სემეკი ელექტროენერგიის ბაზრის გარდამავალი მოდელის ფუნქციონირებასთან დაკავშირებით განცხადებას ავრცელებს

დავით ნარმანია ენერგეტიკულ სისტემათა ინჟინერიის პირველ საერთაშორისო კონგრესზე მოხსენებით წარდგა

საქართველოს ენერგეტიკისა და წყალმომარაგების მარეგულირებელი ეროვნული კომისიის (სემეკ) თავმჯდომარემ, პროფესორმა დავით ნარმანიამ მონაწილეობა მიიღო აკაკი წერეთლის სახელმწიფო უნივერსიტეტის ორგანიზებით გამართულ ენერგეტიკულ სისტემათა ინჟინერიის პირველ საერთაშორისო კონგრესში. კონგრესში მონაწილეობდნენ ენერგეტიკის სექტორში მოქმედი ორგანიზაციების, საქართველოს, ჩეხეთის, თურქეთის უნივერსიტეტების სამეცნიერო წრეების წარმომადგენლები და ენერგეტიკის სექტორის ექსპერტები. სემეკის თავმჯდომარემ, კონგრესზე წარდგენილ მოხსენებაში ისაუბრა საქართველოში ენერგეტიკული რეფორმების მენეჯმენტის შესახებ. დავით ნარმანიამ ყურადღება გაამახვილა ელექტროენერგიის ბაზრის ლიბერალიზაციის ეტაპებზე, ენერგეტიკული ბირჟის ფუნქციონირებაზე, ბუნებრივი გაზის სექტორში არსებულ სიახლეებსა და სატარიფო პოლიტიკაზე. „საქართველოს ენერგეტიკის სექტორი წარმოადგენს ერთ-ერთ ყველაზე განვითარებად დარგს, რომელსაც ქვეყნის ეკონომიკაში დიდი წვლილი შეაქვს. საერთაშორისო ვალდებულებების შესრულების მხრივ, ენერგეტიკის სექტორში არაერთი ფუნდამენტური ცვლილება უკვე განხორციელდა, ეტაპობრივად ხდება ბაზრების ლიბერალიზაცია. მნიშვნელოვანია, რომ რეფორმირების პროცესიმიმდინარეობს ადგილობრივი ბაზრის სპეციფიკის გათვალისწინებით. აქტიურად გრძელდება ევროპის ენერგეტიკული პაკეტის გათვალისწინებული დირექტივებისა და რეგულაციების ჰარმონიზაციის პროცესი. სემეკმა, როგორც ელექტროენერგეტიკის, ასევე ბუნებრივი გაზის სექტორში შეიმუშავა და დაამტკიცა დირექტივებზე დაყრდნობით არაერთი ნორმატიული აქტი, რომელიც განაპირობებს  რეფორმირების პროცესის ეფექტიანობას,“ - აღნიშნა დავით ნარმანიამ. კონგრესში მონაწილეობა მიიღეს სემეკის წევრმა გივი სანიკიძემ და სემეკის დეპარტამენტების ხელმძღვანელმა პირებმა, რომლებმაც წარადგინეს როგორც სამეცნიერო ნაშრომები, ასევე პრეზენტაციები ბაზრების მონიტორინგის, ენერგეტიკული გაერთიანებების, ნეტო-ბილინგისა და წყლის, როგორც განახლებადი ენერგიის შესახებ.ენერგეტიკულ სისტემათა ინჟინერიის პირველისაერთაშორისო კონგრესის მიზანს წარმოადგენდაექსპერტების, მკვლევრებისა და  სპეციალისტების გაერთიანება ენერგეტიკის სხვადასხვა მიმართულებების  შესახებ ცოდნისა და იდეების გაზიარებისთვის. კონგრესი გახსნა აწსუ-ს რექტორმა, შალვა კირთაძემ.

რა მექანიზმით უნდა ჩანაცვლდეს ნეტო აღრიცხვის სისტემა საქართველოში - სალომე ჯანელიძეს განმარტება

