა და წყალმომარაგების მომხმარებლებს შეუძლიათ იუსტიციის სახლის ნებისმიერ ფილიალში ჩააბარონ განაცხადი კომუნალური კომპანიის სახელზე - დარეგისტრირდნენ ელექტროენერგიის, ბუნებრივი გაზისა და წყალმომარაგების აბონენტებად, კომპანიებთან გააფორმონ მომსახურების მიწოდების ხელშეკრულება, გადაამოწმონ კომუნალური დავალიანება, დააფიქსირონ მომარაგების პრობლემა, მოითხოვონ მომარაგების შეწყვეტა და აღდგენა, მრიცხველის შემოწმება, გადაამოწმონ დარიცხვა.კომუნალური მომსახურებების მიღება შესაძლებელია იუსტიციის სახლის სხვა სერვისებთან ერთად, მათ შორის უძრავი ქონების ყიდვის ან იჯარის შემთხვევაში შესაძლებელია აბონენტად რეგისტრაცია ან/და დავალიანების გადამოწმება, ასევე ელექტროენერგიის მიმწოდებელ კომპანიებთან ელექტროენერგიის მიწოდების ხელშეკრულების გაფორმება. მომსახურებით სარგებლობა შეუძლია ნებისმიერი კომუნალური კომპანიის აბონენტს.სემეკისა და იუსტიციის სახლის ერთობლივი პროექტის ფარგლებში, იუსტიციის სახლის კომუნალურ მომსახურებაზე ცნობადობის გაზრდის მიზნით, კომუნალური მომსახურების შესახებ საინფორმაციო ხასიათის ბანერები იუსტიციის სახლის  ყველა ფილიალში განთავსდა.

შავი ზღვის კაბელის პროექტში ჩართული ქვეყნები ერთობლივ საწარმოს დააფუძნებენ

საქართველოს, უნგრეთის, რუმინეთისა და აზერბაიჯანის მთავრობათა წარმომადგენლები "მწვანე ენერგიის განვითარებისა და გადაცემის სფეროში სტრატეგიული პარტნიორობის თაობაზე“ გაფორმებული შეთანხმების ფარგლებში  რუმინეთის დედაქალაქში რიგით მე-4 მინისტერიალზე შეიკრიბნენ.ღონისძიებაზე მისასალმებელი სიტყვით გამოვიდა საქართველოს ეკონომიკის მინისტრის მოადგილე რომეო მიქაუტაძე, სადაც შეთანხმების მონაწილე ქვეყნებისა და მთლიანად რეგიონისთვის ენერგეტიკის სფეროში პარტნიორობის მნიშვნელობაზე ისაუბრა, მათ შორის შავი ზღვის წყალქვეშა კაბელის პროექტთან დაკავშირებით.   „შეუძლებელია, სათანადოდ არ შეაფასო ამ მიზნის მნიშვნელობა ჩვენი ქვეყნებისთვის და მთლიანად ჩვენი რეგიონებისთვის. ჩვენი ყურადღება ახლა გამახვილებულია ერთობლივი საწარმოს ჩამოყალიბებაზე, რომელსაც დავაკისრებთ პასუხისმგებლობას, გამოიყენოს შესაძლებლობები და განახორციელოს ჩვენი ხედვა. ეს, ახალი საწარმო შეგვმატებს მოქნილობას, დააჩქარებს ჩვენს პროგრესს და გაზრდის ჩვენი კომუნიკაციის ეფექტურობას. სულ რაღაც ორიოდე წლის წინ შავი ზღვის კაბელი მხოლოდ იდეა იყო,  რომელსაც ძირითადად სკეპტიციზმი ხვდებოდა, თუმცა კოლექტიური მონდომებითა და მტკიცე ვალდებულებით ჩვენ ეს იდეა რეალობად ვაქციეთ“, - განაცხადა ეკონომიკისა და მდგრადი განვითარების მინისტრის პირველმა მოადგილემ.ბუქარესტში მიმდინარე შეხვედრაზე ოთხი ქვეყნის მთავრობათა ენერგეტიკული უწყებების პირველმა პირებმა შავი ზღვის წყალქვეშა კაბელთან დაკავშირებული მიმდინარე საკითხებზე იმსჯელეს. დღეს ასევე გადაწყდა სტრატეგიული თანამშრომლობის შეთანხმების მონაწილე სახელმწიფოების მიერ ერთობლივი შვილობილი საწარმოს დაფუძნება, რომლის საშუალებითაც გაგრძელდება კაბელის პროექტის განვითარება.შავი ზღვის წყალქვეშა კაბელის პროექტი საქართველოს მთავრობის მხარდაჭერით და საქართველოს და რუმინეთის გადამცემი სისტემის ოპერატორების „საქართველოს სახელმწიფო ელექტროსისტემის" და „ტრანსელექტრიკას" ხელშეწყობით ხორციელდება.2022 წლის 17 დეკემბერს აზერბაიჯანის, საქართველოს, რუმინეთის და უნგრეთის მთავრობებს შორის ხელი მოეწერა სტრატეგიული თანამშრომლობის შეთანხმებას, რომლის ერთ-ერთ მნიშვნელოვან საკითხს სწორედ შავი ზღვის წყალქვეშა კაბელის პროექტი წარმოადგენს. პროექტი 1,195 კმ სიგრძის კაბელის საშუალებით სამხრეთ კავკასიის ენერგოსისტემის პირდაპირ  ევროპის ენერგოსისტემასთან დაკავშირებას გულისხმობს.

