ᲡᲔᲛᲔᲙᲡᲐ ᲓᲐ ᲐᲖᲔᲠᲑᲐᲘᲯᲐᲜᲘᲡ ᲔᲜᲔᲠᲒᲔᲢᲘᲙᲘᲡ ᲛᲐᲠᲔᲒᲣᲚᲘᲠᲔᲑᲔᲚ ᲡᲐᲐᲒᲔᲜᲢᲝᲡ ᲨᲝᲠᲘᲡ ᲗᲐᲜᲐᲛᲨᲠᲝᲛᲚᲝᲑᲘᲡ ᲛᲔᲛᲝᲠᲐᲜᲓᲣᲛᲘ ᲒᲐᲤᲝᲠᲛᲓᲐ

"30 წელიწადში ქვეყნის გაზიფიცირებული დასახლებული პუნქტების რაოდენობამ 1500-ს გადააჭარბა" - სემეკის როლი ბუნებრივი გაზის სექტორის განვითარებაში

ნეტო აღრიცხვის სისტემაში ჩართული ელექტროსადგურების რაოდენობა გაიზარდა

ნავთობის და გაზის XI-H სალიცენზიო ბლოკზე გზშ მომზადდა

„2017 წლიდან სემეკმა ელექტროენერგიის სექტორში მნიშვნელოვანი ცვლილებები განახორციელა“ - როგორც ვითარდება სექტორი?

ელექტროენერგია
მეორე სიმძლავრის აუქციონში 146 განაცხადი შევიდა, რაც პირველ აუქციონთან შედარებით ორჯერ მეტია

საქართველოს ეკონომიკისა და მდგრადი განვითარების სამინისტროს მიერ 2023 წლის 30 დეკემბერს გამოცხადებულ რიგით მეორე სიმძლავრის აუქციონში 146 განაცხადი შევიდა, რაც დაახლოებით ორჯერ მეტია პირველ აუქციონთან შედარებით.ეკონომიკის სამინისტროს ცნობით, აუქციონის კომისია უახლოეს მომავალში შეიკრიბება, გაეცნობა წარმოდგენილ განაცხადებს, პირველ რიგში, დაადგენს მედიანურ ტარიფს, რის შემდგომაც გამარჯვებული წინადადებები გამოვლინდება.სიმძლავრის მეორე აუქციონის ჯამური დადგმული სიმძლავრე 800 მგვტ. - ს შეადგენს. აუქციონის სიმძლავრე გადანაწილდა შემდგომ კატეგორიებში: ჰიდროელექტროსადგურები (მარეგულირებელი) - 300 მგვტ.; ჰიდროელექტროსადგურები (მოდინებაზე) -100 მგვტ.; ქარის ელექტროსადგურები - 125 მგვტ.;  მზის ელექტროსადგურები -125 მგვტ.; ქარის ელექტროსადგურები (ენერგიის შემნახველი მოწყობილობებით) - 70 მგვტ.; მზის ელექტროსადგურები (ენერგიის შემნახველი მოწყობილობებით) - 70 მგვტ.; სხვა განახლებადი ენერგიის წყაროებზე მომუშავე ელექტროსადგურები - 10 მგვტ.

AYPEG-ის წარმომადგენლებმა განახლებადი ენერგიის ინვესტიციების გასაუმჯობესებლად გამართულ ინვესტორთა ბრიფინგში მიიღეს მონაწილეობა