ენერგეტიკული გაერთიანების წარმომადგენელმა საქართველოში სალომე ჯანელიძემ ნეტო აღრიცხვის შესახებ კომენტარი გააკეთა. მისი თქმით, ნეტო აღრიცხვის პოლიტიკა საქართველოში დადებით უნდა შეფასდეს, რადგან გაიზარდა როგორც დადგმული სიმძლავრეების მოცულობა ისე რაოდენობა. თუმცა ენერგეტიკული გაერთიანების წარმომადგენელი მიიჩნევს, რომ ამ ეტაპზე, საჭიროა, ნეტო აღრიცხვის სისტემის ტრანსფორმაცია და ახალი მექანიზმის დანერგვა. „ნეტო აღრიცხვის პოლიტიკამ საქართველოს ხელშესახები დადებითი შედეგები მოუტანა. ჩვენ თითქმის ნულიდან ავედით 100 მეგავატ ენერგიამდე. ამასთან სისტემაში ჩართული მომხმარებლების რაოდენობაც გაიზარდა და უკვე ათასს აჭარბებს. გარდა იმისა, რომ მომხმარებლებმა მიიღეს გარკვეული ფინანსური სარგებელი, ამავდროულად მეტი შეიტყვეს განახლებად ენერგიებზე, გახდნენ უფრო აქტიურები და  შეგვიძლია ვთქვათ, რომ ამ პოლიტიკამ დადებითად იმოქმედა ქვეყანაზე. მაგრამ  ახლა ვართ იმ ეტაპზე მისულები, როდესაც თუკი ასე გავაგრძელებთ,  ეს პოლიტიკა გრძელვადიან პერიოდში მდგრადი აღარ იქნება. ამასთან, ნეტო აღრიცხვის პოლიტიკა უკვე აღარაა თავსებადი იმ ვალდებულებებთან, რომლებიც საქართველოს აქვს აღებული საერთაშორისო ხელშეკრულებებით. აქედან გამომდინარე, უკვე დროა ნეტო აღრიცხვა ჩანაცვლდეს თანამედროვე მექანიზმებით“. - აცხადებს სალომე ჯანელიძე.სალომე ჯანელიძე ასევე აცხადებს, რომ ნეტო აღრიცხვის სისტემის შეცვლა უნდა მოხდეს ნეტო ანგარიშსწორების მექანიზმით, რომელიც მსოფლიოს წამყვან ქვეყნების აპრობირებული და წარმატებულია.„ენერგეტიკულმა გაერთიანებამ ახლახან შეიმუშავა რეკომენდაციები, რომლებიც შეეხება თვითმოხმარების სქემების წახალისებას. ერთ-ერთი ძირითადი რეკომენდაცია არის ნეტო აღრიცხვის ჩანაცვლება ნეტო ანგარიშსწორებით. აღნიშნული გულისხმობს არა კილოვატების გაქვითვას, არამედ, პირველ რიგში, ცალ-ცალკე აღირიცხება რამდენი ელექტროენერგია აწარმოა მომხმარებელმა, რა მოცულობის ელექტროენერგია მიიღო ქსელიდან. იგი სრულად იხდის იმ ელექტროენერგიის საფასურს, რაც მან ქსელიდან მოიხმარა, ხოლო ქსელში მიწოდებულ ენერგიის სანაცვლოდ კი იგი იღებს გარკვეულ ანაზღაურებას მიმწოდებლისგან თუ სხვა განსაზღვრული პირისგან“.  - აღნიშნა სალომე ჯანელიძემ. 

ენერგეტიკის სასწავლო ცენტრი აცხადებს რეგისტრაციას ახალ სასწავლო კურსზე „წყალმომარაგების სექტორის რეგულირების პრინციპები"

ენერგეტიკის სასწავლო ცენტრმა რეგისტრაცია გამოაცხადა ახალ სასწავლო კურსზე „წყალმომარაგების სექტორის რეგულირების პრინციპები." კურსის მიზანია წყალმომარაგების სექტორში არსებული და სამიზნე რეგულირების ზოგადი პრინციპების გაცნობა და პრაქტიკული მაგალითების საფუძველზე წყალმომარაგების სექტორში არსებული გამოწვევების ანალიზი. მსმენელები, რომლებიც გაივლიან „წყალმომარაგების სექტორის რეგულირების პრინციპების“ კურსს, მისი დასრულების შემდგომ უნდა ფლობდნენ შესაბამის ცოდნასა და უნარებს წყალმომარაგების სექტორის რეგულირების საკითხებში.კურსის ფარგლებში ტრენინგები ჩატარდება შემდეგ საკითხებზე: წყალმომარაგების სექტორის მარეგულირებელი ჩარჩო კომისიის როლი და ფუნქციები; ლიცენზირება და სალიცენზიო პირობების მონიტორინგი; წყალმომარაგების სისტემების შემადგენლობა და ძირითადი მახასიათებლები; წყალმომარაგების კომპანიები; წყალმომარაგების სისტემების შეფასების კრიტერიუმები და შედარებითი ანალიზი; სასმელი წყლის დანაკარგების შეფასება და მათი აღმოფხვრა; სასმელი წყლის ხარისხი; წყალმომარაგების ტარიფები; ხელმისაწვდომობა; საირიგაციო საქმიანობის რეგულირების საფუძვლები სატარიფო  რეგულირების  პრინციპები  და  მეთოდოლოგიური საფუძვლები მომხმარებელთა  უფლებების  დაცვა,  მომსახურების  ხარისხის სტანდარტები, და მათი პრაქტიკაში გამოყენება ამასთან, სასწავლო კურსი განკუთვნილია სხვადასხვა პროფესიის წარმომადგენლებისთვის, რომელთა საქმიანობა დაკავშირებულია ენერგეტიკისა და წყალმომარაგების, ენერგეტიკული პოლიტიკის, ენერგეტიკის სექტორში მოქმედი ორგანიზაციების საქმიანობის შესწავლის, ელექტროენერგიის მომსახურების ხარისხის, მომხმარებელთა უფლებების დაცვის საკითხების შესწავლისა და რეგულირების მიმართულებებთან.სასწავლო კურსი გაიმართება ონლაინ რეჟიმში, Zoom-ის საშუალებით, ხოლო რეგისტრაცია შესაძლებელია ბმულზე: https://bit.ly/4eZ4FMB