ტარიფების დასადგენად სემეკმა საჯარო ადმინისტრაციული წარმოებები დაიწყო

ელექტროენერგიისა და წყალმომარაგების კომპანიებისთვის გეგმური ტარიფების დასადგენად სემეკში საჯარო ადმინისტრაციული წარმოებები დაიწყო.მარეგულირებელი კომისია ხაზგასმით აღნიშნავს, რომ გეგმური ტარიფების დადგენის მიზნით საჯარო ადმინისტრაციული წარმოებების დაწყება პირდაპირპროპორციულად არ ნიშნავს ტარიფების მატებას. რიგი კომპანიებისათვის ტარიფების მოქმედების ვადა იწურება მიმდინარე წლის 31 დეკემბერს. საკანონმდებლო მოთხოვნების შესაბამისად, სემეკს აქვს ვალდებულება, ტარიფის ვადის ამოწურვამდე 180 დღით ადრე დაიწყოს ადმინისტრაციული წარმოებები, კომპანიებისათვის, მომდევნო წლებზე გათვლილი ახალი ტარიფების დასადგენად.საჯარო სხდომაზე კომისიის მიერ მიღებული გადაწყვეტილებების შესაბამისად, ადმინისტრაციული წარმოებები დაიწყო:- ელექტროენერგიის წარმოების ტარიფების დადგენის მიზნით -  შპს „ვარდნილჰესების კასკადისთვის“, სს „ეპ ჯორჯია გენერაციას“ საკუთრებაში არსებული ჰიდროელექტროსადგურებისთვის (ლაჯანურჰესი, ძევრულჰესი, გუმათჰესების კასკადი), შპს „ჯორჯიან უოთერ ენდ ფაუერის“ საკუთრებაში არსებული ჰიდროელექტროსადგურ „ჟინვალჰესისთვის“;- საჯარო მომსახურების გაწევის ვალდებულების ფარგლებში გარანტირებული სიმძლავრის საფასურის დადგენის მიზნით -  შპს „გარდაბნის თბოსადგურისა“ და  შპს „ჯიფაუერისთვის“;-  ელექტროენერგიის უნივერსალური მომსახურების, საჯარო მომსახურებისა და ბოლო ალტერნატივის მიწოდებისთვის ტარიფების დადგენის მიზნით - სს „ეპ ჯორჯია მიწოდებისა“ და შპს „თბილისის ელექტრომიმწოდებელი კომპანიისთვის“;- წყალმომარაგების ტარიფების დადგენის მიზნით -  შპს „საჩხერის წყალკანალისთვის“, შპს „საგარეჯოსთვის“, შპს „ბათუმის წყლისთვის“, შპს „ჯორჯიან უოთერ ენდ ფაუერისთვის“, შპს „რუსთავის წყალისთვის“.სემეკის მიერ გადაწყვეტილებების მიღების ბოლო ვადად განისაზღვრა 2023 წლის 31 დეკემბერი, ხოლო დაინტერესებული პირების მიერ მოსაზრებების სემეკში წარმოდგენის ბოლო ვადად - 2023 წლის 17 აგვისტო.ადმინისტრაციული წარმოებების პროცესი საჯაროა და დოკუმენტაცია ხელმისაწვდომი კომისიის ვებგვერდზე. ნებისმიერ დაინტერესებულ პირს აქვს შესაძლებლობა ადმინისტრაციული წარმოებით განსაზღვრულ ვადებში, საკითხთან მიმართებაში დააფიქსიროს მოსაზრება წერილობითი ფორმით. დაინტერესებული პირი საკუთარი მოსაზრების წარდგენისას უფლებამოსილია არ მიუთითოს ვინაობა.

დავით ნარმანია ბაზრის გახსნაზე: გარე რისკებმა გადაწონა შიგნით არსებული მზაობა

ბაზრის გახსნის გადავადებაზე მთავრობამ მიიღო გადაწყვეტილება და ეს გადაწყვეტილება მათი მხრიდან არგუმენტირებული იყო - ამის შესახებ ჟურნალისტებთან სემეკ-ის თავმჯდომარე დავით ნარმანია აცხადებს.მისი თქმით, მთავრობის არგუმენტი რეგიონში არსებული საომარი მოქმედებები და მასთან დაკავშირებული ენერგეტიკული სირთულეები იყო.„მიუხედავად იმისა, რომ სისტემა და ბაზრის მონაწილეები პრაქტიკულად ყველანი მზად იყვნენ, გარე რისკებმა გადაწონა შიგნით არსებული მზაობა. თუმცა, ენერგეტიკის სექტორი არ მოდუნდება - საცდელი ვაჭრობები გაგრძელდება მომავალშიც. გარდამავალი პერიოდის იმ დოკუმენტში, რომელიც ჩვენ გვაქვს, გარკვეული კორექტირება გაკეთდება და შესაბამისად, სისტემის მზაობა ბაზრის გახსნისთვის შენარჩუნდება. როგორც კი შესაბამისი რისკები შემცირდება, რა თქმა უნდა, მიღებული იქნება შესაბამისი გადაწყვეტილება ბაზრის გახსნასთან დაკავშირებით“ - ამბობს დავით ნარმანია.ენერგეტიკული ბირჟა 1 ივლისს უნდა ამოქმედებულიყო, თუმცა მთავრობამ კიდევ ერთხელ, ერთი წლით გადადო. ბირჟას ფუნქციონირება თავდაპირველად, 2021 წლის 1 ივლისს უნდა დაეწყო, თუმცა, მას შემდეგ ბირჟის ამოქმედება და ბაზრის გახსნა უკვე მეექვსედ გადავადდა.