2024 წლის 2 თებერვალს საქართველოს ახალგაზრდა ენერგეტიკოსთა ასოციაციის წარმომადგენლებმა მონაწილეობა მიიღეს განახლებადი ენერგიის ინვესტიციების გასაუმჯობესებლად გამართულ ინვესტორთა ბრიფინგში. შეხვედრის მიზანს განახლებადი ენერგიის სიმძლავრის მეორე აუქციონის ტექნიკურ საკითხებზე დიალოგის ხელშეწყობა წარმოადგენდა. ღონისძიების ჩატარდა USAID-ის „საქართველოს ენერგეტიკის მომავლის“ პროგრამის მხარდაჭერით. აღნიშნულ ღონისძიებაში მონაწილეობდნენ დარგის ექსპერტები და პოტენციური ინვესტორები, ასევე საქართველოს ელექტროენერგიის ბაზრით დაინტერესებული მხარეები. ბრიფინგზე გარდა განახლებადი ენერგიის მეორე აუქციონისა, ასევე განიხილეს ენერგეტიკული საზოგადოების საპილოტე პროექტების განვითარების შესაძლებლობები საქართველოში.აღნიშნულ კონფერენციაზე საქართველოს ახალგაზრდა ენერგეტიკოსთა ასოციაციის წარმომადგენელმა დაინტერესებულ მხარეებს მიაწოდა ინფორმაცია #SHAREs-ის მიზნებსა და ამოცანებზე საქართველოში. გარდა ამისა, ღონისძიებაზე განიხილეს ისეთი მნიშვნელოვანი საკითხი, როგორიცაა "ენერგეტიკული თემების ჩამოყალიბების გამოცდილება და გამოწვევები საქართველოსა და ევროკავშირის ქვეყნებში".ამასთან, პროექტის #SHAREs-ის წარმომადგენელმა კონფერენციის მონაწილეებს წარუდგინა საქართველოში  ენერგეტიკული თემებისთვის არსებული საინფორმაციო ცენტრი. საინფორმაციო ცენტრი მოიცავს ტექნიკურ, სამართლებრივ, ფინანსურ და მარეგულირებელ ინფორმაციას, ასევე სახელმძღვანელოებსა და დამხმარე მასალებს, რომლებიც დაეხმარება ყველა დაინტერესებულ მხარეს ენერგეტიკული თემების ჩამოყალიბების პროცესში.აქვე შეგახსენებთ, რომ პროექტი #SHAREs არის Horizon2020-ის დაფინანსებული პროექტი, რომელიც მიზნად ისახავს ენერგეტიკული თემების და კოლექტიური მოქმედებების მხარდაჭერას საქართველოში განახლებადი ენერგიების წახალისება/განვითარებისთვის.

„საქართველომ მნიშვნელოვანი ნაბიჯები გადადგა ენერგეტიკული გაერთიანების კანონმდებლობასთან ჰარმონიზაციის კუთხით“- სალომე ჯანელიძე