დავით ნარმანიამ „ეკონომიკურ ფორუმზე“ ენერგეტიკის სექტორში არსებული სიახლეების შესახებ ისაუბრა

საქართველოს ენერგეტიკისა და წყალმომარაგების მარეგულირებელი ეროვნული კომისიის (სემეკ) თავმჯდომარემ, დავით ნარმანიამ მონაწილეობა მიიღო „ეკონომიკური ფორუმის“ დისკუსიაში, რომელიც საქართველოს ენერგეტიკულიპოლიტიკის ენერგოუსაფრთხოებისა და განახლებადი ენერგიის საკითხებს შეეხებოდა.სემეკის თავმჯდომარემ ისაუბრა ენერგეტიკის სექტორში მიმდინარე რეფორმებზე, როგორც ელექტროენერგეტიკის, ასევე ბუნებრივი გაზის მიმართულებით, ყურადღება გაამახვილა სატარიფო პოლიტიკაზე. მისი თქმით, რეგულირებად სექტორებში დადგენილია გრძელვადიანი ტარიფები, შესაბამისად, უახლოეს ხანებში ტარიფების გადახედვა არ იგეგმება. დავით ნარმანიამ ისაუბრა განახლებადი ენერგიების ათვისების ხელშემწყობი პოლიტიკისეფექტიანობაზე. მან აღნიშნა, რომ სემეკში დაწყებულია მუშაობა ნეტო-აღრიცხვის პოლიტიკის ტრანსფორმაციის შესახებ:  „ისევე როგორც ევროპის ბევრ ქვეყანაში,საქართველოშიც ნეტო-აღრიცხვის სისტემიდან უნდა გადავიდეთ ნეტო-ბილინგის სისტემაზე, კერძოდქსელში მიწოდებული და ქსელიდან მოხმარებულიკილოვატ საათების გაქვითვიდან ქსელში მიწოდებული ელექტროენერგიის საფასურით მოხმარებული ელექტროენერგიის გაქვითვაზე. აღნიშნულ პროცესს სჭირდება რამდენიმე წლიანი გარდამავალი პერიოდი, რათა ნეტო-აღრიცხვის სისტემის არსებულიმომხმარებლები არ დაზარალდნენ. მნიშვნელოვანია,რომ ახალი სისტემა მიმზიდველი იყოსმომხმარებლებისთვის. ნეტო-აღრიცხვის პოლიტიკის ტრანსფორმაციის შესახებ შესაბამისი რეკომენდაცია მივიღეთ ენერგეტიკული გაერთიანებიდან. უახლოეს ხანებში დაიწყება საჯარო განხილვები სხვადასხვა დაინტერესებულ პირებთან ჩვენს მიერ მომზადებულ პროექტზე, რომლის შემდეგაც შემუშავდება შესაბამისი ნორმატიული აქტები“, - აღნიშნა დავით ნარმანიამ.    „ეკონომიკური ფორუმის“ დისკუსიაში მონაწილეობდნენ პირველი ვიცე-პრემიერი, ეკონომიკისა და მდგრადი განვითარების მინისტრი, ლევან დავითაშვილი და „საქართველოს ბანკის“ გენერალური დირექტორი, არჩილ გაჩეჩილაძე. დისკუსიას მოდერატორობა გაუწია „ბიზნეს ინსაიდერჯორჯიას“ დამფუძნებელმა, გიორგი აბაშიშვილმა. ღონისძიებას ესწრებოდნენ ენერგეტიკული უწყებების ხელმძღვანელი პირები და სხვადასხვა სექტორის წარმომადგენლები.    