საქართველო 2017 წლიდან energy community-ის წევრია. აღნიშნული წევრობისა და შემდგომში თანამშრომლობის ძირითადი მიზანია, ენერგეტიკულ სექტორში საქართველოს კანონმდებლობის ევროპულ კანონმდებლობასთან ჰარმონიზაცია. ასევე ქვეყანაში ენერგოეფექტურობის ზრდა და ენერგეტიკული ბაზრის გახსნა, რაც საბოლოო ჯამში კონკურენციას სექტორში კიდევ უფრო ავითარებს. Energynews-ის დაინტერესდა იმით თუ რა პროგრესი აქვს ქვეყანას უკანასკნელი წლების განმავლობაში ენერგეტიკულ გაერთიანებაში წევრობის ფონზე. როგორც საქართველოში ენერგეტიკული გაერთიანების (Energy Community) წარმომადგენლობის ხელმძღვანელი სალომე ჯანელიძე აცხადებს, 2017 წლიდან დღემდე საქართველომ მნიშვნელოვანი ნაბიჯები გადადგა ენერგეტიკული გაერთიანების კანონმდებლობასთან ჰარმონიზაციის მიმართულებით. მისივე თქმით, გარკვეული გამოწვევები კვლავ არსებობს, რომელთა დაძლევის შესაძლებლობაც საქართველოს გააჩნია.პირველ რიგში თქვენი შეფასებაა საინტერესო Energy community-ის წევრობასთან დაკავშირებით. რა სარგებელსა და შესაძლებლობას აძლევს საქართველოს აღნიშნულ ორგანიზაციაში წევრობა?„ევროკავშირთან ინტეგრაციის გზაზე, საქართველოს ენერგეტიკულ გაერთიანებაში გაწევრიანება გარდამტეხი მომენტი იყო. ორგანიზაციის წევრობა საშუალებას გვაძლევს, ენერგეტიკის მარეგულირებელი ჩარჩო შესაბამისობაში მოვიყვანოთ ევროპულ პრინციპებთან და გავატაროთ მასშტაბური რეფორმები ენერგეტიკის სექტორში, რომლებიც გაზრდის სექტორის ეფექტიანობას, გააუმჯობესებს მარეგულირებელ სტანდარტებს და ევროპულ ენერგეტიკულ სისტემასთან უშუალო დაკავშირების შემთხვევაში, დაგვეხმარება ერთიან ენერგეტიკულ ბაზართან ჰარმონიზაციაში. ენერგეტიკული გაერთიანების წევრობა ასევე გვაძლევს შესაძლებლობას, ვისარგებლოთ სხვადასხვა სახის ტექნიკური დახმარებით, რაც ძალიან მნიშვნელოვანია რეფორმების განხორციელების პროცესში. ევროპულ ენერგეტიკულ პრინციპების გადმოტანა ხაზს უსვამს საქართველოს სურვილს, ენერგეტიკული სექტორი იყოს გამჭვირვალე, კონკურენტული და სტაბილური, რაც, თავის მხრივ, უზრუნველყოფს ინვესტორებისა და საერთაშორისო პარტნიორების ნდობას სექტორისადმი. ევროპული საბჭოს გადაწყვეტილება საქართველოსთვის კანდიდატის სტატუსის მინიჭებაზე სწორედ ქვეყნის მიერ მიღწეული პროგრესისა და პოტენციალის მაჩვენებელია“.საქართველო 2017 წლიდან Energy Community-ის წევრია. 2017 წლიდან დღემდე როგორ ფიქრობთ რამდენად სწრაფად დგამს ქვეყანა ნაბიჯებს ენერგეტიკის სექტორში არსებული კანონმდებლობის ევროპასთან ჰარმონიზაციის კუთხით? „2017 წელს საქართველოს ენერგეტიკულ გაერთიანებაში გაწევრიანებიდან დღემდე ქვეყანამ მნიშვნელოვანი ნაბიჯები გადადგა ენერგეტიკული დარგის მარეგულირებელი კანონმდებლობის ენერგეტიკული გაერთიანების კანონმდებლობასთან ჰარმონიზაციის მიზნით. დარგში არაერთი ცვლილება განხორციელდა, მათ შორის, მივიღეთ ელექტროენერგიისა და ბუნებრივი გაზის ბაზრების მარეგულირებელი ახალი საკანონმდებლო ჩარჩო, რომლის მიზანია, ხელი შეუწყოს ბაზრების გახსნასა და კონკურენციას და, ამავდროულად, უზრუნველყოს მომხმარებელთა უფლებების დაცვა. ელექტროენერგიის სექტორში წარმატებით განხორციელდა გამანაწილებელი სისტემის ოპერატორების განცალკევება და გაიხსნა საცალო ბაზარი. მნიშვნელოვანი პროგრესი იქნა მიღწეული ენერგოეფექტურობისა და მწვანე ენერგიის ხელშეწყობის მიმართულებითაც, სადაც განახლებადი ენერგიის სიმძლავრის აუქციონების დანერგვით შეიქმნა წახალისების კონკურენტული და გამჭვირვალე მექანიზმი.ამასთანავე, მიუხედავად მიღწეული პროგრესისა, გარკვეული დაყოვნებაც არის სახეზე. ასეთია, მაგალითად, გადამცემი სისტემის ოპერატორების განცალკევება, ელექტროენერგიის ორგანიზებული ბაზრებისა და ბუნებრივი გაზის ბირჟის გახსნა. შესაბამისად, საჭიროა დამატებითი ძალისხმევა, რათა საქართველომ უმოკლეს ვადებში შეძლოს ენერგეტიკული სექტორის რეფორმის დასრულება და ენერგეტიკული გაერთიანების წინაშე ნაკისრი ვალდებულებების სრულყოფილად შესრულება“.ამ ეტაპზე ძირითადად რა მიმართულებების გაუმჯობესებაზე მუშაობს საქართველო ჰარმონიზაციის გზაზე? „ამ ეტაპზე განსაკუთრებულად პრიორიტეტული ელექტროენერგიის დღით ადრე, დღიური და საბალანსო ბაზრების გახსნაა. ეს აუცილებელი წინაპირობაა იმისთვის, რომ ჩვენი ბაზრები გახდეს უფრო ეფექტიანი და კონკურენტული. გარდა ამისა, რეფორმები მიმდინარეობს ბუნებრივი გაზის სექტორშიც. ეს მოიცავს გამანაწილებელი სისტემის ოპერატორების განცალკევებასა და ბუნებრივი გაზის ბირჟის შექმნას. ამავდროულად, საქართველო აქტიურად მუშაობს როგორც ელექტროენერგიის, ასევე ბუნებრივი გაზის გადამცემი სისტემების ოპერატორების განცალკევებაზე. ახლო პერიოდში ასევე ველოდებით ცვლილებებს განახლებადი ენერგიისა და ენერგოეფექტურობის მარეგულირებელ კანონმდებლობაში, რაც უზრუნველყოფს ე.წ. „სუფთა ენერგიის პაკეტის“ მოთხოვნათა ნაწილის ასახვას ეროვნულ კანონმდებლობაში და  ხელს შეუწყობს როგორც საქართველოს განახლებადი ენერგიის პოტენციალის ათვისებას, ისე - ენერგიის დაზოგვის ღონისძიებების განხორციელებას. გარდა ამისა, ე.წ. „ელექტროენერგიის ინტეგრაციის პაკეტის“ ტრანსპოზიციისთვის საკანონმდებლო ცვლილებები მზადდება EU4Energy Governance პროექტის მხარდაჭერით. ასევე პრიორიტეტულია ენერგეტიკისა და კლიმატის ეროვნული გეგმის დროული მიღება, ენერგეტიკული გაერთიანების სამდივნოს მიერ გაცემული რეკომენდაციების გათვალისწინებით. დოკუმენტი ასახავს საქართველოს სტრატეგიულ ხედვას ენერგეტიკისა და კლიმატის პოლიტიკასთან მიმართებით და ხაზს უსვამს ქვეყნის მზაობას, განახორციელოს მნიშვნელოვანი ქმედებები ენერგეტიკული ტრანზიციისთვის“. თქვენი შეფასებით, რა პერიოდია საჭირო იმისათვის რათა ენერგეტიკის სექტორში ჩვენი კანონმდებლობა დაუახლოვდეს ევროკავშირის კანონმდებლობას?„საქართველოს ენერგეტიკული სექტორის მარეგულირებელი კანონმდებლობის ენერგეტიკული გაერთიანების კანონმდებლობასთან სრულყოფილი შესაბამისობისთვის საჭირო ვადის შეფასება კომპლექსური საკითხია, რომელიც დამოკიდებულია სხვადასხვა კრიტიკულ ფაქტორზე, მათ შორის, საკანონმდებლო რეფორმების სისწრაფესა და ეფექტიანობაზე, ადამიანური რესურსების ხელმისაწვდომობასა ახალი მარეგულირებელი ჩარჩოების ეფექტიანად დანერგვის შესაძლებლობებზე.ენერგეტიკული გაერთიანების კანონმდებლობასთან სრულ შესაბამისობაში ყოფნა მოითხოვს განგრძობად ძალისხმევასა და ადაპტაციას. ასევე მნიშვნელოვანია აღინიშნოს, რომ ჰარმონიზაცია არ გულისხმობს მხოლოდ კანონების მიღებას, არამედ ასევე - მათ ეფექტიან აღსრულებასაც“.