"გვაქვს ამბიციური გეგმა, რომ 2030 წლისთვის 10 გეგავატამდე დადგმული სიმძლავრე გვქონდეს" - ლევან დავითაშვილი

პირველმა ვიცე-პრემიერმა, ეკონომიკისა და მდგრადი განვითარების მინისტრმა ლევან დავითაშვილმა საქართველოს ენერგეტიკის სექტორში არსებულ ტენდენციებზე, მიმდინარე და დაგეგმილ რეფორმებსა და მსხვილ ინფრასტრუქტურულ პროექტებზე ისაუბრა ეკონომიკურ ფორუმზე „საქართველოს ენერგეტიკული პოლიტიკა, ენერგოუსაფრთხოება და განახლებადი ენერგია“.პირველმა ვიცე-პრემიერმა თავის გამოსვლაში ხაზი გაუსვა ენერგეტიკის სექტორის მნიშვნელობას ქვეყნის განვითარებისთვის. მისი შეფასებით, ენერგეტიკული პოლიტიკა ის მიმართულებაა, რაც საფუძვლად უდევს როგორც ქვეყნის სწორ ეკონომიკურ პოლიტიკას, ისე ქვეყნის უსაფრთხოებას.ლევან დავითაშვილმა აქცენტი გააკეთა ქვეყნის ენერგეტიკული უსაფრთხოების გაძლიერებაზე, ენერგობალანსში ადგილობრივი ელექტროენერგიის წილის მატებასა და ექსპორტის ზრდაზე.„საარჩევნო პროგრამით საზოგადოებას კონკრეტული სამიზნე მაჩვენებლები გავაცანით.კერძოდ, საუბარია ენერგოგენერაციის გაორმაგებაზე 2030 წლისთვის, რაც მოითხოვს რამდენიმე მილიარდიან ინვესტიციებს ენერგეტიკის სექტორში. საქართველოს აქვს განახლებადი ენერგორესურსებიდან ელექტროენერგიის წარმოების დიდი შესაძლებლობები, საუბარია როგორც ტრადიციულ ჰიდრორესურსებზე, ისე ქარისა და მზის წყაროებზე. ყველაფერი უნდა გავაკეთოთ, რომ ეს ენერგეტიკული რესურსები სრულად ავითვისოთ - ჩვენ გვაქვს ამბიციური გეგმა, რომ 2030 წლისთვის 10 გეგავატამდე დადგმული სიმძლავრე გვქონდეს,“ - აღნიშნა ლევან დავითაშვილმა.ლევან დავითაშვილმა დიდი მნიშვნელობა მიანიჭა დარგში კერძო ინვესტიციების მოზიდვას. მისი თქმით, კვლავ აქტუალურია ენერგეტიკაში კიდევ უფრო მეტი ინვესტიციის მოზიდვა და მეტი ინვესტორის დაინტერესება.„ჩვენი ენერგეტიკული პოლიტიკა კერძო ინვესტიციების წახალისებას გულისხმობს, თუმცა გვესმის, რომ ენერგეტიკის სექტორი სპეციფიურია, განსაკუთრებულია და კერძო სექტორთან ერთად დიდია სახელმწიფოს როლი. ეკონომიკის ბევრი სხვა სექტორისგან განსხვავებით, ენერგეტიკაში კერძო და საჯარო სექტორებს შორის დიალოგი უმნიშვნელოვანესია,“ - აღნიშნა პირველმა ვიცე-პრემიერმა.პირველმა ვიცე-პრემიერმა ასევე გაამახვილა ყურადღება ელექტროგადამცემ ინფრასტრუქტურასა და მეზობელი ქვეყნების ენერგეტიკულ სისტემებთან კოორდინირებულ მუშაობაზე. მან ასევე ხაზი გაუსვა გლობალურ ენერგეტიკულ პროექტს, რომლითაც შავი ზღვის წყალქვეშა კაბელის მეშვეობით საქართველოს ენერგოსისტემა ევროკავშირისას დაუკავშირდება.  ფორუმში მონაწილეობა ასევე მიიღეს „ბიზნეს ინსაიდერი საქართველოსა“ და ეკონომიკური ფორუმის დამფუძნებელმა გიორგი აბაშიშვილმა,  სემეკის თავჯდომარემ დავით ნარმანიამ და საქართველოს ბანკის ჯგუფის აღმასრულებელმა  და გენერალურმა დირექტორმა არჩილ გაჩეჩილაძემ. ფორუმს ასევე დაესწრნენ საქართველოს ბიზნეს ასოციაციის წევრი ენერგეტიკული კომპანიების წარმომადგენლები.