როგორც ცნობილია, რეფორმების გზაზე Energy Community სემეკს ენერგეტიკული რეფორმის განხორციელებაში ტექნიკურ დახმარებას უწევს. რამდენად მნიშვნელოვანია ეს ჩვენთვის და უნდა ველოდოთ თუ არა სხვა ტიპის დახმარებებსაც? „ენერგეტიკული გაერთიანების სამდივნოს მიერ საქართველოს ენერგეტიკისა და წყალმომარაგების მარეგულირებელი ეროვნული კომისიისთვის გაწეული ტექნიკური დახმარება, მათ შორის, EU4Energy Governance პროექტის ფარგლებში, მნიშვნელოვან როლს ასრულებს ქვეყანაში ენერგეტიკული რეფორმების განხორციელებაში. დახმარების ერთ-ერთი ბოლოდროინდელი მიმართულება იყო ენერგიის დაზოგვის რეკომენდაციების შემუშავება. ეს რეკომენდაციები მნიშვნელოვანია მომხმარებლებს შორის ენერგოეფექტურობისა და მდგრადი მოხმარების ხელშეწყობისთვის და ენერგიის დაზოგვით მათ შეუძლიათ უშუალო წვლილი შეიტანონ ქვეყნის ენერგეტიკულ ტრანსფორმაციაში.2024 წელს ენერგეტიკული გაერთიანების სამდივნო დამატებით მხარდაჭერას უზრუნველყოფს კომისიისთვის, მათ შორის, ისეთი მარეგულირებელი ჩარჩოს შემუშავებაში, რომელიც ხელს შეუწყობს აქტიური მომხმარებლების, ე.წ. „პროსუმერების“ არსებობას. გარდა ამისა, კომისია და ელექტროენერგიის გადამცემი სისტემის ოპერატორი მიიღებენ მხარდაჭერას განახლებადი ენერგიის წარმოშობის სერტიფიკატების გამჟღავნების წესებისა და ნარჩენი ნაზავის გაანგარიშების მეთოდოლოგიის შემუშავებაში, რაც ხელს შეუწყობს ელექტროენერგიის ბაზრის გამჭვირვალობასა და განახლებადი ენერგიის სერტიფიკატების სწორ გამოყენებას“.ასევე ვისაუბროთ ენერგეტიკული ბაზრის გახსნასთან დაკავშირებითაც. რატომ გვიჭერს ამ კუთხით Energy Community მხარს და რა სარგებელს მოუტანს გახსნილი ბაზარი საქართველოს? „ენერგეტიკული გაერთიანების მხარდაჭერა საქართველოს ენერგეტიკული ბაზრის გახსნაში ემყარება სწორედ იმ მრავალ უპირატესობას, რაც ახასიათებს თავისუფალ ბაზარს. ღია ენერგეტიკული ბაზარი გადამწყვეტია კონკურენციის არსებობისთვის, რაც, თავის მხრივ, ხელს უწყობს ბაზრის ეფექტიანობას და მომხმარებლებისთვის გაუმჯობესებული ფასებისა და მომსახურების ხარისხის ხელმისაწვდომობას. თავისუფალი ბაზრები ასევე ხელს უწყობს ინოვაციას, რადგან კონკურენტულ გარემოში ენერგეტიკული კომპანიები უფრო მეტ ინვესტიციას დებენ ახალ ტექნოლოგიებში.კონკურენტული ბაზრების კიდევ ერთი მნიშვნელოვანი ასპექტია ენერგეტიკული უსაფრთხოება. თავისუფალი ბაზარი ამცირებს დამოკიდებულებას ერთ მიმწოდებელზე ან ენერგიის წყაროზე, რადგან ის ხელს უწყობს ბევრი მიმწოდებლის შემოსვლას ბაზარზე. გარდა ამისა, კონკურენტული ბაზრების არსებობა მნიშვნელოვანია ინვესტიციების მოზიდვისთვის, რადგან ასეთი ბაზრები მონაწილეებისთვის უზრუნველყოფს მეტ შესაძლებლობებსა და თანაბარ პირობებს“.2024 წელი ENERGY COMMUNITY-ის რომელი მოთხოვნების შესრულებას დაეთმობა ძირითადად?„მოსალოდნელია, რომ 2024 წელი, ენერგეტიკის სექტორში ნაკისრი ვალდებულებების შესრულების გზაზე, ტრანსფორმაციული იქნება საქართველოსთვის. ყურადღება გამახვილდება ელექტროენერგიის ორგანიზებული ბაზრების გახსნასა და ბუნებრივი გაზის ბირჟის ამოქმედებაზე. გარდა ამისა, 2024 წელს ველოდებით როგორც ელექტროენერგიის, ისე ბუნებრივი გაზის გადამცემი სისტემების ოპერატორების განცალკევებასა და სერტიფიცირებას. საკანონმდებლო მიმართულებით, მოსალოდნელია, რომ საქართველო ახლო პერიოდში მიიღებს საკანონმდებლო ცვლილებებს, რომლებიც უზრუნველყოფს ელექტროენერგიის ბაზრების, ენერგოეფექტურობისა და განახლებადი ენერგიის მარეგულირებელ ენერგეტიკული გაერთიანების კანონმდებლობასთან ჰარმონიზაციას. კიდევ ერთი მნიშვნელოვანი მიღწევა, რომელიც მოსალოდნელია 2024 წელს, ენერგეტიკისა და კლიმატის ეროვნული გეგმის დამტკიცებაა“.  - აღნიშნა სალომე ჯანელიძემ.

„ენერგეტიკული ბირჟის ამოქმედებასთან დაკავშირებით საფრთხეები არსებობდა და ახლაც არსებობს“ - გია არაბიძე

საქართველოში ენერგეტიკული ბირჟის ამოქმედება ექვსჯერ გადავადდა. უკანასკნელ შემთხვევაში ხელისუფლების პოზიციის მიხედვით, ბირჟის გადავადების მიზეზი რეგიონში არსებული არასტაბილური გეოპოლიტიკური ვითარებაა, რამაც, შესაძლოა, ენერგიაზე ფასების სტაბილურობას მნიშვნელოვანი საფრთხე შეუქმნას. აღნიშნულ პათოსს იზიარებენ ექსპერტებით. როგორც ენერგეტიკოსი გია არაბიძე Energynews-თან საუბრისას აცხადებს, ქვეყანა ბირჟის ასამუშავებლად ბოლომდე მზად არ იყო. მისი თქმით, საქართველოში ელექტრო სისტემა  გარკვეულ პერიოდში დეფიციტურია, რის გამოც შესაძლოა რუსეთს ესარგებლა  და ბირჟის ამოქმედების შემდგომ ფასების მნიშვნელოვანი რყევებისთვის შეეწყო ხელი, რაც საქართველოს დააზარალებდა.„მე ვფიქრობ რომ ნახევრად დაუმთავრებელი საქმის დაწყებას სჯობს ეს საქმე არ დავიწყოთ. ვგულისხმობ იმას, რომ ენერგეტიკული ბირჟის ამოქმედებას თავის დროზე ევროპაში წლების განმავლობაში მოუნდნენ. შესაბამისად, ჩვენს შემთხვევაში ნამდვილად არსებობდა საფრთხეები  ამ ბირჟის ამუშავებიდან გამომდინარე. მეც ვგრძნობდი და ალბათ მთავრობაც ასე ფიქრობდა, რომ ქვეყანა სრულყოფილად არ იყო მზად ბირჟის ასამუშავებლად ტექნიკური პრობლემებიდან გამომდინარე. მოგეხსენებათ ჩვენი ენერგეტიკული სექტორი ძალიან სპეციფიკურია. ჩვენ შეგვიძლია მხოლოდ და მხოლოდ პარალელში ვიმუშაოთ ან რუსეთთან ან აზერბაიჯანთან. სომხეთთან ჩვენ ვერ ვმუშაობთ, რადგან ეს უკანასკნელი ირანს დაუკავშირდა . თურქეთთანაც ვერ ვმუშაობთ, რადგან მათი სისტემა განსხვავებულია. აქედან გამომდინარე მიბმული ვართ ისეთ სიტუაციაზე, სადაც ჩვენი სისტემის მდგრადობა ხვდება პრობლემის ქვეშ. ჩვენ დეფიციტური სისტემა გვაქვს, ვგულისხმობ იმას, რომ ზამთრის პერიოდში ჩვენი ენერგია ბოლომდე არ გვყოფნის და სწორედ აქ არის საშიშროება რომ ელექტროენერგიაზე მოხდეს ან ფასის დაცემა, ან პირიქით, გაზრდა. აქედან გამომდინარე, ჩვენ უსაფრთხოების გარანტიები, სამწუხაროდ, არ  გვაქვს.  ჩვენ რომ ვიყოთ უკრაინისავით ან მოლდოვასავით, რომლებიც შეუერთდნენ ევროპის ენერგეტიკულ სისტემას, მაშინ გაცილებით მეტი დაცულობა გვექნებოდა. შესაბამისად მე ვეთანხმები სემეკისა და ზოგადად მთავრობის პოზიციას შესაძლო საფრთხეებზე განცხადებასთან დაკავშირებით“. - აცხადებს გია არაბიძერაც შეეხება მოლოდინებს. როგორც ცნობილია, ბირჟის ამოქმედება მიმდინარე წლის ივლისის პერიოდში უნდა განხორციელდეს. აღნიშნულს ენერგეტიკოსი გია არაბიძე პესიმისტურად აფასებს. მისი თქმით, იმ ფონზე როცა ქვეყანაში მსხვილის პროექტები გაჩერებულია არსებობს კითხვის ნიშნები თუ რამდენად მოხერხდება არსებულ გარემოებაში ბირჟის გახსნა.„მე მაინც ეჭვქვეშ ვაყენებ ჩვენს მზაობას ბირჟის გასახსნელად. ჩვენ რომ თავის დროზე ხუდონი, ნამახვანი და ნესკრა შეგვეყვანა ექსპლუატაციაში გაცილებით მეტად დაცულები ვიქნებოდით და არ გვექნებოდა რყევების შიში, როგორც ეს არსებულ რეალობაშია. ჩვენ უნდა გვქონდეს ჩვენი ენერგეტიკული დამოუკიდებლობა, რადგან არ გვყავს მეზობელი ქვეყანა, რომელიც პრობლემას მოგიგვარებს. პირიქით, მგონია, რომ რუსეთი უფრო მეტად შეეცდება ამ ბირჟის გახსნის შემდგომ მეტი პრობლემები და რყევები გამოიწვიოს ჩვენს სისტემაში, ვიდრე ამას აქამდე აკეთებდა.  ცხადია ჩვენ აღარ ვართ რუსეთზე მიბმული და გვყოფნის მეტ-ნაკლებად გენერაცია, მაგრამ ეს არ არის საკმარისი მდგრადობისთვის“.გია არაბიძე ასევე აცხადებს, რომ ქვეყნის მდგრადობისა და გრძელვადიანი სტაბილურობისთვის გადამწყვეტი მნიშვნელობა აქვს ისეთი ტიპის ჰესების მშენებლობას, როგორებიცაა ჰუდონი, ნესკრა და ნამახვანჰესი.„ენერგეტიკული მდგრადობისთვის როგორც პატარა, ისე საშუალო და დიდი ზომის ჰესების მშენებლობას გადამწყვეტი მნიშვნელობა აქვს. საქართველო არ არის იმ გარემოცვაში, სადაც პრობლემების შექმნისას რომელიმე მეზობელი დაეხმარება. შესაბამისად, გადამწყვეტი მნიშვნელობისაა, რომ ქვეყანას ჰქონდეს საკუთარი გენერაცია, თანაც წყალსაცავების ტიპის გენერაცია, რომელიც რეზერვის შექმნის შესაძლებლობას მოგვცემს. თუნდაც ხუდონის, ნესკრას ან ნამახვანის ჰიდროელექტრო სადგური მოგვცემდა ჩვენ საშუალებას, რომ გვქონოდა მყარი საიმედო და უსაფრთხო გამომუშავება“. - აღნიშნა გია არაბიძემ.ინფორმაციისთვის, ენერგეტიკული ბირჟა არის თავისუფალი, საბითუმო ბაზარი, სადაც მსხვილ საწარმოებს შესაძლებლობა ექნებათ, ელექტროენერგიის შესასყიდად პირდაპირ ბირჟაზე ივაჭრონ და ჰესების მფლობელებთან ხელშეკრულებები დამოუკიდებლად გააფორმონ. მსხვილი კომპანიების გასვლამ თავისუფალ ბაზარზე სამომხმარებლო ტარიფზე ზეწოლა უნდა შეამსუბუქოს

სხვა სიახლეები